រដ្ឋមន្ត្រីក្រសួងហិរញ្ញវត្ថុនៃសមាគមអាស៊ានបានឲ្យដឹងថា ប្រាក់ប្រមាណ ៥០០ លានដុល្លារអាមេរិក នៅក្នុងមូលនិធិរួមនេះ គឺដើម្បីផ្ដល់ប្រាក់កម្ចីដល់ប្រទេសក្នុងតំបន់ សម្រាប់ការសាងសង់ផ្លូវថ្នល់ផ្លូវរទេះភ្លើង និងគម្រោងផ្សេងៗ ទៀត ដោយមិនចាំបាច់ត្រូវការប្រាក់ជំនួយបរទេស។ មូលនិធិនេះ នឹងធានាឲ្យប្រជាពលរដ្ឋ ប្រមាណ ៦០០ លាននាក់ ក្នុងតំបន់អាចមានឋាមពលអគ្គិសនីប្រើប្រាស់ ទឹកស្អាត អនាម័យ និងផ្លូវគមនាគមន៍។
ប្រភពព័ត៌មានបារាំង អា.អេហ្វ.ប៉េ ផ្សាយនៅថ្ងៃអាទិត្យម្សិលមិញនេះ បានឲ្យដឹងថា លោក ស៊ូរិន ពិតស៊ូវ៉ាន់ (Surin Pitsuwan) អគ្គលេខាធិការអាស៊ាន បានថ្លែងថា រដ្ឋមន្ត្រីក្រសួងហិរញ្ញវត្ថុនៃសមាគមអាស៊ាន បានចុះហត្ថលេខា លើកិច្ចព្រមព្រៀងគ្នាមួយ នៅក្នុងកិច្ចប្រជុំប្រចាំឆ្នាំជាមួយធនាគារពិភពលោក និងមូលនិធិរូបិយវត្ថុអន្តរជាតិ (IMF) ដែលប្រារព្ធធ្វើឡើងនៅទីក្រុងវ៉ាស៊ីងតោន សហរដ្ឋអាមេរិក ចាប់ពីថ្ងៃទី២៤ រហូតដល់ថ្ងៃទី ២៦ ខែកញ្ញា ឆ្នាំ ២០១១ នេះ។
លោក ស៊ូរិន ពិតស៊ូវ៉ាន់ បន្តថា មូលនិធិរួមនេះផ្ដើមដំបូង គឺមានទឹកប្រាក់ជិត ៤៨៦ លានដុល្លារសម្រាប់ផ្ដល់ក្នុងគម្រោងនានា យ៉ាងតិចចំនួន ៦ ក្នុងមួយឆ្នាំៗ។ ប្រទេសម៉ាឡេស៊ី ផ្ដល់ ១៥០ លានដុល្លារ ហើយឥណ្ឌូណេស៊ី ផ្ដល់ ១២០ លាន។ ធនាគារអភិវឌ្ឍន៍អាស៊ី ហៅកាត់ថា ADB ដែលស្ថាប័ននេះ មានជប៉ុន និងសហរដ្ឋអាមេរិក ឧបត្ថម្ភច្រើនជាងគេ នឹងផ្ដល់ប្រាក់ ១៥០ លានដុល្លារ ហើយសន្យាជួយផ្ដល់ប្រាក់ ៧០% នៃចំនួនទឹកប្រាក់ក្នុងមូលនិធិសរុបនោះ។
លោក ហារូហ៊ីកូ គូរ៉ូដា ( Haruhiko Kuroda) ប្រធានធនាគារពិភពលោក បានឲ្យដឹងថា ស្ថាប័នលោក គឺជាអ្នកគ្រប់គ្រងថវិកា ហើយនឹងធានាឲ្យមានការធ្វើវិនិយោគទុនឲ្យបានគ្រប់ៗ គ្នានៅបណ្ដាប្រទេសក្នុងតំបន់។
ប្រទេសភូមា បច្ចុប្បន្ននេះ នៅពុំទាន់បានផ្ដល់ថវិកាទេ។ ប៉ុន្តែ ប្រទេសនេះនឹងចូលរួមទៅថ្ងៃអនាគត។ ចំណែកប្រទេសថៃវិញ នៅមិនទាន់បានចូលរួមភ្លាមៗ ទេ ដោយរង់ចាំការពិភាក្សាក្នុងរដ្ឋាភិបាលខ្លួនជាមុនសិន។ ប៉ុន្តែ ថៃក៏នឹងចូលរួមដែរ។ គេនៅពុំទាន់បានដឹងថា ប្រទេសកម្ពុជា នឹងចូលរួមផ្ដល់ថវិកាប៉ុន្មាននៅឡើយទេ។
គម្រោងផ្ដើមមូលនិធិរួមនេះ គឺធ្វើឡើង នៅបន្ទាប់ពីរដ្ឋាភិបាលនៃប្រទេសចិន មានបញ្ហាទំនាក់ទំនងនយោបាយមិនល្អ ជាមួយប្រទេសមួយចំនួនក្នុងសមាគម អាស៊ាន ដែលគេមើលឃើញថា កំពុងបង្កើនឥទ្ធិពលរបស់ខ្លួន តាមរយៈគម្រោងសាងសង់ហេដ្ឋារចនាសម្ព័ន្ធមួយចំនួនក្នុងប្រទេសខ្លះ។
លោក អគ្គលេខាធិការអាស៊ាន ពិតស៊ូវ៉ាន់ ថ្លែងថា ចិន ជប៉ុន និងកូរ៉េខាងត្បូង បង្ហាញការចាប់អារម្មណ៍ ចង់ចូលរួមផ្ដល់ប្រាក់ក្នុងមូលនិធិនេះដែរ។ ប៉ុន្តែ សមាគមអាស៊ាន សម្រេចអនុវត្តកិច្ចការផ្ទៃក្នុងនៃបណ្ដាប្រទេសជាសមាជិកសិន នៅពេលបច្ចុប្បន្ននេះ៕