លោក ចម ប្រសិទ្ធ ទេសរដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មកម្ពុជា ដែលចូលរួមបើកវគ្គជាភ្ញៀវកិត្តិយសនៅសណ្ឋាគារ លឺរ៉ូយ៉ាល់ (Le Royal) ក្នុងទីក្រុងភ្នំពេញ នៅថ្ងៃទី១៥ ខែមិថុនា បានថ្លែងថា នេះជាលើកទីមួយហើយដែលប្រទេសកម្ពុជា មានស្ថាប័នមួយនេះឡើង ដែលហៅជាផ្លូវការថា មជ្ឈមណ្ឌលមជ្ឈត្តការជាតិកម្ពុជា ហើយលោកបានរំពឹងថា តាមរយៈការងារដែលមានតម្លាភាព គុណភាព ឯករាជ្យនៃស្ថាប័ននេះ ប្រទេសកម្ពុជា អាចទាក់ទាញវិនិយោគិនបរទេសមកប្រទេសកម្ពុជា បានច្រើនជាងពេលមុនៗ ដែលប្រទេសកម្ពុជា មិនមានស្ថាប័នដោះស្រាយទំនាស់ពាណិជ្ជកម្មនេះទាល់តែសោះ។
លោក ចម ប្រសិទ្ធ បានថ្លែងនៅក្នុងពិធីបើកវគ្គនោះថា ៖ «...អ៊ីចឹងមនុស្ស ៥៤នាក់នេះ នៅពេលនរណាមួយជាប់ លុះត្រាតែអ្នកហ្នឹងបានបង្ហាញថា ខ្លួនឯងមានសមត្ថភាព មានសុចរិតភាពពិតប្រាកដ គេទុកចិត្តបាន ទើបគេទៅរកយើង»។
លោករដ្ឋមន្ត្រីបញ្ជាក់ថា ក្រុមមជ្ឈត្ដករទាំង ៥៤នាក់នោះ នឹងមិនបានចូលធ្វើការទេ បើសិនជាការសិក្សារបស់គេខ្សោយ មិនជាប់ពិន្ទុដែលលោកថា ជាពិន្ទុកំណត់តាមនិយាមអន្តរជាតិ។
វគ្គបណ្ដុះបណ្តាលមជ្ឈត្តករនេះបានកើតឡើង បន្ទាប់ពីរដ្ឋាភិបាលកម្ពុជា បានសហការជាមួយធនាគារអភិវឌ្ឍន៍អាស៊ី (ADB) និងសាជីវកម្មហិរញ្ញវត្ថុអន្តរជាតិ (IFC) ដើម្បីបង្កើតមជ្ឈមណ្ឌលមជ្ឈត្តការជាតិកម្ពុជា អស់រយៈពេលជាច្រើនឆ្នាំមក។ ប្រទេសកម្ពុជា មិនធ្លាប់មានមជ្ឈមណ្ឌលមជ្ឈត្តការ ឬតុលាការពាណិជ្ជកម្មទេ ចាប់តាំងពីប្រទេសនេះប្រកាន់របបទីផ្សារសេរីមក។
លោកស្រី ជូលៀ ប៊្រិកខេល (Julia Brickell) តំណាងសារជីវកម្មហិរញ្ញវត្ថុអន្តរជាតិប្រចាំកម្ពុជា ដែលបានចូលរួមពិធីបើកវគ្គនោះដែរ មានប្រសាសន៍ថា អំឡុងពេលកម្ពុជា មិនមានតុលាការពាណិជ្ជកម្ម ឬមជ្ឈត្ដករ ពាណិជ្ជករជាច្រើនបានដោះស្រាយទំនាស់តាមរយៈផ្លូវតុលាការ។
លោកស្រីថ្លែងដោយស្រង់របាយការណ៍ធនាគារពិភពលោកថា ឈ្មួញបានចំណាយពេលដល់ទៅ ៤០១ថ្ងៃ ក្នុងដំណើរការនីតិវិធីចំនួនតែ ៤៤ប៉ុណ្ណោះ ហើយក្រុមឈ្មួញបានចំណាយប្រាក់ច្រើនលើសលប់ទៅឲ្យចៅក្រម និងមន្ត្រីតុលាការ ដែលធ្វើឲ្យអ្នកវិនិយោគិនធុញទ្រាន់ ហើយមិនចង់មកវិនិយោគនៅប្រទេសកម្ពុជា បន្តទៅទៀត។
រដ្ឋលេខាធិការពាណិជ្ជកម្ម លោក ម៉ៅ ថូណា បានឲ្យដឹងថា វគ្គបណ្តុះបណ្តាលនេះ ផ្តោតលើច្បាប់ពាណិជ្ជកម្ម បច្ចេកទេស និងនីតិវិធីដោះស្រាយទំនាស់ពាណិជ្ជកម្ម។ ការសិក្សានេះចែកជាពីវគ្គ គឺសិក្សានៅចុងសប្ដាហ៍ និងសិក្សានៅពេលយប់ក្រោយការងារ ហើយនៅពេលរៀនចប់ ក្រុមមជ្ឈត្ដករនោះ ត្រូវដើរផ្សព្វផ្សាយតាមខេត្តក្រុងឲ្យគេដឹងអំពីការងាររបស់ខ្លួន។
លោក ម៉ៅ ថូណា មានប្រសាសន៍ដូច្នេះ ៖ «យើងត្រូវទៅផ្សព្វផ្សាយអំពីការងាររបស់យើងឲ្យសភាពាណិជ្ជកម្មនៅតាមខេត្តគាត់បានស្គាល់ ឲ្យអាជីវករធំៗគាត់បានស្គាល់ ដើម្បីដល់ពេលគាត់មានទំនាស់ ឬក៏កិច្ចការដែលគាត់ត្រូវពឹងពាក់យើង ត្រូវធ្វើជាមួយយើង»។
លោករដ្ឋលេខាធិការបន្តថា ក្រុមមជ្ឈត្ដករ ត្រូវបំប៉នការសិក្សាជាបន្តបន្ទាប់ទៀត ដើម្បីឲ្យមានជំនាញពិតប្រាកដ អនុវត្តការងារមានតម្លាភាព និងប្រសិទ្ធភាព ដូចជាធ្វើទស្សនកិច្ចដកពិសោធន៍ក្រៅប្រទេស ហើយត្រូវរៀនបន្ថែមក្នុងរយៈពេល ២ឆ្នាំម្តងយ៉ាងហោច បើមិនដូច្នោះទេពួកគេនឹងបាត់បង់ការងារនេះវិញ៕