សមត្ថកិច្ចចម្រុះមានកងរាជអាវុធហត្ថ ប៉ូលិស និងកម្មករជាង ១០០នាក់ ត្រូវបានអាជ្ញាធរបញ្ជូនទៅកាន់កន្លែងអនុវត្តតាមសាលដីកាស្ថាពររបស់តុលាការកំពូល ដើម្បីរុះរើខ្ទមចាំដីចំនួន ៣ខ្នង និងរឹបអូសយកដីទំហំ ៣ហិកតា នៅក្នុងតំបន់អាជ្ញាធរអប្សរា នៅសង្កាត់ស្លក្រាម ក្រុងសៀមរាប ដែលជារបស់លោក សុន ឆ័យ អ្នកតំណាងរាស្ត្រគណបក្សសមរង្ស៊ី កាលពីព្រឹកថ្ងៃព្រហស្បតិ៍។
លោក សុន ឆ័យ ដែលពុំមានវត្តមាននៅកន្លែងអនុវត្តសាលដីការឹបអូសយកដីរបស់លោកនោះ បានមានប្រសាសន៍កាលពីរសៀលថ្ងៃព្រហស្បតិ៍ថា លោកប្រឆាំងចំពោះការសម្រេចដីការឹបអូសយកដីរបស់លោក ដោយលោកអះអាងថា ការរឹបអូសនោះគឺមិនមែនយកទៅសម្រាប់បម្រើផលប្រយោជន៍សាធារណៈទេ គឺដើម្បីនឹងរៀបចំជួលឲ្យក្រុមហ៊ុនឯកជនជួលធ្វើសណ្ឋាគារ ដែលគ្មានច្បាប់ណាមួយផ្ដល់សិទ្ធិឲ្យអាជ្ញាធរយកដីពីប្រជាពលរដ្ឋទៅឲ្យឈ្មួញជួលបន្តនោះទេ។
លោក សុន ឆ័យ បានបញ្ជាក់ថា ៖ «គឺជាការប្លន់យកដីតាមរយៈប្រព័ន្ធតុលាការ។ ត្រូវការយកដីដោយមិនគោរពតាមច្បាប់ភូមិបាល ប្រើកម្លាំងប្រដាប់អាវុធបែបនេះ គឺជាអំពើយង់ឃ្នងដែលផ្ទុយអំពីគោលការណ៍ច្បាប់។ ការនេះប្រព្រឹត្តមិនមែនត្រឹមតែខ្ញុំទេ ពលរដ្ឋដែលលោកមានដីបន្តិចបន្តួចក៏ទទួលរងគ្រោះបែបនេះជាច្រើនករណីហើយ»។
ព្រះរាជអាជ្ញារងអមសាលាដំបូងខេត្តសៀមរាប លោក សុខ កែវបណ្ឌិត បានមានប្រសាសន៍ថា ដីរបស់លោក សុន ឆ័យ ទំហំ ៣ហិកតានោះ ត្រូវបានដកហូត និងចាត់ចូលជាទ្រព្យសម្បត្តិសាធារណៈរបស់រដ្ឋ ដោយប្រគល់ទៅឲ្យអាជ្ញាធរអប្សរាគ្រប់គ្រង។
លោក សុខ កែវបណ្ឌិត បានអះអាងថា ៖ «ការអនុវត្តសាលដីកាកាលពីព្រឹកមិញនេះ ខ្ញុំបានអនុវត្តដោយអនុលោមតាមសាលដីកាស្ថាពររបស់តុលាការកំពូល ដែលគាត់បានសម្រេចប្រគល់សិទ្ធិគ្រប់គ្រងកាន់កាប់ដីរបស់ឯកឧត្ដម សុន ឆ័យ ហ្នឹង ចាត់ចូលជាទ្រព្យសម្បត្តិសាធារណរបស់រដ្ឋ ពោលគឺនៅក្រោមការគ្រប់គ្រងរបស់អាជ្ញាធរអប្សរា»។
ចំណែកមេធាវីរបស់រដ្ឋាភិបាលដែលការពាររឿងក្ដីនោះ លោក ប៉ាល់ ច័ន្ទដារ៉ា បានមានប្រសាសន៍ថា លោកសុំមិនធ្វើការអធិប្បាយអំពីការសម្រេចរបស់តុលាការក្នុងរឿងនោះទេ ប៉ុន្តែសម្រាប់រូបលោកបានរកឃើញថា លោក សុន ឆ័យ ពុំមានឯកសារគ្រប់គ្រាន់ដែលអាចសំអាងថាជាម្ចាស់កម្មសិទ្ធិដីនោះឡើយ។
លោក ប៉ាល់ ច័ន្ទដារ៉ា បានមានប្រសាសន៍ថា ៖ «ត្រឹមត្រូវ ឬមិនត្រឹមត្រូវ អាហ្នឹងសំខាន់លើតុលាការកំពូលសម្រេច។ ប៉ុន្តែសម្រាប់ខ្លួនខ្ញុំគឺឯកឧត្ដម សុន ឆ័យ អត់មានឯកសារអីទេ។ កន្លងទៅ ឯកឧត្ដម សុន ឆ័យ ធ្លាប់ប្រាប់វិទ្យុមួយចំនួន តាមកាសែតមួយចំនួនថា លោកមានកម្មសិទ្ធិឯកជន ឬក៏មានប័ណ្ណកម្មសិទ្ធិ ឬក៏ដីរបស់គាត់ហ្នឹងមានការទទួលស្គាល់ពីក្រសួងហិរញ្ញវត្ថុ ពីអាជ្ញាធរអប្សរា ឬក៏ពីមេឃុំ មេស្រុកណា អាហ្នឹងគាត់ភរតែម្ដង អត់មានទេ មានតែលិខិតមួយគឺសុំកាន់កាប់ដីធ្លី»។
លោក សុន ឆ័យ បានមានប្រសាសន៍ថា ដីទំហំ ៣ហិកតា គឺលោកបានទិញតាំងពីអំឡុងឆ្នាំ១៩៩៥ ហើយនៅពេលដីនេះមានទំនាស់ជាមួយអាជ្ញាធរអប្សរា មន្ត្រីរដ្ឋាភិបាលធ្លាប់បានចេញសំណងមកឲ្យលោកថ្លៃ ៥០សេនដុល្លារក្នុង ១ម៉ែត្រការ៉េ ដោយគិតទាំងថ្លៃដើមឈើក្នុងនោះផង គឺលោកអាចទទួលបានប្រាក់ប្រមាណ ១៩.០០០ដុល្លារអាមេរិកដែរ តែលោកបដិសេធមិនទទួលយកនោះទេ។
លោក សុន ឆ័យ បានមានប្រសាសន៍ថា លោកមិនទទួលយកការសម្រេចសាលដីការបស់តុលាការកំពូលនោះទេ ហើយលោកកំពុងពិគ្រោះជាមួយអ្នកច្បាប់ជាតិ និងអន្តរជាតិ រិះរកវិធីណាមួយដែលអាចបន្តការតវ៉ាទៅទៀតបាន៕