អាជ្ញាធររាជធានីភ្នំពេញបានកំណត់ពេលវេលាដល់ម្ចាស់ឱសថស្ថានទាំងអស់ក្នុងរយៈពេលមួយសប្តាហ៍ដែលរាប់ពីថ្ងៃច័ន្ទ ទី២២ កុម្ភៈនេះទៅ ធ្វើយ៉ាងណាឲ្យម្ចាស់ឱសថស្ថានដែលពុំមានអាជ្ញាប័ណ្ណប្រញាប់បំពេញទម្រង់បែបបទដើម្បីសុំអាជ្ញាប័ណ្ណ ប្រសិនបើមិនដូច្នេះទេ ពួកគេនឹងត្រូវបិទមិនឲ្យដំណើរការអាជីវកម្មនេះតទៅទៀតឡើយ។
លោក កែប ជុតិមា អភិបាលរាជធានីភ្នំពេញ បានហៅម្ចាស់ឱសថស្ថានទាំងអស់ដែលមិនបានបំពេញទម្រង់បែបបទដើម្បីសុំអាជ្ញាប័ណ្ណនោះថា ជាអ្នកដែលមិនគោរពច្បាប់។ លោកថា ឱសថការីទាំងអស់ត្រូវតែបំពេញទម្រង់បែបបទទៅតាមនីតិវិធីច្បាប់ជាមុនសិនមុននឹងដំណើរការលើអាជីវកម្មរបស់ខ្លួន ចៀសវាងបង្កឲ្យមានផលប៉ះពាល់ដល់ពលរដ្ឋ អ្នកទៅរកសេវាព្យាបាលនិងទិញឱសថ។
លោក កែប ជុតិមា មានប្រសាសន៍ដូច្នេះ ៖ «គោលការណ៍រដ្ឋាភិបាល ក្រសួងហើយខេត្តក្រុងទូទាំងប្រទេសគេធ្វើអស់ហើយ នៅតែគ្នាគាត់ប៉ុន្មាននាក់គាត់មិនព្រមស្ដាប់គេសោះ។ រឿងលក់ថ្នាំមិនមែនរឿងលេងសើចឯណា ថ្នាំមានជួយផងវាមានសម្លាប់ផង ហើយយើងអត់មានការត្រួតពិនិត្យត្រឹមត្រូវ។ រឿងហ្នឹងរឿងស្រួលសោះ! គាត់ដឹងដែរ ប៉ុន្តែគាត់រឹង គាត់មិនព្រមធ្វើ។ យើងបានប្រាប់គាត់ជាច្រើនលើកច្រើនសា ប៉ុន្តែខ្ញុំសូមធានាលើកនេះថា សុំឲ្យគាត់យកទៅឲ្យអភិបាលខណ្ឌ។ គេត្រូវឲ្យបង់ហើយ មន្ទីរសុខាភិបាលគេតម្រូវ»។
ប្រធានមន្ទីរសុខាភិបាលរាជធានីភ្នំពេញ លោក សុខ សុគន្ធ មានប្រសាសន៍ដោយសង្កេតឃើញថា ចាប់តាំងពីមានការសហការប្រកាសពីវិធានការនេះមក លោកឃើញមានម្ចាស់ឱសថស្ថានមួយចំនួនបានរូតរះមកបំពេញទម្រង់បែបបទដើម្បីសុំអាជ្ញាប័ណ្ណជាហូរហែមកដែរ។
លោក សុខ សុគន្ធ បានឲ្យដឹងថា ៖ «ចំពោះអ្នកដែលបើកថ្មីនៅតែបើកទ្វារបន្តៗ។ យើងនឹងអនុវត្តកិច្ចការហ្នឹងបន្តទៅទៀត ដើម្បីឲ្យគាត់ចូលតាមផ្លូវច្បាប់ទាំងអស់ ងាយនឹងច្បាប់គ្រប់គ្រង។ យើងនឹងអនុវត្តវិធានការផ្លូវច្បាប់ យើងនឹងបញ្ជូនអ្នកមិនគោរពហ្នឹងទៅតុលាការ។ ប៉ុន្តែបើយើងសង្កេតពីបញ្ហាហ្នឹងទៅ ហាក់ដូចជាគេរត់មកធ្វើច្បាប់ជាបន្តបន្ទាប់ហើយដែរ»។
ទាក់ទងទៅនឹងបញ្ហានេះ ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី មានប្រសាសន៍គាំទ្រចំពោះវិធានការនេះ ប្រសិនបើការអនុវត្តនេះបានប្រកបដោយគុណភាពនិងតម្លាភាពត្រឹមត្រូវពិតប្រាកដនោះ។
លោកវេជ្ជបណ្ឌិត អ៊ូច វុទ្ធី មានប្រសាសន៍ថា ៖ «គាត់ធ្វើត្រូវហើយ បើគាត់ធ្វើបានល្អ បើគាត់ធ្វើមិនបាន គ្នាឯងចេះតែបិទភ្នែកទៅ។ បើធ្វើមិនបានប៉ះពាល់ច្រើន ទី១លក់ថ្នាំឲ្យអ្នកជំងឺផ្ដេសផ្ដាសដោយអត់មានវេជ្ជបញ្ជាពីវេជ្ជបណ្ឌិត ព្រោះសំបុត្រស្នាម ក្រដាសទិញថ្នាំហ្នឹងទាល់តែមានការទទួលខុសត្រូវពីវេជ្ជបណ្ឌិត អាហ្នឹងបានគេអាចកាន់ក្រដាសហ្នឹងទៅទិញថ្នាំបាន។ ភាគច្រើនអ្នកជំងឺខ្មែរយើងគេចេះតៗគ្នា មិនមែនពេទ្យក៏គាត់ប្រាប់ថា ថ្នាំនេះគាត់លេបត្រូវអ៊ីចេះអ៊ីចុះ ដល់ពេលមកពេទ្យហួសពេល ធ្លាយក្រពះក៏មានដែរ ជួនកាលថ្នាំក្លែងក្លាយ»។
តួលេខរបស់មន្រ្តីរាជធានីភ្នំពេញបានឲ្យដឹងថា មានឱសថស្ថានចំនួន៦៤៤កន្លែងនៅក្នុងរាជធានីភ្នំពេញ ដែលក្នុងនោះមាន១១៦កន្លែងមិនបានបំពេញក្រដាសស្នាមដែលចាំបាច់នៅឡើយ៕