ក្រុមអ្នកភូមិគោកត្នោត ឃុំគោកចក ជាច្រើននាក់បានមកចោមរោមក្រុមអ្នកសារព័ត៌មាន និងអ្នកស៊ើបអង្កេតរបស់អង្គការសិទ្ធិមនុស្សក្រៅរដ្ឋាភិបាលដោយអះអាងប្រាប់ថា ក្រុមចម្រុះរបស់អាជ្ញាធរអប្សរាប្រដាប់ដោយអាវុធបានវាយតប់បុរសអ្នកភូមិម្នាក់ និងប្រើកាំភ្លើងបាញ់គំរាមទល់ដីជាច្រើនគ្រាប់ នៅពេលដែលពួកគេបានចុះអនុវត្តការរុះរើផ្ទះមួយខ្នងធ្វើពីឈើប្រក់ស្លឹកត្នោតទំហំ ៤ម៉ែត្រគុណ៦ម៉ែត្ររបស់ប្តីប្រពន្ធដែលទើបតែរៀបការហើយបែកផ្ទះពីឪពុកម្តាយក្នុងភូមិនោះ។
បុរសអ្នកភូមិត្នោតម្នាក់ឈ្មោះ សាយ សុន អាយុ២៦ឆ្នាំ បានអះអាងកាលពីព្រឹកថ្ងៃព្រហស្បតិ៍ ទី១១ ខែមីនា ថា រូបគាត់ត្រូវបានកម្លាំងចម្រុះរបស់អាជ្ញាធរអប្សរារុញច្រានដួលលើដី និងទះកំផ្លៀងផង កាលពីព្រឹកថ្ងៃពុធ នៅពេលដែលគាត់និងបុរសម្នាក់ទៀតបានចូលទៅព្យាយាមអង្វរក្រុមអាជ្ញាធរទាំងនោះកុំឲ្យរុះរើផ្ទះប្អូនរបស់គាត់ដែលម្ចាស់ផ្ទះមិននៅ។
លោក សាយ សុន បានបញ្ជាក់ថា ៖ «ខ្ញុំសុំអង្វរគេថា កុំឲ្យទាន់រើ ប្អូននោះនៅធ្វើការឯជាយដែននោះ។ ខ្ញុំចូលមកក៏អប្សរាច្រានខ្ញុំដួល ហើយខ្ញុំក្រោកឡើងគេទះ១ដៃទៀត បាញ់ប្រឆាកបណ្តោយ!»។
ស្ត្រីអ្នកភូមិម្នាក់ទៀតឈ្មោះ ចិ ហ៊ុប ដែលទៅចូលរួមគាំទ្រអ្នកភូមិដូចគ្នាបានបន្ថែម ៖ «ពីដំបូងឡានគេមកដល់ ឡាន៤ ខ្ញុំនេះក៏ដៃម្ខាងពរកូនលើកសំពះគ្នាអ៊ីចេះឯង! លោកអើយទុកចែកទៅ ក្មួយនេះគ្នាកំព្រីកំព្រាទេ គ្មានបងគ្មានប្អូនណា អ្នកស្រុកទេគេជួយ។ អ្នកភូមិនេះមកច្រើនសុំអង្វរករមិនបានសោះណា។ ប្រុសចូលមកច្រានដួល ទះបណ្តោយ។ បាញ់ផាំងៗទៅ អ្នកភូមិក៏រត់ឡើងលើថ្នល់អស់ទៅណា៎!»។
ស្រ្តីឈ្មោះ សឿត សៃ ដែលមានផ្ទៃពោះ៣ខែផង ជាម្ចាស់ផ្ទះគេរុះរើនោះ បានមានប្រសាសន៍ថា ពេលអាជ្ញាធរអប្សរាចុះរុះរើផ្ទះគាត់គឺគាត់មិននៅផ្ទះទេ រវល់ទៅពិនិត្យផ្ទៃពោះនៅមណ្ឌលសុខភាព។ ពេលមកដល់ផ្ទះឃើញគេរុះរើ ដោយគាត់បាត់លុយចំនួន ៣០០ដុល្លារ ហើយអាជ្ញាធរនោះបានវាយបំបែកចោលពាងទឹក១ កាំបិតខ្វែវចំនួន៣ និងគ្រឿងផ្ទះ១ឈុតត្រូវបានគេដឹកជញ្ជូនយកទៅ។
ទោះយ៉ាងណា លោក ព្រំ ករុណា ប្រធានស្តីទីនៃនាយកដ្ឋានសណ្តាប់ធ្នាប់និងកិច្ចសហប្រតិបត្តិការរបស់អាជ្ញាធរអប្សរា បានបដិសេធមិនធ្វើការអធិប្បាយបញ្ហានេះតាមទូរស័ព្ទទេ ដោយលោកមានប្រសាសន៍ថា ឲ្យទៅជួបលោកនៅការិយាល័យ លោកនឹងពន្យល់ឲ្យក្បោះក្បាយ។
លោក ព្រំ ករុណា បានអះអាងថា ៖ «ខ្ញុំអត់មានពេលបកស្រាយរឿងហ្នឹងតាមទូរស័ព្ទទេបង។ បងចង់បានព័ត៌មានច្បាស់ សុំអញ្ជើញមកកន្លែងខ្ញុំ ខ្ញុំមានឯកសារមួយចំនួនសម្រាប់បង្ហាញបង!»។
កាលពីរសៀលថ្ងៃព្រហស្បតិ៍ លោក ព្រំ ករុណា បានធ្វើសន្និសីទជាមួយអ្នកកាសែតក្នុងស្រុកចំនួន៣នាក់ ដោយមានបង្ហាញរូបថតមនុស្សដែលកាន់កាំបិតផ្គាក់និងដបសាំង ដែលអាជ្ញាធរអះអាងថា ក្រុមអ្នកភូមិបានព្យាយាមចូលសំដៅអាជ្ញាធរ ទើបមានការបាញ់កាំភ្លើងដើម្បីការពារខ្លួន។
អ្នកស៊ើបអង្កេតអង្គការសិទ្ធិមនុស្ស លីកាដូ លោក លាង ប៊ុនរ៉ា ដែលបានចុះពិនិត្យបញ្ហានោះ បានរិះគន់សកម្មភាពរបស់អាជ្ញាធរអប្សរាថា ដោយគ្រាន់តែរុះរើផ្ទះតូចមួយនោះមិនគួររហូតដល់ទៅប្រើអាវុធបាញ់គំរាមអ្នកភូមិទេ។
អង្គការសិទ្ធិមនុស្ស លីកាដូ បានចាត់ទុកការវាយតប់របស់កម្លាំងអាជ្ញាធរអប្សរាមកលើអ្នកភូមិនោះថា គឺជាការរំលោភលើសិទ្ធិមនុស្ស៕