អ្នកភូមិបឹងកក់ដែលរងការបណ្ដេញចេញប្រមាណ ៣០០នាក់ បានមកឈរទទួលស្វាគមន៍ក្រុមសង្គមស៊ីវិលអាស៊ាន ដោយមានលើកបង្ហាញបដាស្ដីពីការបណ្ដេញចេញ និងរូបថតនៃការប្រើអំពើហិង្សារបស់សមត្ថកិច្ចរាជធានីភ្នំពេញ។
ក្រុមអ្នកភូមិក៏សុំឲ្យអង្គការនៃបណ្ដាប្រទេសនៅតំបន់អាស៊ាន ជួយអន្តរាគមន៍ទៅរដ្ឋាភិបាលកម្ពុជា ដើម្បីឲ្យពលរដ្ឋតំបន់បឹងកក់ទាំងអស់គ្នា អាចអភិវឌ្ឍន៍នៅនឹងកន្លែង បោះព្រំប្រទល់ដី ១២,៤៤ហិកតារ ឲ្យបានច្បាស់លាស់ដាច់ពីដីរបស់ក្រុមហ៊ុន ហើយមិនកាត់ប្រជាពលរដ្ឋណាមួយចេញពីគម្រោងអភិវឌ្ឍន៍នោះឡើយ។
ក្រុមមន្ត្រីអង្គការសង្គមស៊ីវិលនៃបណ្ដាប្រទេសជាសមាជិកសមាគមអាស៊ានទាំងនោះ បានសម្ដែងក្ដីសោកស្ដាយ និងខ្លះទៀតសម្រក់ទឹកភ្នែកនៅពេលឃើញស្ថានភាពអ្នកបឹងកក់ទាំងនោះ។ ពួកគាត់បានថ្លែងថា ពួកគាត់គាំទ្រចំពោះការតវ៉ានានាដោយអហិង្សា៖ «ខ្ញុំគិតថា សារសំខាន់បំផុតអ្វីដែលធ្វើឲ្យខ្ញុំចាប់អារម្មណ៍នេះ គឺជាការទទួលខុសត្រូវរបស់យើង ហើយយើងនឹងធានាថា យើងទៅវិញ ហើយធ្វើឲ្យសាធារណៈដឹង និងមានសម្ពាធអន្តរជាតិ។ យើងនឹងធ្វើលិខិតទៅស្ថានទូតនានា និងផ្សាយព័ត៌មានតាមគេហទំព័រ និងទៅអ្នករាយការណ៍ពិសេសអង្គការសហប្រជាជាតិ»។
នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ បានថ្លែងថា ទស្សនកិច្ចនេះគឺជាការបង្ហាញពីការសហការ និងគាំទ្រគ្នាពីពលរដ្ឋក្នុងតំបន់អាស៊ាន។ ករណីនេះរដ្ឋាភិបាលកម្ពុជា ក៏ត្រូវតែស្វះស្វែងរកដំណោះស្រាយជាមួយអ្នកភូមិបឹងកក់ និងអ្នកភូមិបុរីកីឡា ឲ្យបានឆាប់ចប់ ព្រោះនេះគឺជាមុខមាត់របស់ប្រទេសកម្ពុជា ក្នុងនាមជាប្រធានអាស៊ាននោះ និងមុខមាត់ក្នុងឆាកអន្តរជាតិនោះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។