កាលពីរសៀលថ្ងៃសៅរ៍ ទី២៣ ខែឧសភា មន្ត្រីរដ្ឋាភិបាលអាជ្ញាធរអប្សរានិងអ្នកជំនាញជាង១០រូបបានរួមគ្នាធ្វើសន្និសីទកាសែតមួយដោយថ្លែងថា ការរៀបចំដាក់អំពូលភ្លើងនៅតាមថែវប្រាសាទអង្គរប៉ែកខាងលិចឆៀងខាងជើងនិងដាក់អំពូលហ្វាកម្លាំង១២០០វ៉ាត់បាញ់បំភ្លឺអង្គរនាពេលយប់នោះបានធ្វើឡើងតាមបច្ចេកទេសត្រួតពិនិត្យត្រឹមត្រូវពីអ្នកជំនាញរបស់អង្គការ UNESCO ដែលមិនមានការដាប់ថ្មប្រាសាទថ្មីៗដើម្បីដាក់ឧបករណ៍ទាំងនោះដូចពាក្យចោទប្រកាន់ទេ។
លោក ង៉ោ ហុងលី ប្រតិភូរបស់ទីស្តីការគណៈរដ្ឋមន្ត្រីទទួលបន្ទុកអាជ្ញាធរអប្សរាបានមានប្រសាសន៍ក្នុងសន្និសីទកាសែតថា ការដាក់ភ្លើងនៅអង្គរវត្តនេះអង្គការ UNESCO បានបញ្ជូនអ្នកជំនាញខាងភ្លើងឲ្យមកធ្វើការជាប់ជានិច្ច ហើយអាជ្ញាធរខ្មែរមិនល្ងង់ដល់ថ្នាក់បណ្តោយឲ្យក្រុមហ៊ុនទទួលការងារដាក់ភ្លើងនោះបានដាប់បំផ្លាញប្រាសាទបូរាណដែលជាបេតិកភណ្ឌពិភពលោកដែរ។
លោក ង៉ោ ហុងលី បានបញ្ជាក់ថា ៖ «តើបងប្អូនអាចជឿទេថាយូណេស្កូទាំងមូលដែលកន្លងមកជួយអង្គរវត្តរបស់យើង ជួយព្រះវិហារ ដាច់ចិត្តបញ្ជូនជំនាញខាងភ្លើងរបស់គាត់មកឲ្យបំផ្លាញអង្គរវត្តយើង»។
ចំណែក លោក ប៊ុន ណារិទ្ធ អគ្គនាយកអាជ្ញាធរអប្សរាទទួលបន្ទុកថែរក្សានិងអភិរក្សប្រាសាទបូរាណបានមានប្រសាសន៍ថា ពុំមានការដាប់ថ្មប្រាសាទអង្គរវត្តថ្មីៗណាមួយសម្រាប់តដាក់អំពូលភ្លើងនោះទេ គឺក្រុមហ៊ុនស៊ូជីងដែលជាអ្នកម៉ៅការបានប្រើកំណាត់ឈើខ្លីៗតាមបច្ចេកទេសវាយបញ្ចូលទៅក្នុងប្រហោងថ្មដែលមានស្រាប់ដើម្បីចាប់ជើងអំពូលភ្លើងអគ្គិសនីប៉ុណ្ណោះដែលវាពុំមានធ្វើឲ្យខូចខាតប្រាសាទទេ។
លោក ប៊ុន ណារិទ្ធ បានមានប្រសាសន៍ថា ៖ «ជាព័ត៌មានយល់ច្រឡំ គេយកឈើទៅស៊កនឹងប្រឡោះដុំថ្ម អ៊ីចឹងអត់មានទៅដាប់អត់មានទៅចោះ អត់មានទៅស្អីទេ»។
ការថ្លែងការពារខ្លួនរបស់ក្រុមមន្ត្រីពាក់ព័ន្ធនឹងការថែរក្សាប្រាសាទបូរាណនេះបានធ្វើឡើង៤ម៉ោងក្រោយពីមានក្រុមមគ្គុទ្ទេសក៍អង្គរនិងទេសចរណ៍បរទេសខ្លះបានសម្ដែងប្រតិកម្មខ្លាំងក្លាបន្ទាប់ពីពួកគេបានឃើញកំណាត់ឈើខ្លីៗត្រូវបានគេដាក់បញ្ចូលក្នុងប្រហោងថ្មជញ្ជាំងប្រាសាទតភ្លើងនោះនិងជឿថាមានការដាប់ថ្មជញ្ជាំងប្រាសាទបូរាណឲ្យខូចខាត។
ទោះយ៉ាងណាបុគ្គលិករបស់គម្រោងអាល្លឺម៉ងដែលទទួលបន្ទុកអភិរក្សចម្លាក់ថ្មទីនោះដែលបានឡើងទៅពិនិត្យបានអះអាងថា ការយកកំណាត់ឈើទៅវាយបញ្ជូលក្នុងប្រហោងថ្មនោះពិតជាធ្វើឲ្យជញ្ជាំងថ្មប្រាសាទខ្លះត្រូវបាក់បែកខូចខាតតិចតួចដែរមិនធានាតាមបច្ចេកទេសនោះទេ ៖ «ពួកខ្ញុំមកពិនិត្យវាឃើញស្នាមគេដាក់ឈើហ្នឹងមានប៉ះកកិតមានស្នាមបែកជាយៗផុយបន្តិចៗ»។
មន្ត្រីអាជ្ញាធរអប្សរានិងអ្នកជំនាញពាក់ព័ន្ធបញ្ហានោះមិនទាន់មានការពន្យល់ណាមួយច្បាស់លាស់អំពីសារសំខាន់អ្វីទើបត្រូវដាក់អំពូលភ្លើងហ្វាបំភ្លឺរូបចម្លាក់តាមជញ្ជាំងខ្លះនិងត្រូវបាញ់បំភ្លឺកំពូលប្រាសាទនៅពេលយប់នោះទេ ក្រៅពីមូលហេតុតែមួយដែលថាដាក់បំភ្លឺពេលយប់ដើម្បីទាក់ទាញភ្ញៀវទេសចរណ៍បរទេសឲ្យបន្តស្នាក់នៅបានយូរក្នុងទឹកដីអង្គរនោះ៕