ហេតុការណ៍ប្លន់ប្រដាប់អាវុធនេះបានកើតឡើងនៅផ្សារតាស្តារ ភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ។
លោក សូ ភី អធិការប៉ូលិសស្រុកសំពៅលូនបានថ្លែងថា ក្រុមចោរប្លន់មានគ្នា៤នាក់ មានអាវុធវែងមួយដើមនិងកាំភ្លើងខ្លី២ដើម បានធ្វើសកម្មភាពប្លន់ទៅលើប្តីប្រពន្ធពីរនាក់ដែលមានមុខរបរជាអ្នកលក់គ្រឿងអល្លង្ការនិងដូរលុយនៅផ្សារតាស្តារ ។
លោក សូ ភី បានឲ្យដឹងថា ៖ «នៅពេលម្ចាស់ផ្ទះរត់ចេញពីផ្ទះ ស្រែកថាចោរ វាបាញ់ប៉ុន្តែបាញ់មិនផ្ទុះ ។ បានប៉ូលិសយើងឡើងពីលិចមកទៀត វាបាញ់សំដៅទៅផ្ទះខាងលិចចំនួនពីគ្រាប់ទៀត ហើយក៏វារត់ចេញពីកន្លែងកើតហេតុ បានប្រហែលជា១០០ម៉ែត្រពីកន្លែងកើតហេតុ វាដល់ចម្ការដំឡូងមី វាបាញ់ពីរគ្រាប់ទៀត អត់មានរងគ្រោះអីទេ» ។
លោក សាន សុខណា អាយុ៣១ឆ្នាំ និងប្រពន្ធឈ្មោះ យូ ហន បានរៀបរាប់ថាមុនក្រុមចោរប្លន់ទាំងនោះចូលមកធ្វើសកម្មភាពប្លន់ រូបលោកកំពុងអង្គុយក្នុងផ្ទះខាត់គ្រឿងប្លាកទីន រីឯប្រពន្ធរបស់លោកកំពុងបោកគក់ ។
លោក សាន សុខណា បានបញ្ជាក់ថា ៖ «ប្រពន្ធខ្ញុំកំពុងបោកខោអាវ ប្រពន្ធខ្ញុំប្រុងផ្លោះរបងដែរ តែវាទៅដល់ចាប់ក្របួចសក់យកមកតែម្ដង ។ វាថាយកសោឲ្យវា ឲ្យសោវារួច វាលែង លែង ប្រពន្ធខ្ញុំរត់ចេញដែរ» ។
លោក សុខណា បានបន្តថា ៖ «ប្លាកទី៥០ដំឡឹងជាង មាសគេប្រចាំតែ៥ជីទេ លុយ (បាត) ២សែន ហើយលុយខ្មែរមួយលានជាង» ។
លោក សូភី អធិការនគរបាល និងលោក ស្រី ណាន មេបញ្ជាការកងរាជអាវុធហត្ថស្រុកសំពៅលូន បានថ្លែងថាក្រោយពីការប្លន់សមត្ថកិច្ចបានធ្វើការឡោមព័ទ្ធចម្ការដំឡូងទីតាំងដែលក្រុមចោរប្លន់រត់គេចខ្លួន រហូតដល់ម៉ោងជាង១២យប់ ប៉ុន្តែរកមិនឃើញ ។
សមត្ថកិច្ចស្រុកបានអះអាងថា បច្ចុប្បន្នខាងអាជ្ញាធរកំពុងធ្វើការប្រមូលភស្តុតាង និងសាកសួរសាក្សីឃើញផ្ទាល់ភ្នែកពីភិនភាគចោរប្លន់ ដើម្បីកំណត់អត្តសញ្ញាណក្រុមចោរប្លន់ទាំងនោះ ។
ក្រុមប្រជាពលរដ្ឋមួយចំនួនបានសម្តែងការព្រួយបារម្ភជុំវិញករណីអំពើចោរប្លន់ប្រដាប់អាវុធបានចាប់ផ្តើមកក្រើកឡើងជាបន្តបន្ទាប់ក្នុងខេត្តបាត់ដំបង នារយៈពេលចុងក្រោយនេះ ។
លោក ម៉ាក់ ទន ស្នងការរងខេត្តបាត់ដំបង ទទួលបន្ទុកផែនកណ្តាលព្រហ្មទណ្ឌ មិនធ្វើអត្ថាធិប្បាយជុំវិញករណីចោរប្លន់ដែលកើតមានឡើងជាបន្តបន្ទាប់នេះទេ ដោយលោកជំរុញឲ្យទៅសួរលោកស្នងការ កង សាខន ។ រីឯលោក កង សាខន វិញ បានមានប្រសាសន៍ថាលោកកំពុងជាប់ប្រជុំ ។
គួរបញ្ជាក់ថាកាលពីថ្ងៃទី១០ សីហាកន្លងទៅនេះ ក្រុមចោរប្លន់មួយក្រុមបានធ្វើសកម្មភាពប្លន់ នៅភូមិស្តុកប្រវឹក ឃុំព្រៃត្រឡាច ស្រុកមោងឫស្សី ខេត្តបាត់ដំបង អស់មាសជាង៥០ដំឡឹង បា្រក់ជាង១០លានរៀល ហើយក្រុមចោរប្លន់មានគ្នាបីនាក់បានប្រើអាកាបត់មួយដើមនិងកាំភ្លើងខ្លី ៕