លោក ឃឹម សម្បូរណ៍ អាយុ៤៧ឆ្នាំ និងកូនប្រុសរបស់គាត់អាយុ២១ឆ្នាំ ឈ្មោះ ខាត់ សារិន្ទភាតា ត្រូវជនមិនស្គាល់មុខ ២នាក់ ជិះម៉ូតូបាញ់ពីក្រោយចំនួន៥គ្រាប់ នៅជិតស្តាតអូឡាំពិក ពេលដែលជនរងគ្រោះទាំង២ កំពុងជិះម៉ូតូត្រឡប់មកពីហាត់ប្រាណ ។
អ្នកកាសែតមនសិការខ្មែរ ដែលជាឪពុកត្រូវឃាតករបាញ់ត្រូវ ២គ្រាប់ និងកូនប្រុសរបស់គាត់ ត្រូវមួយគ្រាប់ ហើយបានទទួលមរណភាពជាបន្តបន្ទាប់ ។ ឃាតករបានបើកម៉ូតូរត់គេចដោយគ្មានអ្នកណាបានស្គាល់មុខឡើយ ។
អភិបាលខណ្ឌ ៧មករា លោក ស្រ៊ុន ស្រ៊ន់ បានមានប្រសាសន៍កាលពីព្រឹកថ្ងៃសៅរ៍ នៅទីតម្កល់សពអ្នកទាំង២ ឯបរិវេណវត្តស្វាយដង្គំ រាជធានីភ្នំពេញថា គេមិនទាន់បានចាប់ខ្លួនជនសង្ស័យនោះនៅឡើយទេ ៖ «ករណីដែលកើតហេតុនេះ គឺយើងដឹងថា មានការបាញ់ អ៊ីចឹង កម្លាំងយើងក៏បានទៅដល់ភ្លាម ហើយយើងកំពុងតែស្រាវជ្រាវបន្តវែកមុខអ្នកដែលប្រព្រឹត្តហ្នឹង ។ យើងមិនទាន់ធ្វើការសន្និដ្ឋានទេ ឥឡូវយើងកំពុងតែមមាញឹកក្នុងការស្រាវជ្រាវបញ្ហាហ្នឹង» ។
នេះជាករណីលើកទីមួយហើយ ដែលមានការបាញ់សម្លាប់អ្នកសែតគាំទ្រគណបក្សប្រឆាំងនៅក្នុងពេលដែលក្រុមគណបក្សនយោបាយកម្ពុជា កំពុងតែធ្វើយុទ្ធនាការឃោសនាបោះឆ្នោតនៅទូទាំងប្រទេសកម្ពុជា ។
និពន្ធនាយកកាសែតមនសិការខ្មែរ លោក ដាំ សិទ្ធិ បានថ្លែងថា លោកក៏មិនដឹងថាតើមូលហេតុដែលជាប់ទាក់ទងនឹងការបាញ់សម្លាប់អាចមកពីអ្វីនោះដែរ ។
លោក ដាំ សិទ្ធិ ដែលមិនហ៊ានចេញពីផ្ទះក្រោយការទើបនឹងត្រូវបានធានាឲ្យនៅក្រៅពន្ធនាគារ បានថ្លែងថា អ្នកកាសែតលោក ឃឹម សម្បូរណ៍ គឺជាអ្នកកាសែតដែលចូលចិត្តសរសេរអំពីអត្ថបទទាក់ទងនឹងសង្គម ហើយអត្ថបទថ្មីៗចុងក្រោយរបស់លោក គឺបានសរសេរអំពីរឿងដែលបានជាប់ទាក់ទងនឹងបញ្ហាព្រះវិហារខ្មែរ ។
លោក ដាំ សិទ្ធិ បានថ្លែងថា បញ្ហាព្រួយបារម្ភនឹងកត្តាសន្តិសុខ បានញ៉ាំងឲ្យរូបលោកត្រូវបង្ខំចិត្ត មិនហ៊ានចាកចេញពីផ្ទះសោះឡើយ ជាពិសេសចាប់តាំងពីរូបលោកមានរឿងក្តីក្តាំជាមួយលោកឧបនាយករដ្ឋមន្ត្រី ហោ ណាំហុង ដោយសារតែការសរសេររឿងទាក់ទងនឹងប្រសាសន៍ លោក សម រង្ស៊ី រិះគន់លោកឧបនាយករដ្ឋមន្ត្រី ហោ ណាំហុង អំពីរឿងជាប់ពាក់ព័ន្ធនឹងខ្មែរក្រហមនោះមក ។
កាលពីព្រឹកថ្ងៃសៅរ៍ លោករដ្ឋមន្ត្រីក្រសួងព័ត៌មានខៀវ កាញារីទ្ធ បានអញ្ជើញទៅចូលរួមក្នុងពិធីតម្កល់សពជនរងគ្រោះ ហើយបានមានប្រសាសន៍សម្តែងភាពក្រៀមក្រំ ៖ «ក្រសួងព័ត៌មានក្នុងនាមរាជរដ្ឋាភិបាល បានចេញសេចក្ដីថ្លែងការណ៍មួយ ថ្កោលទោសការសម្លាប់នេះ ហើយយើងសុំឲ្យអាជ្ញាធររកមុខឃាតករឲ្យឃើញ» ។
ម៉ាយ៉ារិទ្ធិ ៖ តើជនសង្ស័យ ដែលធ្វើការសន្និដ្ឋានដំបូង អាចជាអ្នកណាដែរ? ខៀវ កាញារីទ្ធ ៖ ខ្ញុំអត់ដឹងដែរ ព្រោះយប់មិញ ខ្ញុំនៅកំពង់ចាម ។ ខ្ញុំទើបមកដល់ ហើយមិនទាន់បានជួបសមត្ថកិច្ចផងទេ ប៉ុន្តែទោះជាអ្នកណាក៏ដោយ ក៏យើងមិនអាចអនុគ្រោះបានទេ របៀបអ៊ីចឹង ជាពិសេស នៅក្នុងស្ថានភាពដែលយើងត្រូវការភាពស្ងប់ស្ងៀម ត្រូវការសណ្ដាប់ធ្នាប់ គឺជាការចាំបាច់ត្រូវរកឃាតករឲ្យឃើញ ។
សូមបញ្ជាក់ថា នាប៉ុន្មានថ្ងៃកន្លងមកនេះ សេចក្តីរាយការណ៍អំពីភិនភាគជនសង្ស័យជិះម៉ូតូវីវ៉ាខ្មៅ ធ្វើសកម្មភាពគំរាមកំហែង បានកើតឡើងចំនួន ២ដងហើយ ។
កាលពីថ្ងៃអាទិត្យ ថ្ងៃទី៦ កក្កដា សកម្មជនគណបក្សសមរង្ស៊ីម្នាក់ ដែលជាអ្នកធ្វើអត្ថាធិប្បាយតាមវិទ្យុក្នុងស្រុក បានអះអាងថា មានមនុស្សប៉ុនប៉ងសម្លាប់រូបលោកក្នុងពេលធ្វើដំណើរតាមថ្នល់សំដៅទៅយកព័ត៌មានក្នុងទីក្បួនដង្ហែឃោសនាបក្សក្នុងរាជធានីភ្នំពេញ ។
អ្នកធ្វើអត្ថាធិប្បាយនៃកម្មវិធីពន្លឺភ្លើងទៀន លោក ម៉ែន បញ្ញា បានថ្លែងថា រឿងហេតុបានកើតកាលពីថ្ងៃអាទិត្យ ក៏បានជាប់ទាក់ទងនឹងរឿងជនមិនស្គាល់មុខជិះម៉ូតូវីវ៉ាពណ៌ខ្មៅ ដកកាំភ្លើងវិះនឹងបាញ់សម្លាប់លោកនាកណ្តាលថ្ងៃត្រង់នោះផងដែរ ប៉ុន្តែដោយសំណាងល្អ លោកបានឲ្យអ្នកបើកម៉ូតូរបស់លោក បើកគេចទាន់ ។
លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានឆ្លើយនៅពេលដែលត្រូវបានសាកសួរថា តើករណីជនសង្ស័យជិះម៉ូតូវីវ៉ាខ្មៅ ដែលបានធ្វើសកម្មភាពនោះ អាចជាក្រុមមនុស្សតែមួយ ជាប់ពាក់ព័ន្ធដែរឬទេ ៖ «ខ្ញុំអាចសន្និដ្ឋានបានទេ ។ ទុកឲ្យអាជ្ញាធរគេអ្នកមានសមត្ថកិច្ចជាអ្នកកំណត់វិញ» ។
មន្ត្រីអាជ្ញាធរខណ្ឌ៧មករា ក៏មិនអាចបញ្ជាក់បានជុំវិញករណីសកម្មភាពជនសង្ស័យជិះម៉ូតូវីវ់ាខ្មៅ ដែលគេបានសង្ស័យទាំង២លើកនោះបានដែរ ។
ក្រុមគ្រួសារជនរងគ្រោះ បានអំពាវនាវសូមឲ្យអាជ្ញាធរ ប្រញាប់តាមចាប់ជនសង្ស័យមកផ្តន្ទាទោស និងបានសម្តែងក្តីសង្ស័យចំពោះការនាំជនរងគ្រោះទៅសង្គ្រោះនៅមន្ទីរពេទ្យ ។
លោកឡូរ៉ង់ ដែលត្រូវជាប្អូនប្រុសអ្នកកាសែតដែលគេបាញ់សម្លាប់ បានមន្ទិលថា ថាតើហេតុអ្វីបានជាមានភាពរើសអើងចំពោះការទទួលបងប្រុសរបស់ខ្លួនពេលបញ្ជូនទៅព្យាបាលនៅមន្ទីរពេទ្យ ៖ «ខ្ញុំគ្រាន់តែប្លែកបន្តិច ពេលដែលបងប្រុសខ្ញុំនិងក្មួយខ្ញុំ ត្រូវគ្រាប់ហើយ គេយកទៅពេទ្យ ពីពេទ្យមួយទៅពេទ្យមួយទៀត ខ្ញុំវានៅឆ្ងាយនៅកោះកុងឯណោះ អ៊ីចឹង ខ្ញុំមិនអាចមកទាន់យកវាទៅពេទ្យបាន ហើយគេប្រាប់ថា ពេទ្យណាក៏មិនអាចទៅបានដែរ មានតែទៅពេទ្យកាល់ម៉ែត ហើយខ្ញុំដឹងថា បងប្រុសរបស់ខ្ញុំនៅពេលហ្នុងគាត់លាចាកលោកទៅហើយ» ។
ការបាញ់សម្លាប់អ្នកសារព័ត៌មានក្នុងស្រុកក្នុងកាលៈទេសៈ ដែលមានស្ថានការណ៍រៀបចំការបោះឆ្នោត បានញ៉ាំងឲ្យមានការថ្កោលទោសពីក្រុមសិទ្ធិមនុស្សនិងក្រុមសមាគមអ្នកកាសែត ។
ប្រធានសមាគមអ្នកសារព័ត៌មាន លោក ឱម ច័ន្ទតារា បានមានប្រសាសន៍សុំឲ្យអាជ្ញាធរតាមចាប់ជនសង្ស័យដើម្បីយកមកផ្តន្ទាទោសតាមច្បាប់ ៖ «វាជាការគំរាមកំហែងមួយដែលយើងមិនអាចទទួលយកបានទេ ហើយក្នុងនាមខ្ញុំជាអ្នកកាសែតម្នាក់ ក៏ដូចជាប្រធានសមាគមអ្នកកាសែត ហើយតំណាងឲ្យអ្នកកាសែត ខ្ញុំសូមអំពាវនាវដល់អាជ្ញាធរគ្រប់ជាន់ថ្នាក់មេត្តា វែកមុខឲ្យឃើញចំពោះជនឧក្រិដ្ឋដែលបាញ់សម្លាប់លោក ឃឹម សម្បូរណ៍ ហើយមិនមែនតែលោក ឃឹម សម្បូរណ៍ទេ គឺប្រជាពលរដ្ឋណាក៏ដោយ ឲ្យតែទទួលការបាញ់សម្លាប់ដោយល្មើសច្បាប់» ៕