អំពើប្លន់ប្រដាប់អាវុធកើតមានផ្ទួនៗ នៅខេត្តកំពង់ធំ
ដោយ សាវយុត
2008-05-08
អំពើប្លន់ប្រដាប់អាវុធបានកើតមានផ្ទួនៗគ្នា្ន នៅស្រុកបារាយណ៍ ខេត្តកំពង់ធំ ធ្វើឲ្យប្រជាពលរដ្ឋជាច្រើនមានការភ័យខ្លាច និងទាមទារឲ្យសមត្ថកិច្ចពង្រឹងកិច្ចការពារបន្ថែមទៀតសម្រាប់សន្តិសុខពួកគេ ។
បុរសឈ្មោះ ហ៊ុយ ហ៊ន នៅភូមិចតុឡោក ឃុំបារាយណ៍ ស្រុកបារាយណ៍ ខេត្តកំពងធំ បានមានប្រសាសន៍ឲ្យដឹងកាលពីព្រឹកថ្ងៃព្រហស្បតិ៍ ទី៨ ខែឧសភាថា គ្រួសាររបស់គាត់ត្រូវក្រុមចោរប្រដាប់អាវុធមានគ្នាពីរនាក់ចូលប្លន់យកបានប្រាក់ជាង ៣លានរៀល កាលពីវេលាម៉ោង ៩យប់ថ្ងៃទី៧ ខែឧសភាកន្លងមក ជាមួយនឹងការគំរាមបាញ់សម្លាប់ចោលផង ។
លោក ហ៊ុយ ហ៊ន បានឲ្យដឹងថា ៖ «ចោរយកកាំភ្លើងភ្ជង់ប្រពន្ធខ្ញុំ ។ អាម្នាក់ទៀតដើរភ្ជង់គ្រប់គ្នាហ្នឹង ។ ភ័យពេកក៏ទៅចាក់សោយកលុយឲ្យ អស់៣៦០ម៉ឺន(រៀល) ។ ទើបតែលក់សណ្ដែកដីថ្មីៗហ្នឹង បានទៅវាអស់ហើយ» ។
មេបញ្ជាការប៉េអឹមស្រុកបារាយណ៍ លោក ឃុន ប៊ុនហួរ បានមានប្រសាសន៍ថា យោងតាមការសាកសួរពីជនរងគ្រោះ ក្រុមចោរប្លន់នោះប្រដាប់ដោយកាំភ្លើងម៉ាកអាកាចំនួន ២ដើម ៖ «តាមការសាកសួររបស់យើងទៅលើជនរងគ្រោះហ្នឹងថា មានឃើញអាវុធ២ដើម ។ មុខសញ្ញាយើងកំពុងតែស៊ើបអង្កេត» ។
អធិការរងនគរបាលស្រុកបារាយណ៍ លោក សន ថាល់ បានមានប្រសាសន៍ថា លោកពុំបានដឹងអំពីអំពើចោរកម្មនោះទេ ហើយលោកជំរុញឲ្យសួរទៅអធិការនគរបាល ៖ «ខ្ញុំក្ដាប់អត់ទាន់បានដែរ អ៊ីចេះបងសួរអធិការតែម្ដងទៅ ។ ខ្ញុំក្ដាប់មិនសូវបានទេ ព្រោះខ្ញុំអធិការរងទេ» ។
ប៉ុន្តែអធិការនគរបាលស្រុកបារាយណ៍ លោក ម៉ី ឆែម មិនបានទទួលទូរស័ព្ទឆ្លើយឆ្លងទេ ។
សមត្ថកិច្ចឲ្យដឹងថានេះជាអំពើប្លន់ប្រដាប់អាវុធលើកទី២ហើយ នៅឯស្រុកបារាយណ៍ ខេត្តកំពង់ធំ ក្នុងរយៈពេលមួយសប្តាហ៍មកនេះ ។
កាលពីថ្ងៃទី២៩ ខែមេសាកន្លងមក ចោរប្លន់ប្រដាប់អាវុធមានគ្នា២នាក់បានចូលប្លន់ផ្ទះប្រជាពលរដ្ឋ នៅភូមិត្នោតជុំ២ ឃុំត្នោតជុំ ស្រុកបារាយណ៍ ដែលទើបតែលក់ក្របីបានប្រាក់ ៥លាន៣សែនរៀល ហើយក្រុមចោរទាំងនោះបានបាញ់សម្លាប់បុរសដែលជាម្ចាស់ផ្ទះផង ។
អ្នកស្រី រ៉េត បានមានប្រសាសន៍ថា ប្តីរបស់គាត់ឈ្មោះ ម៉ី សេង អាយុ៦៧ឆ្នាំត្រូវក្រុមចោរបាញ់សម្លាប់នៅពេលដែលធ្វើសកម្មភាពប្លន់ ៖ «សួរថាលុយនៅឯណា ? ខ្ញុំថាអត់មានទេ ដាំបន្លែលក់បន្តិចបន្តួច ។ អត់មាននិយាយអីទេ បាញ់តែម្ដង» ។
ប្រជាពលរដ្ឋជាច្រើននៅស្រុកបារាយណ៍ បានសម្ដែងការភ័យខ្លាចបន្ទាប់ពីកើតមានអំពើប្លន់ប្រដាប់អាវុធ ហើយពួកគេទាមទារឲ្យសមត្ថកិច្ចបង្កើនកិច្ចការពារសន្តិសុខបន្ថែមទៀត ៖ «ប្រជាពលរដ្ឋមានការព្រួយបារម្ភដែរ ព្រោះជិតបោះឆ្នោត ហើយប្លន់សុទ្ធតែប្រដាប់អាវុធ ។ ថ្ងៃឡើងខ្វល់ខ្វាយនឹងការរកស៊ី ទំនិញឡើងថ្លៃផង យប់ឡើងមិនហ៊ានសម្រាកនៅពេលយប់ទៀត» ។
នៅស្រុកបារាយណ៍ខេត្តកំពង់ធំ អំពើប្លន់ប្រដាប់អាវុធឧស្សាហ៍កើតមានចាប់តាំងតែពីមានការអះអាងថា មានការបាត់អាវុធរបស់នគរបាលប៉ុស្តិ៍ឃុំទ្រៀលចំនួន២ដើម កាលពីអំឡុងខែកុម្ភៈ ឆ្នាំ២០០៧ ។
បន្ទាប់មកកាលពីថ្ងៃទី១៩ ខែមេសា ក្រោយពីការបាត់អាវុធជាងមួយខែ អំពើចាប់ជំរិតមួយបានកើតឡើងនៅភូមិជីឱក ក្នុងឃុំបារាយណ៍ ស្រុកបារាយណ៍ ដោយគ្រួសារជនរងគ្រោះបានបង់ប្រាក់ចំនួន២០លានរៀល ជាថ្នូរទៅនឹងការដោះលែងក្រុមគ្រួសារ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
អ៊ិន សូលីដា សោកស្ដាយចំពោះហេតុការណ៍ជះទឹកអាស៊ីដលើម្ដាយមីង
សិទ្ធិមនុស្សជំរុញឲ្យមានការស៊ើបអង្កេតករណីបាញ់សម្លាប់មនុស្សក្រៅច្បាប់
អង់គ្លេសស្វាគមន៍ការចាប់ខ្លួនជនសង្ស័យខ្មែរក្រហម
អ្នកភូមិ៤នាក់ត្រូវបានឃាត់ខ្លួនពីបទកាប់ឈើខុសច្បាប់
អតីតជនសង្ស័យខ្មែរក្រហមម្នាក់ទៀតត្រូវបានចាប់ខ្លួន
ប៉ូលិសនៅខែត្ររតនគិរីរងការចោទថា ជំរិតទារប្រាក់ពីពលរដ្ឋ
ជនអាល្លឺម៉ង់ម្នាក់ត្រូវតុលាការកាត់ទោសឲ្យជាប់គុក២ឆ្នាំ
