ការអះអាងនេះបានធ្វើឡើងនៅព្រឹកថ្ងៃទី៣០ ខែវិច្ឆិកា បន្ទាប់ពីពួកគេត្រូវបានយោធានៅទីនោះ បានចាប់ខ្លួន ហើយក្រោយមកត្រូវបានដោះលែងមកវិញជាថ្នូរនឹងការបង់ប្រាក់ច្រើនលានរៀល។
យុវជនអាយុ ២៣ឆ្នាំ ឈ្មោះ រដ្ឋា អះអាងថា នៅយប់ថ្ងៃទី២៤ ខែវិច្ឆិកា ពួកគាត់៤នាក់ ចេញពីធ្វើឡានទៅផឹកស៊ីពីម៉ោង៩ រហូតដល់ម៉ោង ១០យប់។ គាត់ត្រឡប់មកវិញ ជិះម៉ូតូគ្នា ៤នាក់ តាមផ្លូវសហព័ន្ធរុស្ស៊ី។ ពេលកំពុងធ្វើដំណើរនោះ គេបានជិះវ៉ាម៉ូតូមួយគ្រឿង ហើយក៏ទៅជួបនឹងរថយន្តមន្ត្រីយោធានៅអង្គភាពកងពលតូចលេខ៧០។ នៅពេលម៉ូតូបើកវ៉ានោះ ពួកគាត់ស្រែកប្រាប់អ្នកបើកម៉ូតូថា ប្រយ័ត្នប៉ះឡានអ្នកធំ។ គ្រាន់តែឮពាក្យនេះ ស្រាប់តែរថយន្តរបស់មន្ត្រីយោធានោះ បើកកៀរម៉ូតូគាត់ ហើយមានរថយន្តស៊ីរ៉ែន បើកដេញពីក្រោយម៉ូតូគាត់ និងចាប់គាត់វាយតប់ដាក់ខ្នោះយកទៅទុកនៅក្នុងបន្ទាយអង្គភាពកងពលតូចលេខ៧០៖ «គេថាពួកខ្ញុំជេរគេ ដល់ពេលជិះបានដីប្រហែលជា ៥០០ម៉ែត្រ ក៏គេឲ្យកូនចៅគេចុះមកចាប់ខ្ញុំ ហើយវ៉ៃពួកខ្ញុំ ហើយយកកាំភ្លើងភ្ជង់ពួកខ្ញុំទៀត ហើយពួកខ្ញុំអត់ដឹងរឿងអីផង»។
យុវជន រដ្ឋា បន្តថា អង្គភាពយោធានោះ គេដកយកម៉ូតូ ទូរស័ព្ទ លុយ និងកាតសម្គាល់ខ្លួនផ្សេងៗ ហើយគេយកឧបករណ៍ប្រើគ្រឿងញៀន មកដាក់នៅម៉ូតូគាត់ រួចចោទថា ពួកគាត់ប្រើគ្រឿងញៀន។ យោធាបង្ខំឲ្យពួកគាត់ឲ្យទូរស័ព្ទទៅរកក្រុមគ្រួសារ ដើម្បីយកលុយមកលោះម្នាក់ៗ ១ពាន់ដុល្លារ។ យុវជនអះអាងថា យោធាឃុំគាត់នៅក្នុងបន្ទាយ ចាប់ពីម៉ោង ១០កន្លះយប់ថ្ងៃទី២៤ ខែវិច្ឆិកា រហូតដល់ម៉ោង ៤ល្ងាច ថ្ងៃទី២៦ ខែវិច្ឆិកា ទើបឲ្យគាត់ចេញតាមទ្វារក្រោយបន្ទាយ បន្ទាប់ពីក្រុមគ្រួសារយកប្រាក់ទៅបង់ឲ្យគ្រប់ចំនួនទារ។
យុវជន រដ្ឋា៖ «កែបម៉ូតូខ្ញុំអត់មានអីផង រួចដល់ពេលគេយកមកញុក គេថាពួកខ្ញុំហ្នឹងពាក់ព័ន្ធគ្រឿងញៀនហ្នឹងទៀត។ អីចឹង ទោះបីយើងមិនមានទោសអ្វីធ្ងន់ធ្ងរ ក៏គេចាប់ជំរិតយើងយកលុយដែរ បើមិនបានអស់ ១ពាន់ដុល្លារ ក៏គេអត់ឲ្យយើងចេញដែរ។ ដូចថ្ងៃខ្ញុំរួចខ្លួនហ្នឹង ជាប់ ១០នាក់ មិនដឹងថាមកពីមូលហេតុអីទេ តែឮថាអស់ម្នាក់ខ្ទង់ ១ពាន់ដុល្លារ ទើបបានរួចខ្លួន។ អីចឹងនិយាយថា គេអត់បានបញ្ជូនខ្ញុំទៅណាផង ដល់ពេលដោះស្រាយរួច គេឲ្យខ្ញុំចេញមកផ្ទះតែម្តងហ្នឹង»។
គ្រួសារតំណាងយុវជនទាំង ៤នាក់ សុំមិនបញ្ចេញឈ្មោះ ថ្លែងថា គាត់បានបង់ប្រាក់ទៅវរសេនីយ៍ឯក ឈ្មោះ កឹម សារុន បង់ឲ្យកូន និងក្មួយម្នាក់ៗជាង ២លានរៀល។ ឯមិត្តភ័ក្ដិកូន ២នាក់ទៀតនោះ លោក កឹម សារុន ឲ្យបង់ម្នាក់ ៤លានរៀល។ លោកចោទថា អង្គភាពកងពលតូចលេខ៧០ បានល្បាតចាប់ក្មេងដើរយប់ ចោទថាប្រើគ្រឿងញៀន ដើម្បីទារយកលុយពីឪពុកម្តាយ៖ «វរសេនីយ៍ឯក កឹម សារុន នាយការិយាល័យទី២ នៃកងពលតូចលេខ៧០ គេឲ្យគាត់ម្នាក់ ១ពាន់ៗ»។
ពាក់ព័ន្ធនឹងការចោទប្រកាន់នេះ ឧត្តមសេនីយ៍ សូយ ណាឫទ្ធិ មេបញ្ជាការរងអង្គភាពកងពលតូចលេខ៧០ ថ្លែងថា នៅថ្ងៃសៅរ៍ ទី២៤ ខែវិច្ឆិកា លោកបានបើករថយន្តត្រឡប់ពីភ្នំពេញទៅអង្គភាព។ លោកបានជួបក្រុមយុវជននោះបានបើកម៉ូតូរេពេញផ្លូវ ហើយបានជេរលោក ទើបលោកហៅមន្ត្រីជំនាញឲ្យទៅសាកសួរក្រុមយុវជននោះ៖ «គេស្រែកជេរខ្ញុំ មិនមែនស្រែកជេរគ្នាគេទេ គ្រាន់តែខ្ញុំចាត់ឲ្យជំនាញខ្ញុំចាប់មនុស្សហ្នឹងយកមកសួរ ហេតុអី ខ្ញុំអត់មានពាក់ព័ន្ធទេ គ្រាន់តែខ្ញុំសម្លឹងមុខក៏មិនបាន? ហើយចាប់យកមនុស្សហ្នឹងយកមកសួរមក មានឆែកនៅក្នុងខ្លួនមានពាក់ព័ន្ធនឹងសម្ភារៈជក់គ្រឿងញៀនតទៅទៀត។ អីចឹង ខ្ញុំរាយការណ៍រហ័សបន្ទាន់ រាយការណ៍ជូនថ្នាក់លើ ថ្នាក់លើបញ្ជាឲ្យបញ្ជូនទៅអាជ្ញាធរមានសមត្ថកិច្ចបន្តទៀត»។
មន្ត្រីអង្គការសិទ្ធិមនុស្សលីកាដូ (Licadho) លោក អំ សំអាត ថ្លែងថា យោធាមានសិទ្ធចាប់ជនសង្ស័យ អាស្រ័យលើភស្តុតាង និងរឿងហេតុកើតឡើងជាក់ស្តែង តែគេមិនអាចចាប់ជនសង្ស័យយកទៅឃុំនៅក្នុងបន្ទាយយោធាទេ។ ក្រោយចាប់ គឺត្រូវបញ្ជូនជនសង្ស័យទៅប៉ូលិស អាវុធហត្ថ ឬទៅអាជ្ញាធរមូលដ្ឋាន។ តែបើសិនជាយោធាចាប់គេដាក់ឃុំក្នុងបន្ទាយ ហើយទារយកប្រាក់ទៀតនោះ ជារឿងចាប់ជំរិតដូចការចោទរបស់ក្រុមគ្រួសារយុវជនរងគ្រោះ។
ក្រុមគ្រួសារយុវជនរងគ្រោះគ្រោងដាក់ពាក្យប្ដឹងពីអង្គភាពកងពលតូចលេខ៧០ ទៅរដ្ឋាភិបាលឲ្យពិនិត្យបញ្ហាកើតឡើងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។