កម្ពុជា បានធ្វើការផ្ទេរតួនាទីប្រធានរៀបចំកិច្ចប្រជុំក្រុមរដ្ឋមន្ត្រីការពារជាតិអាស៊ាន ទៅឱ្យប្រទេសប្រ៊ុយណេ ដារ៉ូសាឡឹម បន្តការដឹកនាំប្រជុំសម្រាប់ឆ្នាំ២០១៣ ខាងមុខ។
កិច្ចប្រជុំក្រៅផ្លូវការរបស់ក្រុមរដ្ឋមន្ត្រីការពារជាតិអាស៊ាន សម្រាប់ឆ្នាំ២០១២ ដែលធ្វើឡើងនៅឯខេត្តសៀមរាប បានបញ្ចប់ហើយ កាលពីរសៀលថ្ងៃសុក្រទី១៦ ខែវិច្ឆិកា។
កិច្ចប្រជុំនេះ បានធ្វើឡើងរយៈពេលប្រមាណតែជាង ៤ម៉ោង បន្ទាប់ពីក្រុមរដ្ឋមន្ត្រីការពារជាតិ និងអគ្គលេខាធិការអាស៊ានបានជួបជជែកគ្នាទៅលើបញ្ហាមួយចំនួន ដែលបានគ្រោងទុករួចហើយនោះ។
លោក ទៀ បាញ់ ជារដ្ឋមន្ត្រីក្រសួងការពារជាតិនៃប្រទេសកម្ពុជា និងជាប្រធានដឹកនាំកិច្ចប្រជុំនោះ លោកបានថ្លែងថា កាលពីកិច្ចប្រជុំក្រុមរដ្ឋមន្ត្រីការពារជាតិអាស៊ានលើកទី៦ គឺក្រុមរដ្ឋមន្ត្រីការពារជាតិអាស៊ាន បានអនុម័តលើសេចក្តីថ្លែងការណ៍រួមគ្នាមួយ ស្ដីពីការឯកភាពអាស៊ាន ដើម្បីឆ្ពោះទៅរកសហគមន៍មួយដែលមានសុខដុមនីយកម្ម និងសន្តិសុខ។ ភាពត្រូវការផ្នែកសន្តិសុខនៅក្នុងតំបន់នេះ គឺក្រុមរដ្ឋមន្ត្រីការពារជាតិអាស៊ាននៃប្រទេសទាំង១០ បានយល់ព្រមឱ្យបន្ថែមយន្តការជំរុញកិច្ចសហប្រតិបត្តិការជាក់ស្តែងរវាងបណ្ដាប្រទេសអាស៊ាន ជាមួយនឹងក្រុមបណ្ដាប្រទេសផ្សេងទៀតនៅក្រៅតំបន់ ទៅលើបញ្ហាយុទ្ធសាស្ត្រនៃកិច្ចការពារជាតិ និងសន្តិសុខ។
លោក ទៀ បាញ់៖ «បញ្ហាសន្តិសុខដែលកំពុងកើតឡើងនាបច្ចុប្បន្ន កាលនេះជាបញ្ហាដែលតម្រូវឱ្យយើងទាំងអស់គ្នារួបរួមពុះពារជំនះ និងដោះស្រាយ។ ចំណុចនេះហើយ ដែលអាស៊ានត្រូវបានទទួលស្គាល់ ឬផ្តល់តួនាទីជានិម្មាបនករសន្តិសុខក្នុងតំបន់។ នៅក្នុងរយៈពេលតែ ៦ខែកន្លងមកនេះ មានព្រឹត្តិការណ៍ធំៗ ដូចជាកិច្ចប្រជុំរបស់អង្គការសហប្រជាជាតិប្រចាំឆ្នាំ កិច្ចប្រជុំកំពូលអាស៊ីអឺរ៉ុប (ASEM) កិច្ចប្រជុំចលនាមិនចូលបក្សសម្ព័ន្ធ (NAM) និងកិច្ចប្រជុំផ្សេងៗដែលក្នុងនោះបានលើកឡើងនូវប្រធានបទជាច្រើន ដែលពាក់ព័ន្ធទៅនឹងការអភិវឌ្ឍ និងកិច្ចការផ្សេងៗ។ ក៏ប៉ុន្តែ ទោះយ៉ាងណា កិច្ចការពារសន្តិសុខនេះ ក៏នៅតែជាកត្តាមូលដ្ឋាននៅក្នុងការចូលរួមពង្រឹងដល់ការវិវត្តន៍ទាំងឡាយ»។
លោក ទៀ បាញ់ បានបញ្ជាក់ថា នៅក្នុងកិច្ចប្រជុំក្រៅផ្លូវការនេះ គឺក្រុមរដ្ឋមន្ត្រីការពារជាតិអាស៊ាន បានគាំទ្រទៅលើផែនការពង្រឹងសន្តិសុខនៅក្នុងតំបន់ជាច្រើនចំណុច ដូចជាផែនការរៀបចំលំហាត់ និងហ្វឹកហ្វឺនរួមគ្នារវាងផ្នែកជំនួយមនុស្សធម៌ និងកិច្ចការសង្គ្រោះក្នុងពេលមានគ្រោះមហន្តរាយជាមួយនឹងផ្នែកសុខាភិបាលយោធា ដែលគ្រោងនឹងធ្វើឡើងនៅក្នុងប្រទេសប្រ៊ុយណេ ដារ៉ូសាឡឹម នៅក្នុងឆ្នាំ២០១៣ ខាងមុខ។
ក្រុមរដ្ឋមន្ត្រីការពារជាតិអាស៊ានយល់ថា លំហាត់ហ្វឹកហ្វឺនរួមគ្នានេះ នឹងចូលរួមជាវិភាគទានយ៉ាងសំខាន់នៅក្នុងកិច្ចសហប្រតិបត្តិការសន្តិសុខជាក់ស្តែង និងទៅលើសន្តិសុខដែលមិនមែនជាប្រពៃណីផង។
ក្រុមរដ្ឋមន្ត្រីការពារជាតិអាស៊ាន បានទទួលស្គាល់ថា ក្នុងរយៈពេល ពីរបីទសវត្សកន្លងមកនេះ តំបន់អាស៊ីអគ្នេយ៍ គឺជាតំបន់ដែលមានសេចក្តីសុខដុមរមនា គួរឱ្យពេញចិត្ត។ ក៏ប៉ុន្តែ ទោះយ៉ាងណា ក៏គេពុំអាចមើលរំលងភាពប្រឈមមុខទាំងឡាយ ដូចជាបញ្ហាសន្តិសុខនៅក្នុងលំហសមុទ្រ បញ្ហាបរិស្ថាន បញ្ហាសន្តិសុខទឹក សន្តិសុខស្បៀង និងថាមពល ដែលកំពុងមាននៅចំពោះមុខ និងអាចបន្តទៅយូរអង្វែងទាំងនោះបានទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។