អាជ្ញាធរខេត្តស្ទឹងត្រែងចាប់ពលរដ្ឋដែលព្យាយាមគ្រប់គ្រងអតីតដីពួកគាត់

ប្រជាពលរដ្ឋយ៉ាងតិច១៣នាក់ ត្រូវបានក្រុមសមត្ថកិច្ចចម្រុះខេត្តស្ទឹងត្រែង ចាប់ខ្លួនកាលពីរសៀលថ្ងៃទី១០ ខែកក្កដា ឆ្នាំ២០១២ ដោយសារតែប្រជាពលរដ្ឋទាំងនោះព្យាយាមបោះបង្គោលលើអតីតដីរបស់ពួកគាត់ ដែលរដ្ឋបានដកហូតដើម្បីសុំឲ្យក្រុមនិស្សិតស្ម័គ្រចិត្តរបស់រាជរដ្ឋាភិបាលវាស់វែងចេញប័ណ្ណកម្មសិទ្ធិជូនពួកគាត់។

ដោយ រដ្ឋា វីសាល
2012-07-11

h071112sr.mp3

សាក្សីដែលបានរត់រួចពីការចាប់ខ្លួនឈ្មោះ ប្រាក់ សូផាត នៅថ្ងៃពុធទី១១ ខែកក្កដា ឆ្នាំ២០១២ មានប្រសាសន៍ឲ្យដឹងថា កងកម្លាំងរាជអាវុធហត្ថ និងនគរបាលជាង ៥០នាក់ ត្រូវបានបញ្ជូនមកកាន់ទីដែលប្រជាពលរដ្ឋរាប់រយគ្រួសារ បាននាំគ្នាចូលមកធ្វើរបងលើអតីតដីរបស់ពួកគាត់ នៅតាមបណ្តោយផ្លូវជាតិលេខ៧ នៅចម្ងាយប្រមាណ៤គីឡូម៉ែត្រ ពីច្រកទ្វារអន្តរជាតិដុងក្រឡ ក្នុងសង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង ហើយចាប់ខ្លួនប្រជាពលរដ្ឋមានស្ត្រី និងបុរសជាង១០នាក់ ក្នុងនោះមានស្ត្រីម្នាក់ឈ្មោះ មាស សុគន្ធ មានឋានៈជាសមាជិកក្រុមប្រឹក្សាអ្នកច្បាប់នៅទីស្ដីការគណៈរដ្ឋមន្ត្រីនាំមកឃុំទុកនៅបញ្ជាការដ្ឋានកងរាជអាវុធហត្ថខេត្ត។

លោកបន្តថា មូលហេតុដែលប្រជាពលរដ្ឋនាំគ្នាទៅបោះបង្គោលព្រំដីឡើងវិញនោះ គឺដោយសារតែដីពួកគាត់ត្រូវបានអាជ្ញាធរខេត្តដកហូត កាលពីឆ្នាំ២០០៧ ប្រគល់ទៅឲ្យក្រុមហ៊ុនសម្បទានមួយឈ្មោះ បូណារីតា ហើយបន្ទាប់ពីរាជរដ្ឋាភិបាលប្រកាសពីគោលនយោបាយចែកដី ដែលរដ្ឋបានដកហូតជូនប្រជាពលរដ្ឋវិញ ទើបប្រជាពលរដ្ឋនាំគ្នាទៅបោះបង្គោលព្រំដីដើម្បីសុំឲ្យក្រុមនិស្សិតចុះវាស់វែងចេញប័ណ្ណកម្មសិទ្ធិជូនពួកគាត់៖ «ខ្ញុំកំពុងកាន់ម៉ាស៊ីនកាត់ស្មៅហ្នឹង ដល់ពេលនេះ គេចាប់យើងតែម្តង តែខ្ញុំរត់រួច ខ្ញុំរត់ចូលព្រៃ។ ព្រោះកាលនោះ ក្រុមហ៊ុនដកយកពីយើងម្ចាស់ហ្នឹង ឈ្មោះ ពន្លឺ ក្មួយ ឡូយ សូផាត។ ឮសម្ដេចគាត់និយាយថា ចែកឲ្យប្រជាពលរដ្ឋវិញ ក៏ខ្ញុំទៅធ្វើ គេចាប់ពួកខ្ញុំតែម្តង»។

ដីនៅតាមបណ្តោយផ្លូវជាតិលេខ៧ ពីក្រុងស្ទឹងត្រែង ទៅដល់ព្រំដែនប្រទេសឡាវ ចាប់ពីឆ្នាំ២០០៥ រហូតមក ប្រជាពលរដ្ឋរាប់រយគ្រួសារបានចូលទៅកាប់រានព្រៃឈើយកដីជាកម្មសិទ្ធិ ហើយខ្លះទៀតបានទិញលក់ដីនោះបន្តគ្នា ដោយមានមន្ត្រីអាជ្ញាធរភូមិ ឃុំ ស្រុក ចុះហត្ថលេខាលើឯកសារផ្ទេរសិទ្ធិកាន់កាប់ដីនោះ។ ក៏ប៉ុន្តែនៅឆ្នាំ២០០៧ អាជ្ញាធរខេត្តបានដកហូតដីនោះទុកជាសម្បត្តិរដ្ឋ ក្រោមគោលនយោបាយដកហូតដីដែលបានពីការកាប់រានព្រៃឈើខុសច្បាប់។

វិទ្យុអាស៊ីសេរី នៅថ្ងៃពុធ ទី១១ ខែកក្កដា នេះ មិនអាចទាក់ទងអភិបាលក្រុងស្ទឹងត្រែង និងអភិបាលខេត្តស្ទឹងត្រែង ដើម្បីអធិប្បាយជុំវិញការចាប់ខ្លួនប្រជាពលរដ្ឋនោះទេ។

យ៉ាងនេះក្តី អភិបាលរងក្រុងស្ទឹងត្រែង លោក កៅ ធៀម ទទួលស្គាល់ថា កងកម្លាំងនៃអាជ្ញាធរខេត្ត មានគម្រោងចុះបង្ក្រាបប្រជាពលរដ្ឋ ដែលផ្អើលនាំគ្នាទៅចាប់ដីនោះមែន ក៏ប៉ុន្តែលោកបដិសេធថាមិនបានដឹងលម្អិតពីករណីនេះទេ៖ «ខ្ញុំឮ ខ្ញុំដឹងថា ពីម្សិល ខាងប៉ូលិសមានប៉េអិម គ្រោងចុះទៅពិនិត្យដី ដែលប្រជាពលរដ្ឋគាត់ផ្អើលចាប់ដីហ្នឹងណា! ក្រុមការងាររបស់ខេត្ត រឿងថាយ៉ាងម៉េចៗ ខ្ញុំអត់ដឹងផង ព្រោះខ្ញុំអត់បានចុះទៅ ខ្ញុំជាប់ប្រជុំនៅខេត្ត»។

បុគ្គលិកផ្នែកអង្កេតសមាគមការពារសិទ្ធិមនុស្ស អាដហុក ខេត្តស្ទឹងត្រែង លោក ហូ សំអុល ឲ្យដឹងថា រហូតមកទល់នឹងថ្ងៃទី១១ ខែកក្កដា នេះ អាជ្ញាធរខេត្តបានបន្តឃុំខ្លួនមនុស្ស៥នាក់ ក្នុងនោះមានលោកស្រី មាស សុគន្ធ និងស្វាមី។ ក្រៅពីនោះ ប្រជាពលរដ្ឋផ្សេងទៀតត្រូវបានដោះលែងវិញហើយ។

លោកបន្តថា តាមការអង្កេតរបស់លោកឃើញថា អ្នកដែលត្រូវចាប់ខ្លួន សុទ្ធសឹងជាអតីតម្ចាស់ដីដែលអាជ្ញាធរខេត្តបានដកហូតកាលពីប៉ុន្មានឆ្នាំកន្លងទៅនេះ ហើយប្រគល់ដីទៅឲ្យក្រុមហ៊ុនសម្បទាន៖ «ក្រោយពីឮសម្ដេចនិយាយអញ្ចឹងមក ប្រជាពលរដ្ឋមួយចំនួនគាត់បោះបង់ដីចោលយូរហើយ អញ្ចឹងគាត់ចាប់ផ្ដើមទៅធ្វើ។ តាមព័ត៌មានឮមក ថ្ងៃដែលចុះទៅខាងដុងក្រឡ ដីដែលមានទំនាស់ហ្នឹង តាមមតិប្រជាពលរដ្ឋដែលគាត់អះអាងមកថា ប្រហែលជាមានការលំអៀងថាខាងក្រុមនិស្សិតហ្នឹង ដូចជាកាន់ជើងក្រុមហ៊ុន បូណារីតា ទៅជិះឡាន ជិះអី»។

រាជរដ្ឋាភិបាលកាលពីពេលថ្មីៗនេះ បានសម្រេចឲ្យក្រុមនិស្សិតស្ម័គ្រចិត្តចុះវាស់វែងដីប្រជាពលរដ្ឋ ដើម្បីចុះបញ្ជីកម្មសិទ្ធិដីធ្លីជូនប្រជាពលរដ្ឋតាមគោលការណ៍បីចំណុច រួមមាន ទីមួយ ដីនៅក្នុងតំបន់ព្រៃសម្បទាន។ ទីពីរ ដីនៅក្នុងតំបន់ដីសម្បទានសេដ្ឋកិច្ច និងទីបី ដីតំបន់គ្រប់គ្រងដោយក្រសួងបរិស្ថាន និងក្នុងដីរដ្ឋដែលមានដីកាដកហូតពីអាជ្ញាធររាជធានី-ខេត្ត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។