មន្ត្រីរដ្ឋាភិបាលខ្មែរបានថ្លែងថា មេការជនជាតិថៃ បានបាញ់កម្មករខ្មែរម្នាក់ស្លាប់ និងបានដុតកម្ទេចសាកសពដើម្បីបំបាត់ភស្តុតាង កាលពីវេលាម៉ោង៧យប់ ថ្ងៃទី១១ ខែកញ្ញា ឆ្នាំ២០១០ នៅក្នុងចម្ការដំណាំអំពៅមួយស្ថិតក្នុងភូមិឌីនដែង ឃុំថេតនិម្មិត ស្រុកពងណាំរ៉ន ខេត្តចាន់បូរី ប្រទេសថៃ។
ប្រធានទំនាក់ទំនងព្រំដែនខ្មែរថៃ ប្រចាំច្រកព្រហ្ម ខេត្តប៉ៃលិន លោក ជឹម ចំណាន បានមានប្រសាសន៍កាលពីថ្ងៃច័ន្ទ ទី១៣ ខែកញ្ញាថា មេការជនជាតិថៃ ឈ្មោះ ឯក កាភុត ប៉មខាំ (Ek Kaphut Pom kham) ហៅ ម៉ៅ បានប្រើកាំភ្លើងខ្លីបាញ់កម្មករខ្មែរ ឈ្មោះ វ៉ាត វណ្ណា អាយុ២៤ បណ្ដាលឲ្យស្លាប់។ លោក ជឹម ចំណាន បន្ថែម ៖ «វាបាញ់កាំភ្លើងរូឡូចំក្បាលហើយបានវាយកសពដាក់លើឡាន យកកង់ឡានដុតជាមួយប្រេងម៉ាស៊ូត ដុតឆេះអស់អ៊ីចឹងទៅបានវាជីករណ្ដៅកប់ធ្យូង ដើម្បីបំបាត់ភស្តុតាង ប៉ុន្តែឆេះអស់ហើយ នៅសល់ឆ្អឹង នៅថ្លើម»។
ប្រភពពីកម្មករខ្មែរដែលបានគេចខ្លួនពីដីថៃមករាយការណ៍ជូនសមត្ថកិច្ចខ្មែរ នៅក្រោយការបាញ់សម្លាប់បានកម្មករខ្មែរឲ្យដឹងថា មុនពេលកើតហេតុ កម្មករខ្មែរ-ថៃមានគ្នាចំនួន ៦នាក់ បាននាំផឹកស្រាអស់៤ដប ក្រោយមកក៏ទាស់ពាក្យសំដីគ្នា។
មេការថៃ ឈ្មោះ ឯក កាភុត ប៉មខាំ ឃើញឈ្លោះគ្នាអត់ឈប់ ក៏បានបាញ់កាំភ្លើងគំរាម១គ្រាប់ តែត្រូវជនរងគ្រោះ ឈ្មោះ វ៉ាត វណ្ណា ចូលទៅឃាត់ ហើយបានកៀសដៃមេការថៃរូបនោះ ប៉ុន្តែត្រូវឈ្មោះ ឯក កាភុត ប៉មខាំ ជាមេការជនជាតិថៃ លើកកាំភ្លើងបាញ់១គ្រាប់ ចំក្បាលបណ្ដាលឲ្យស្លាប់។
កម្មករខ្មែរឃើញហេតុការណ៍ឲ្យដឹងថា ក្រោយពីការបាញ់សម្លាប់ មេការជនជាតិថៃរូបនោះ បានប្រើឲ្យកម្មករខ្មែរលើកសពដាក់ចូលទៅក្នុងរថយន្ត ដឹកចេញដុតនៅកន្លែងផ្សេង ដើម្បីបំបាត់ភស្តុតាង ៖ «កម្មករខ្មែរវាសម្លុតឲ្យឡើងឡាន គ្នា៥នាក់ ហើយដល់ពាក់កណ្ដាលផ្លូវវាឲ្យចុះពីរនាក់ ចុះចាំចម្ការអំពៅ សល់បីនាក់ទៅតាមវា។ ដល់កន្លែងផ្លូវកាច់ បទចូលយកសាកសពដាក់កន្លែងដុតហ្នឹង អាមួយនោះភ័យពេក លោតចុះរត់មកស្រុកខ្មែរទាំងយប់ សល់ពីរនាក់ ថៃបីនាក់ ទៅតាមសពហ្នឹង ហើយវាបញ្ជាខ្មែរយកកង់ឡានពីរដុត ដាក់ពីលើសព ហើយយកម៉ាស៊ូតចាក់ ហើយយកឈើធំៗ គងពីលើទៅ ដុតបណ្ដោយ វាមុនដុត យូរដែរ វាយកត្រាក់ទ័រមកឈូស ដាក់សពក្នុងទើបដុត»។
បុរសខ្មែរជាជនរងគ្រោះ មានឈ្មោះ វ៉ាត វណ្ណា អាយុ២៤ រស់នៅខេត្តកំពង់ស្ពឺ បានឆ្លងដែនទៅធ្វើជាកម្មករស៊ីឈ្នួលឲ្យថៃ នៅភូមិឌីនដែង ឃុំថេតនិម្មិត ស្រុកពងណាំរ៉ន ខេត្តចាន់បូរី។
មន្ត្រីទំនាក់ទំនងព្រំដែនខ្មែរបានឲ្យដឹងថា សមត្ថកិច្ចខ្មែរ និងសមត្ថកិច្ចថៃ បានចុះទៅដល់កន្លែងកើតហេតុ រុករកឃើញភស្តុតាង មានឈាមប្រឡាក់រថយន្ត និងឆ្អឹង ថ្លើម នៅសេសសល់ក្រោយពីការដុតកម្ទេច។
ចំណែកមេការជនជាតិថៃ ឈ្មោះ ឯក កាភុត ប៉មខាំ អាយុ២៨ឆ្នាំ ជាជនដៃដល់ និងកម្មករថៃពាក់ព័ន្ធពីរនាក់ផ្សេងទៀត ត្រូវអាជ្ញាធរខ្មែរសហការជាមួយអាជ្ញាធរថៃ ចាប់ឃុំខ្លួននៅស្រុកពងណាំរ៉ន ខេត្តចាន់បូរី ក្នុងប្រទេសថៃ៕