ប្រជាពលរដ្ឋទាំងនោះរស់នៅក្នុងភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម។
ប្រជាពលរដ្ឋឈ្មោះ ឡាច អេង បានថ្លែងឲ្យដឹងនៅថ្ងៃសៅរ៍នេះថា ពួកគាត់បានរស់នៅលើដីនោះដែលជាទីតាំងផ្សារចាស់ តាំងពីឆ្នាំ១៩៨២មកម្ល៉េះ ដោយប្រធានភូមិឈ្មោះ ស៊ុយ ជាអ្នកវាស់វែងចែកជូន ប៉ុន្តែកាលពីថ្ងៃទី៣ ខែកញ្ញានេះ លោកអភិបាលស្រុករងឈ្មោះ យិ វណ្ណៈ បានទៅគំរាមចង់បណ្តេញពួកគាត់។
អ្នកស្រី ឡាច អេង បានឲ្យដឹងថា ៖ «ប្រធានស៊ុយហ្នឹងគាត់ទទួលស្គាល់។ គាត់ឡើងទៅធ្វើប័ណ្ណគ្រួសារ គាត់ទៅថតអត្តសញ្ញាណប័ណ្ណ កត់ទាំងពីកូនចៅទាំងអស់ អត់មានសល់អីទេ។ ឥឡូវមេភូមិហ្នឹងនៅហ្នឹង ប៉ុន្តែគ្រាន់ថាពេលដែលគេហៅគាត់ទៅមើលគេដេញខ្ញុំចេញហ្នឹង គាត់អត់ហ៊ានមាត់អត់ហ៊ានកទេ មានតែលោក វណ្ណៈហ្នឹងទេ ដែលអាចគំរាមពួកខ្ញុំបាន»។
ប្រជាពលរដ្ឋម្នាក់ទៀតឈ្មោះ ភាង ភី បានមានប្រសាសន៍ថាដីនោះពីដើមជាដីព្រៃ ប្រជាពលរដ្ឋបានទៅរស់នៅតាំងពីយូរណាស់មកហើយ មិនដែលមានបញ្ហាអ្វីនោះទេ។
លោក ភាង ភី បានមានប្រសាសន៍ថា ៖ «បើសិនជាដេញឲ្យចេញលុះត្រាតែរកដីធ្លីឯណាឲ្យខ្ញុំបាននៅវិញផង ព្រោះខ្ញុំជាប្រជាពលរដ្ឋមួយនឹងគេដែរ ជាការដោះដូរមួយឲ្យសមស្រប»។
វិទ្យុអាស៊ីសេរីមិនអាចធ្វើការទំនាក់ទំនងលោកប្រធានភូមិ ឈ្មោះ ស៊ុយ ដើម្បីបំភ្លឺពីបញ្ហាខាងលើបានទេនៅថ្ងៃនេះ។
អភិបាលស្រុករង លោក យិ វណ្ណៈ បានមានប្រសាសន៍ថា សព្វថ្ងៃប្រជាពលរដ្ឋដែលរស់នៅលើដីនោះមានតែ៣០គ្រួសារប៉ុណ្ណោះ ប៉ុន្តែលោកបានបញ្ជាក់ថាប្រជាពលរដ្ឋបានទៅរស់នៅលើដីនោះជាដីរដ្ឋ ហើយបានចាប់ផ្តើមរស់នៅក្នុងឆ្នាំ១៩៩៥ មាន២៣គ្រួសារ។ ក្នុងឆ្នាំ២០០០ សមត្ថកិច្ចបានឲ្យប្រជាពលរដ្ឋទាំងនោះរុះរើចេញ និងឲ្យលុយមួយគ្រួសារ៦ម៉ឺនរៀល ពេលនោះមានចំនួន២០គ្រួសារបានយល់ព្រមនិង ៣គ្រួសារទៀតមិនព្រមយកលុយនិងមិនចាកចេញ។ ប៉ុន្តែនៅពេលទទួលលុយរួចមានតែចំនួន១១គ្រួសារប៉ុណ្ណោះបានរើចេញ។
លោកបានបន្ថែមថា លោកត្រូវការយកដីនោះមកអភិវឌ្ឍ តែលោកមិនបានបញ្ជាក់ថាអភិវឌ្ឍលើអ្វីនោះទេ។
មេឃុំព្រែកកក់ លោក អ៊ាត គឹមលាង បានមានប្រសាសន៍ថាលោកមិនទាន់ដឹងអំពីបញ្ហានេះដែរ ប៉ុន្តែលោកបានបញ្ជាក់ថា ៖ «រៀបចំចង់ឲ្យក្លាយទៅជាសណ្ដាប់ធ្នាប់ល្អហ្នឹង ព្រោះការរស់នៅរាល់ថ្ងៃនេះវាគគ្រិចពេក»។
ទោះជាយ៉ាងណាមន្ត្រីស៊ើបអង្កេតសមាគមសិទ្ធិមនុស្ស អាដហុក លោក សិន ហៀង បានមានប្រសាសន៍យ៉ាងដូចេ្នះថា ៖ «ចំពោះច្បាប់ភូមិបាលវិញនៅក្នុងមាត្រា៣១នេះ ចែងច្បាស់ថាបុគ្គលដែលបានអាស្រ័យផលនៃភោគៈកន្លងមក គឺ ៥ឆ្នាំដោយសន្តិវិធីនិងគ្មានការជំទាស់ទេ នឹងបានជាកម្មសិទ្ធិជាស្ថាពរហើយ»៕