មេឃុំដាក់ដាំ លោក ញ៉ែម វ៉ាន់នី បដិសេចថា លោកមិនបានដឹងពីរឿងចាប់ឈើនោះទេ ហើយក៏មិនបានសុំឲ្យជំទប់ទីមួយឃុំសម្របសម្រួលជាមួយសហគមន៍ដើម្បីប្រគល់ឈើឲ្យម្ចាស់ដើមវិញ ដោយសារម្ចាស់ឈើនោះជាកូនអភិបាលខេត្តនោះដែរ។
លោក ញ៉ែម វ៉ាន់នី បដិសេធដូច្នេះ ៖ «អាហ្នឹងគាត់ផ្សាយខុសរបស់គាត់ ខ្ញុំមិនដឹងទេ កាលហ្នុងខ្ញុំផ្ទេរសិទ្ធិទៅឲ្យគាត់ ខ្ញុំមកពីភ្នំពេញ។ លុះត្រាសហគមន៍ចាប់បញ្ជូនមកខ្ញុំ បានខ្ញុំដឹងថា ឈើហ្នឹងជារបស់នរណា»។
កាលពីថ្ងៃអង្គារ ទី២ ខែកុម្ភៈ កន្លងទៅនេះ តំណាងសហគមន៍ភូមិពូលេះឲ្យដឹងថា អ្នកភូមិបានស្ទាក់ចាប់រថយន្តដឹកឈើមួយគ្រឿងក្នុងចំណោមរថយន្តពីរគ្រឿងដែលប៉ុនប៉ងដឹកជញ្ជូនឈើធ្នង់ចេញពីព្រៃ ដើម្បីទៅលក់ឲ្យឈ្មួញវៀតណាមនៅតំបន់ព្រំដែននៅក្នុងតំបន់នោះ។
ចំណែកជំទប់ទីមួយឃុំដាក់ដាំ លោក អើត ប៊ុននី ដែលចូលរួមក្នុងការបង្ក្រាបនោះផ្តល់កិច្ចសម្ភាសន៍ជាមួយវិទ្យុអាស៊ីសេរី កាលពីថ្ងៃព្រហស្បតិ៍ ទី៤ ខែកុម្ភៈ ពីករណីនេះថា ឈើនោះជារបស់កូនប្រសាអភិបាលខេត្តមណ្ឌលគិរី លោក ចាន់ យឿន ហើយមេឃុំបានសុំឲ្យលោកសម្របសម្រួលជាមួយសហគមន៍ឲ្យប្រគល់ឈើនោះទៅឲ្យម្ចាស់ឈើវិញ។
ជំទប់ទីមួយឃុំដាក់ដាំ លោក អើត ប៊ុននី នៅថ្ងៃសៅរ៍ ទី៦ ខែកុម្ភៈ ឆ្នាំ២០១០ បាននិយាយសុំទោសដែលលោកបានផ្តល់ព័ត៌មានខុសទាក់ទិនម្ចាស់ឈើជាកូនប្រសាអភិបាលខេត្ត។ លោកបញ្ជាក់ថា ជាការភ័ន្តច្រឡំដែលអ្នកប្រាប់ពីអត្តសញ្ញាណម្ចាស់ឈើមិនបានត្រឹមត្រូវ ៖ «ខ្ញុំឲ្យសុំទោសដែរ វាជាការភ័ន្តច្រឡំទេការងារនេះ»។
ចំណែកតំណាងសហគមន៍ភូមិពូលេះ លោក បូរ៉េត កាំពី មានប្រសាសន៏ដែរថា អ្នកបើកគោយន្តដឹកឈើប្រាប់ថា ឈើនោះជារបស់គ្រូបង្រៀនឈ្មោះ ទល់ ភន តែឈ្មោះ ទល់ ភន បញ្ជាក់ប្រាប់លោកថា មិនមែនជាឈើរបស់គេទេ ហើយរហូតថ្ងៃនេះសហគមន៍មិនទាន់ប្រាកដថា នរណាជាម្ចាស់ឈើខុសច្បាប់នោះនៅឡើយ។
លោក បូរ៉េត កាំពី បានឲ្យដឹងដូច្នេះ ៖ «សួរគ្រូ ភន គាត់ថា មិនមែនជារបស់គាត់ ដល់សួរទម្លាក់ហ្នឹងប្រាប់ថា ជាឈើគ្រូ ភន»។
មន្ត្រីផ្នែកអង្កេតសមាគមអាដហុក ខេត្តមណ្ឌលគិរី លោក ឆាយ ធី មានប្រសាសន៍ថា លោកកំពុងអង្កេតទៅលើការសង្ស័យសេចក្តីរាយការណ៍ទាក់ទិននឹងជនជាម្ចាស់ឈើទំនងមានភាពមិនប្រក្រតី។ លោកអំពាវនាវឲ្យស្ថាប័នព្រៃឈើបំពេញភារកិច្ចរកជនពាក់ព័ន្ធក្នុងរឿងនេះដើម្បីចាត់វិធានការតាមផ្លូវច្បាប់។
លោក ឆាយ ធី មានប្រសាសន៍ដូច្នេះ ៖ «ក្រោយពីមានការផ្ដល់ព័ត៌មានតាមរយៈប្រព័ន្ធព័ត៌មាននោះ ក្រោយមកមានការកោះប្រជុំរវាងសហគមន៍និងអាជ្ញាធរមូលដ្ឋាន។ យើងគិតថា ប្រហែលជាពួកគាត់រងបញ្ហាអ្វីមួយហើយ»។
នាយផ្នែកនៃខណ្ឌរដ្ឋបាលព្រៃឈើដាក់ដាំ លោក ព្រី យ៉ា មានប្រសាសន៍បញ្ជាក់ថា លោកមិនបានទទួលសេចក្តីរាយការណ៍ណាមួយទាក់ទិននឹងជនពាក់ព័ន្ធក្នុងការដឹកជញ្ជូនឈើខុសច្បាប់នោះទេ។
លោក ព្រី យ៉ា មានប្រសាសន៍បញ្ជាក់ដូច្នេះ ៖ «ចំពោះបទល្មើសព្រៃឈើសហគមន៍គេចាប់ឲ្យយើងឃើញតែវត្ថុតាងគាត់យកប៉ុណ្ណឹងមក ការស្រាវជ្រាវឯទៀតអាហ្នឹងមានសមត្ថកិច្ចគេផ្សេងទៀត»។
កាលពីថ្ងៃសុក្រ ទី៦ ខែកុម្ភៈ ឆ្នាំ២០១០ ក្រុមមន្ត្រីជំនាញផ្នែករដ្ឋបាលព្រៃឈើដាក់ដាំ បានចុះទៅដកហូតឈើដែលអ្នកភូមិរឹបអូសនោះ ដើម្បីយកមករក្សាទុកនៅខណ្ឌរដ្ឋបាលព្រៃឈើ ខេត្តមណ្ឌលគិរីរួចរាល់ហើយ៕