លោក រាជ សម្បត្តិ អ្នកនាំពាក្យនៃសាលាក្តីខ្មែរក្រហម បានថ្លែងបន្ថែមថា ថវិកាថ្មីពីប្រទេសអូស្ត្រាលីសម្រាប់សាលាក្តីវិសាមញ្ញនេះ គឺនឹងត្រូវផ្តល់ទៅផ្នែកសហប្រជាជាតិតាមរយៈគណនីរបស់ខ្លួននៅឯបុរីញូវយ៉កសហរដ្ឋអាមេរិក ៖ «ថវិកាហ្នឹងឆ្លងតាមរយៈក្រុងញូវយ៉ក មិនមែនឲ្យនៅកម្ពុជាទេ»។
លោក រាជ សម្បត្តិ បានថ្លែងគូសបញ្ជាក់ផងដែរថា ប្រទេសអូស្ត្រាលីក៏ធ្លាប់បានជួយផ្ដល់ថវិកាដល់ភាគីកម្ពុជានៃសាលាក្តីវិសាមញ្ញនេះផងដែរ ក៏ប៉ុន្តែកម្ពុជានៅមិនទាន់បានប្រើប្រាស់ថវិកាជំនួយនោះនៅឡើយទេ ៖ «កន្លងមក គឺក្នុងឆ្នាំហ្នឹងដូចគ្នា គាត់ក៏ធ្លាប់បានផ្ដល់ថវិកាមកខាងផ្នែកកម្ពុជាដែរ តែគ្រាន់តែថវិកាហ្នឹងវាត្រូវឆ្លងតាមច្រកទ្វារអង្គការ UNDP ដែលសព្វថ្ងៃនេះ ខាងកម្ពុជាមិនទាន់មានសិទ្ធិប្រើប្រាស់ថវិកាហ្នឹងទេ»។
យោងតាមឯកសារពីក្រសួងការបរទេសនិងពាណិជ្ជកម្មអូស្ត្រាលី បានឲ្យដឹងថា ប្រទេសអូស្ត្រាលីធ្លាប់បានថ្តល់ថវិកាដល់សាលាក្តីខ្មែរក្រហមកន្លងមក ចំនួន ៤លានដុល្លារសហរដ្ឋអាមេរិករួចមកហើយ។
បើទោះបីជាមានការសន្យាផ្តល់ថវិកាជាបន្តបន្ទាប់ពីសហរដ្ឋអាមេរិក អាល្លឺម៉ង់ និងប្រទេសអូស្ត្រាលី នាពេលថ្មីៗនេះក្ដី ក៏ប៉ុន្តែលោក រាជ សម្បត្តិ បានថ្លែងថា ភាគីអង្គការសហប្រជាជាតិនៅខ្វះថវិកាច្រើនទៀត ៖ «ពីព្រោះផ្នែកអង្គការសហប្រជាជាតិហ្នឹង គាត់ត្រូវការថវិកាសរុបសម្រាប់ទៅដល់ថ្ងៃ៣១ ខែ១២ ឆ្នាំ២០០៩ គឺ ៤០លានដុល្លារ ប្រហែលជាប៉ុណ្ណឹង។ អ៊ីចឹងមកដល់ពេលហ្នឹង យើងឃើញគាត់ទើបតែបានទទួល ១លាន៨សែនពីសហរដ្ឋអាមេរិក ហើយដូចជា ៤លានជាងពីប្រទេសអាល្លឺម៉ង់ ហើយនិងថ្ងៃហ្នឹងទៀត ពីអូស្រ្តាលី ៥លានហ្នឹង»។
ជាមួយគ្នានេះ លោក រាជ សម្បត្តិ ថ្លែងទៀតថា ភាគីកម្ពុជានៃសាលាក្តីខ្មែរក្រហមក៏នៅខ្វះថវិកាជិត ៥លានដុល្លារសហរដ្ឋអាមេរិកផងដែរ។
រហូតមកទល់ពេលនេះ សាលាក្តីវិសាមញ្ញ បានឃុំខ្លួនអតីតមេដឹកនាំខ្មែរក្រហមជាន់ខ្ពស់ ចំនួន ៥នាក់ហើយ ពីបទទទួលខុសត្រូវលើការសម្លាប់រង្គាលមនុស្សប្រមាណ ១,៧លាននាក់នៅកម្ពុជា នាចុងទសវត្សរ៍ឆ្នាំ១៩៧០។
ជាមួយនឹងការអំពាវនាវរកថវិកាបន្ថែម ផ្នែកច្បាប់នៃសាលាក្តីខ្មែរក្រហម ក៏ត្រូវការពេលវេលាជាច្រើនផងដែរ ក្នុងការជំនុំជម្រះក្តី។
ក៏ប៉ុន្តែ នាយកមជ្ឈមណ្ឌលឯកសារកម្ពុជា គឺលោក ឆាំង យុ បានថ្លែងថា គេអាចពន្យារក្នុងការផ្តល់ជំនួយ ឬពន្យារនីតិវិធីច្បាប់ ក៏ប៉ុន្តែគេមិនអាចពន្យារអាយុរបស់មេដឹកនាំខ្មែរក្រហមដែលមានវ័យចាស់និងផ្ទុកដោយជំងឺប្រចាំកាយនោះឡើយ៕