របាយការណ៍មួយរបស់គណបក្ស សម រង្ស៊ី បានបង្ហាញថា ប៉ូលិសបានគំរាមកំហែង ប្រមាថក្រុមតំណាងរាស្ត្រ និងបណ្ដេញក្រុមតំណាងរាស្ត្រឲ្យប្រញាប់ចេញពីបង្គោលព្រំដែន និងគំរាមដកហូតម៉ាស៊ីនថត។ របាយការណ៍នេះបានចេញផ្សាយ ក្រោយពីក្រុមអ្នកតំណាងរាស្ត្រមួយក្រុមរបស់គណបក្សប្រឆាំង សម រង្ស៊ី បានវិលត្រឡប់ពីការពិនិត្យមើលបង្គោលព្រំដែនដែលគេបោះរួចហើយ គឺបង្គោលលេខ ៩៣, ៩៤ នៅស្រុកមេមត់ និងលេខ ១១៧ នៅស្រុកពញាក្រែក ខេត្តកំពង់ចាម កាលពីថ្ងៃទី២៧ និងទី២៨ ខែសីហាកន្លងទៅ។
លោក ម៉ៅ មុន្នីវណ្ណ តំណាងរាស្ត្រគណបក្ស សម រង្ស៊ី មានប្រសាសន៍ដូច្នេះ ៖ «នៅតែមានបញ្ហា ពីព្រោះរដ្ឋាភិបាលបានបង្ហាញជំហរថា អ្នកតំណាងរាស្ត្រអាចចុះទៅមើល ទៅពិនិត្យបាន ប៉ុន្តែជាក់ស្ដែងឃើញថា ប៉ូលិសដែលនៅមូលដ្ឋានតែងតែបង្កបញ្ហា ឃាត់ឃាំង និងគំរាមដកហូតម៉ាស៊ីនថតជាដើម»។
លោក ម៉ៅ មុន្នីវណ្ណ មិនធ្វើអត្ថាធិប្បាយអំពីការបោះបង្គោលព្រំដែននោះថា តើការបោះបង្គោលត្រឹមត្រូវ ឫក៏មិនត្រឹមត្រូវទេ ប៉ុន្តែលោកថា ការចុះមើលស្ថានភាពរាស្រ្ត និងពិនិត្យព្រំដែន បានធ្វើឡើងក្រោយពីអ្នកភូមិបានត្អូញថា ពួកគាត់បានបាត់បង់ដីស្រែចម្ការក្រោយពីការបោះបង្គោលនោះរួចមក។
លោកបញ្ជាក់ថា នៅស្រុកមេមត់ ចំណុចបង្គោលលេខ ៩៣ និងលេខ ៩៤ មានអ្នកស្រុកប្រហែល ៣គ្រួសារបានត្អូញពីការបាត់បង់ដីស្រែ ហើយនៅចំណុចបង្គោលលេខ ១១៧ មានអ្នកស្រុកជាច្រើនគ្រួសារបានត្អូញអំពីរឿងបាត់ដីនេះដែរ។
ការត្អូញត្អែររបស់អ្នកតំណាងរាស្ត្រ ត្រូវបានអភិបាលខេត្តកំពង់ចាម លោក ហ៊ុន ណេង បដិសេធ ដោយខឹងសម្បាថា អ្នកតំណាងរាស្ត្រទាំងនោះចេះតែថា។ លោកអះអាងថា អាជ្ញាធរខេត្តកំពង់ចាម មិនដែលហាមប្រាមក្នុងការចុះទៅមើលព្រំដែននោះឡើយ។
លោក ហ៊ុន ណេង មានប្រសាសន៍ដូច្នេះ ៖ «ទី២ ការបោះបង្គោលអ្វីៗ គេបោះទៅតាមផែនទីដែលបានកំណត់នៅក្នុងរដ្ឋធម្មនុញ្ញ ក៏ដូចជាទៅតាមឯកសារដែលបានតម្កល់នៅអង្គការសហប្រជាជាតិចន្លោះឆ្នាំ១៩៦៨ ដល់ ១៩៦៩ អ៊ីចឹងគេធ្វើអ្វីៗមិនឲ្យខុសច្បាប់ទេ។ ខ្មែរណា! ខ្ញុំក៏ខ្មែរដែរ មិនឲ្យអ្នកណាយកដីខ្លួនឯងមួយចំអាមទេ»។
មន្ត្រីជាន់ខ្ពស់ទទួលបន្ទុកបញ្ហាព្រំដែនកម្ពុជា លោក វ៉ា គឹមហុង មិនធ្វើអត្ថាធិប្បាយទាក់ទងនឹងបញ្ហានេះទេ ដោយលោកមិនទាន់បានទទួលព័ត៌មានខាងលើនោះនៅឡើយ។
ឯកសាររបស់វៀតណាមដែលវិទ្យុអាស៊ីសេរីទទួលបាន បានឲ្យដឹងថា ការបោះបង្គោលព្រំដែនខ្មែរ-វៀតណាម បានធ្វើឡើងកាលពីឆ្នាំ២០០៦ កន្លងមក ហើយគេគ្រោងថា នឹងបញ្ចប់ការបោះបង្គោលនោះនៅឆ្នាំ២០១២ ខាងមុខនេះ ដែលបច្ចុប្បន្ននេះ គេបោះបានចំនួន ២ ភាគ ៣ គឺស្មើនឹង ១៦២បង្គោលហើយ នៃបង្គោលសរុបចំនួន ៣៧៥។
ចាប់តាំងពីមានការបោះបង្គោលនោះមក វិវាទជាច្រើនបានកើតឡើងនៅក្នុងសង្គមខ្មែរ។ កសិករខ្មែរតែងតែត្អូញថា ពួកគាត់ត្រូវបានបាត់បង់អស់ដីធ្លី ភូមិ និងស្រែចម្ការ ហើយថ្មីៗកន្លងទៅនេះ មេដឹកនាំគណបក្សប្រឆាំង លោក សម រង្ស៊ី ក៏ត្រូវបានតុលាការខេត្តស្វាយរៀង ផ្ដន្ទាទោសដាក់ពន្ធនាគារ ក្រោយពីលោកបានដកបង្គោលតម្រុយព្រំដែនលេខ ១៨៥ បោះចោល គ្រាដែលកសិករខ្មែរបានត្អូញអំពីការលំបាក ដោយសារតែបង្គោលតម្រុយនោះបានបោះលើដីស្រែរបស់ពួកគាត់៕