ក្រុមសង្គមស៊ីវិលដែលមានសកម្មភាពពាក់ព័ន្ធនឹងការអភិវឌ្ឍយុវជន បានបង្ហាញថា យុវជនកម្ពុជា មានការយល់ដឹងតិចតួចណាស់អំពីសមាគមអាស៊ាន បើប្រៀបធៀបទៅនឹងប្រទេសជាសមាជិកនៃសមាគមអាស៊ានទាំង ១០ប្រទេសនោះ។
នាយករងនៃកម្មវិធីអភិវឌ្ឍន៍ធនធានយុវជន លោក រាម រដ្ឋាមុនី បានថ្លែងប្រាប់វិទ្យុអាស៊ីសេរី នៅថ្ងៃទី១៩ ខែមិថុនា ថា ពាក្យថា អាស៊ាន សម្រាប់យុវជនខ្មែរ ពួកគេភាគច្រើនបានស្គាល់ត្រឹមតែឈ្មោះប៉ុណ្ណោះ ចំណែកអត្ថន័យខ្លឹមសារ ព្រមទាំងអត្ថប្រយោជន៍របស់អាស៊ាន ដែលទាក់ទងនឹងពួកគេ គឺគេពុំបានដឹង និងពុំដែលមានការចាប់អារម្មណ៍ឡើយ។
លោក រាម រដ្ឋាមុនី មានប្រសាសន៍ដូច្នេះ ៖ «អ៊ីចឹងបើយើងមិនធ្វើការស្វែងយល់ពីអាស៊ានហ្នឹងទៀតទេ យើងជាជនរងគ្រោះមែនទែន អ៊ីចឹងបានយើងរៀបចំវេទិកានេះឡើង ដើម្បីឲ្យគាត់រៀបចំខ្លួនថា គួរចាប់យកឱកាសអ្វីខ្លះពីអាស៊ានសម្រាប់ខ្លួនឯង»។
លោកថ្លែងបែបនេះនៅក្នុងឱកាសប្រារព្ធពិធីវេទិកាយុវជនប្រចាំឆ្នាំលើកទី៨ ឆ្នាំ២០១០ ស្តីអំពីកាលានុវត្តន៍ភាព ឬការអនុវត្តទៅតាមពេលវេលាកំណត់នៃអាស៊ាន សម្រាប់យុវជនដែលមាននិស្សិតចូលរួមប្រមាណជាង ៦០០នាក់ ក្នុងរាជធានីភ្នំពេញ នៅថ្ងៃសៅរ៍ ទី១៩ ខែមិថុនា។
និស្សិតមកពីសាកលវិទ្យាល័យកម្ពុជា ឆ្នាំទី២ ផ្នែកសេដ្ឋកិច្ច ឈ្មោះ ងួន សុខសាន បានឲ្យដឹងថា នេះជាលើកទីមួយហើយដែលគេបានស្ដាប់ការពិភាក្សាយ៉ាងក្បោះក្បាយពីអាស៊ាន ជាពិសេសការយល់ដឹងពីសារប្រយោជន៍របស់អាស៊ាន ចំពោះយុវជន។
និស្សិត ងួន សុខសាន ឲ្យដឹងដូច្នេះ ៖ «ថ្ងៃនេះយើងបានស្គាល់ពីសាវតារមួយចំនួនពីអាស៊ាន ដែលអាចឲ្យយុវជន និងនិស្សិតតាមសកលវិទ្យាល័យមានឱកាសបានចូលរួមក្នុងសកម្មភាពផ្សេងៗក្នុងអាស៊ាន»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យ៉ង់ គឹមអេង មានប្រសាសន៍ឲ្យដឹងដែរថា យុវជនកម្ពុជា ពិតជាមានការយល់ដឹងពីអាស៊ាន តិចតួចបំផុត ហើយលោកមានការបារម្ភផងដែរខ្លាចយុវជនមិនអាចតាមទាន់នូវការវិវឌ្ឍនានាក្នុងសមាគមអាស៊ាន ខណៈដែលស្ថានភាពក្នុងតំបន់កំពុងមានសមាហរណកម្មទៅមុខហើយនោះ។
លោកបន្តថា ការដែលយុវជនកម្ពុជា មានការយឺតយ៉ាវក្នុងការស្វែងយល់ពីអាស៊ាននេះ ដោយសារនៅតាមគ្រឹះស្ថានសិក្សាមួយចំនួនមិនបើកច្រកឲ្យយុវជនធ្វើការសិក្សាស្រាវជ្រាវ ការពិភាក្សាឲ្យបានទូលំទូលាយប៉ុន្មានឡើយ ដូចជាបញ្ហាសិទ្ធិមនុស្ស ប្រជាធិបតេយ្យ កិច្ចសហប្រតិបត្តិការផ្សេងៗទៀត ពីព្រោះបើនិស្សិតនិយាយអំពីបញ្ហានេះគេថា ជារឿងនយោបាយប៉ះពាល់ដល់សង្គមជាតិ រដ្ឋាភិបាលជាដើម។
លោក យ៉ង់ គឹមអេង មានប្រសាសន៍ដូច្នេះ ៖ «បញ្ហានយោបាយ គឺអាស៊ានមានតួនាទីសំខាន់ក្នុងការដោះស្រាយ ចុះបើពួកគេមិនយល់ពីបញ្ហានយោបាយ សិទ្ធិមនុស្ស ប្រជាធិបតេយ្យឲ្យបានល្អិតល្អន់ទេ តើពួកគេទៅធ្វើការជាមួយតំបន់យ៉ាងម៉េច?»។
សមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន បានបង្កើតឡើងនៅឆ្នាំ១៩៦៧ បច្ចុប្បន្នមានសមាជិក ១០ប្រទេសចូលរួម ក្នុងនោះមានកម្ពុជា វៀតណាម លាវ ថៃ ឥណ្ឌូណេស៊ី ម៉ាឡេស៊ី ប្រ៊ុយណេ ហ្វីលីពីន ភូមា និងសិង្ហបុរី ហើយកន្លងមកក្នុងមួយឆ្នាំៗ អាស៊ានតែងតែផ្ដល់នូវឱកាសដល់ក្រុមយុវជន នូវការផ្លាស់ប្ដូរបទពិសោធន៍ការងារ និងដំណោះស្រាយផ្សេងៗពីបញ្ហាប្រឈមរបស់យុវជនជាដើម៕