ក្រុមសមត្ថកិច្ចចម្រុះ មានមន្ត្រីរដ្ឋបាលព្រៃឈើ កងរាជអាវុធហត្ថ និងប៉ូលិសដែលដឹកនាំដោយព្រះរាជអាជ្ញាអមសាលាដំបូងខេត្តសៀមរាប បានចុះឆែកឆេរឃ្លាំងដ៏ធំមួយនៅក្រោយទីតាំងភូមិវប្បធម៌ ដែលជារបស់ក្រុមហ៊ុនកាណាឌីយ៉ា នាភូមិក្រួស សង្កាត់ស្វាយដង្គំ ក្រុងសៀមរាប ដោយបានរកឃើញឈើស្តុករាប់រយម៉ែត្រគូប។
ការឆែកឆេររកឃើញកាលពីព្រឹកថ្ងៃច័ន្ទ ទី៥ ខែមេសា ត្រូវបានមន្ត្រីរដ្ឋបាលព្រៃឈើឲ្យដឹងថា មានឈើប្រភេទបេង នាងនួន ធ្នង់ និងគគីរជាច្រើនរយម៉ែត្រគូបនៅក្នុងឃ្លាំងដ៏ធំមួយដែលបិទជិតដោយជញ្ជាំងស័ង្កសី។
ព្រះរាជអាជ្ញាអមសាលាដំបូងខេត្តសៀមរាប ដែលដឹកនាំការឆែកឆេរ លោក ទី សុវិនថាល់ បានមានប្រសាសន៍កាលពីរសៀលថ្ងៃច័ន្ទនេះថា កម្លាំងចម្រុះកំពុងបន្តវាស់វែងដើម្បីឲ្យដឹងចំនួនឈើនោះពិតប្រាកដ។ ក៏ប៉ុន្តែលោកព្រះរាជអាជ្ញាបានបដិសេធមិនធ្វើការអធិប្បាយអំពីចំណាត់ការបន្តត្រូវធ្វើយ៉ាងណាទៀតនោះទេ។
លោក ទី សុវិនថាល់ មានប្រសាសន៍ដូច្នេះ ៖ «ទាល់តែស្អែកទៀតបានធ្វើហើយ។ ស្អែកមួយព្រឹកពេញតែម្ដង ល្ងាចហ្នឹងធ្វើអត់ហើយទេ»។
ហង្ស សាវយុត ៖ តាមនីតិវិធីរឹបអូសតែម្ដង ឬក៏យ៉ាងម៉េច? ទី សុវិនថាល់ ៖ ខ្ញុំសុំមិនឆ្លើយទេ ពីព្រោះថា ធ្វើតាមច្បាប់វាត្រូវអ៊ីចឹងហើយ ដូចលោកមានប្រសាសន៍ហ្នឹងហើយ។
លោក គង់ ណារិន នាយអធិការដ្ឋានរដ្ឋបាលព្រៃឈើខាងជើងបឹងទន្លេសាប ដែលបានទៅពិនិត្យឃ្លាំងស្តុកឈើនោះ បានមានប្រសាសន៍ថា លោកកំពុងឲ្យមន្ត្រីរបស់លោកពិនិត្យមើល និងស្រាវជ្រាវរកអាជ្ញាប័ណ្ណស្តុកឈើ ប្រសិនបើមិនមានអាជ្ញាប័ណ្ណត្រឹមត្រូវទេ នឹងត្រូវរឹបអូស ហើយម្ចាស់ទីតាំងនឹងប្រឈមមុខផ្លូវច្បាប់។
លោក គង់ ណារិន មានប្រសាសន៍ថា ៖ «យើងនឹងពិនិត្យ ប្រសិនជាទាំងអស់នេះមិនមានលិខិតអនុញ្ញាតណាមួយពីរដ្ឋបាលព្រៃឈើ បានន័យថា គ្មានលិខិតអនុញ្ញាតច្បាស់លាស់ យើងនឹងចាប់ឃាត់ ហើយនឹងចងក្រងសំណុំរឿងទៅតាមនីតិវិធីច្បាប់ ហើយចំពោះអ្នកដែលជាម្ចាស់ទីតាំងនេះត្រូវទទួលខុសត្រូវនៅចំពោះមុខច្បាប់ហើយ»។
នាយរងខណ្ឌរដ្ឋបាលព្រៃឈើខេត្តសៀមរាប លោក ទា គឹមសុទ្ធ បានមានប្រសាសន៍ថា ការស្តុកឈើដ៏ច្រើនរយម៉ែត្រគូបនោះ មិនទាន់រកឃើញអ្នកទទួលខុសត្រូវទេ ឃើញតែកម្មករតូចតាចដែលនៅយាមឃ្លាំងប៉ុណ្ណោះ។ លោក ទា គឹមសុទ្ធ បានមានប្រសាសន៍ថា លោកជឿថា ការស្តុកឈើនោះមិនមានអាជ្ញាប័ណ្ណស្របច្បាប់ទេ។
ក្រុមកម្មករដែលនៅយាមឃ្លាំងនោះបាននិយាយថា គេពុំបានដឹងថាឈើនោះមានច្បាប់ត្រឹមត្រូវ ឬក៏យ៉ាងណាទេ ដោយគេគ្រាន់តែដឹងថា ឈើទាំងនោះមានស្តុកទុកក្នុងឃ្លាំងជាយូរមកហើយតាំងពីអំឡុងឆ្នាំ២០០៤-២០០៥ មកម្ល៉េះ ដោយទទួលទិញពីរថយន្តកាមរីដឹកឈើតូចៗដើម្បីទុកធ្វើទ្វារនៅតាមសំណង់របស់ក្រុមហ៊ុនកាណាឌីយ៉ា។
មន្ត្រីអធិការដ្ឋានរដ្ឋបាលព្រៃឈើខាងជើងបឹងទន្លេសាប បានឲ្យដឹងថា ចាប់តាំងពីថ្ងៃទី១៦ ខែមីនា រហូតមកដល់ថ្ងៃទី៥ ខែមេសា គេបានឆែកឆេរឃ្លាំងចំនួន ៥កន្លែងនៅខេត្តសៀមរាប ដែលសុទ្ធតែជារបស់លោកឧកញ៉ា ហើយនិងប្រមូលវត្ថុតាងផ្សេងៗទៀតមកពីខេត្តឧត្តរមានជ័យ ដោយរកឃើញឈើស្តុកទុកតាមឃ្លាំងទាំងចាស់ទាំងថ្មីប្រមាណ ១.១០០ម៉ែត្រគូប។
ចំពោះឈើប្រមាណ ១.១០០ម៉ែត្រគូបដែលបានឆែកឆេរឃើញនោះ រហូតមកដល់ពេលនេះមិនទាន់មានម្ចាស់ឈើទាំងអស់នោះ បានចេញមុខយកឯកសារ ឬអាជ្ញាប័ណ្ណស្របច្បាប់មកបង្ហាញសមត្ថកិច្ចនៅឡើយទេ៕