មន្ត្រីជំនាញ បានឲ្យដឹងថា ព្យុះណុកថិន (NOCK-TEN) បច្ចុប្បន្នកំពុងមានសកម្មភាពនៅក្នុងសមុទ្រចិន និងមានឥទ្ធិពលមិនអន់ជាងព្យុះកេតសាណា ដែលមានឥទ្ធិពលមកលើប្រទេសកម្ពុជា កាលពីចុងខែកញ្ញា ឆ្នាំ២០០៩ នោះទេ។
ក្រសួងធនធានទឹក និងឧតុនិយម កាលពីថ្ងៃទី២៨ ខែកក្កដា បានជូនដំណឹងថា ព្យុះឈ្មោះ ណុកថិន ដែលកើតមាននៅមហាសមុទ្រប៉ាស៊ីហ្វិក កាលពីម៉ោង ១អធ្រាត្រថ្ងៃទី២៧ ខែកក្កដា បានធ្វើដំណើរឆ្លងកាត់ប្រទេសហ្វីលីពីន ឆ្ពោះទៅភាគពាយ័ព្យ ហើយបច្ចុប្បន្នកំពុងស្ថិតក្នុងសមុទ្រចិនខាងត្បូង ត្រង់ចំណុចខ្សែស្របទី១១៦ អង្សា៣ នៃរយៈបណ្ដោយខាងកើត និងខ្សែវ័ណ្ឌទី១៨ អង្សា១ នៃរយៈទទឹងខាងជើង។
មន្ត្រីជំនាញក្រសួងធនធានទឹកបានឲ្យដឹងថា ព្យុះណុកថិន នឹងធ្វើដំណើរឆ្លងកាត់កោះហៃណាំ ឆ្ពោះមកកាន់ប្រទេសវៀតណាម និងប្រទេសឡាវ ភាគខាងជើង ក្នុងល្បឿន ២៧គីឡូម៉ែត្រក្នុង ១ម៉ោង។ ហើយថា ព្យុះនេះនឹងមានឥទ្ធិពលមកលើប្រទេសកម្ពុជា និងអាងទន្លេមេគង្គលើ នៅថ្ងៃសៅរ៍ ទី៣០ ខែកក្កដា ដល់ថ្ងៃអង្គារ ទី២ ខែសីហា ឆ្នាំ២០១១។
លោក លឹម គានហោ រដ្ឋមន្ត្រីក្រសួងធនធានទឹក បានឲ្យដឹងថា ឥទ្ធិពលព្យុះណុកថិន នឹងមានឥទ្ធិពលនៅតំបន់ខ្ពង់រាបភាគខាងជើង និងខ្ពង់រាបភាគឦសាននៃប្រទេសកម្ពុជា ដោយបង្កឲ្យមានភ្លៀងធ្លាក់ច្រើន មានខ្យល់ព្យុះ និងអាចបង្កឲ្យមានជំនន់ទឹកភ្លៀងនៅខេត្តឧត្តរមានជ័យ ស្ទឹងត្រែង ក្រចេះ ព្រះវិហារ ខេត្តមណ្ឌលគិរី និងរតនគិរី។ ក្រៅពីនេះ នៅតំបន់វាលទំនាបកណ្ដាលខ្យល់ក៏មានល្បឿនបក់បោកខ្លាំង និងអាចបង្កឲ្យមានជំនន់ទឹកភ្លៀងនៅខេត្តសៀមរាប បន្ទាយមានជ័យ កំពង់ចាម និងខេត្តកំពង់ធំ។
រីឯតំបន់មាត់សមុទ្រក៏មានភ្លៀងច្រើន ល្បឿនខ្យល់ខ្លាំង និងអាចបង្កឲ្យមានជំនន់ទឹកភ្លៀងនៅខេត្តព្រះសីហនុ កោះកុង កំពត និងខេត្តកែប ព្រមទាំងនៅតាមផ្លូវជាតិលេខ៤។ ឥទ្ធិពលនៃព្យុះនេះក៏នឹងធ្វើឲ្យកម្ពស់ទឹកទន្លេមេគង្គជន់ឡើងផងដែរ។
លោក កាំង វិចិត្រ ពលរដ្ឋរស់នៅខេត្តព្រះសីហនុ បានឲ្យដឹងថា រយៈពេល១សប្ដាហ៍មកនេះ ខេត្តព្រះសីហនុ មានភ្លៀង និងខ្យល់បោកបក់មកខ្លាំងជាបន្ត និងបាននាំឲ្យផ្ទះពលរដ្ឋមួយចំនួនដួលរលំ និងបានបណ្ដាលឲ្យរងរបួសដល់មនុស្ស។ ប៉ុន្តែលោកថា ឥទ្ធិពលនៃខ្យល់ព្យុះឈ្មោះណុកថិន ដែលនឹងមកដល់កម្ពុជា នៅថ្ងៃទី៣០ ខែកក្កដា រូបលោកនឹងផ្សព្វផ្សាយបន្តឲ្យពលរដ្ឋក្នុងមូលដ្ឋានបានដឹង ពិសេសអាជីវករ និងពលរដ្ឋរស់នៅតាមមាត់សមុទ្រឲ្យប្រុងជើងការទុកជាមុន។
ដោយឡែក អ្នកស្រី រ័ត្ន តានា ពលរដ្ឋមានលំនៅឋាននៅខេត្តក្រចេះ ក៏បានឲ្យដឹងដែរថា ក្នុងប៉ុន្មានថ្ងៃមកនេះ មានភ្លៀងធ្លាក់ខ្លាំង និងនៅព្រឹកថ្ងៃសុក្រ ទី២៩ ខែកក្កដា ភ្លៀង និងខ្យល់បោកបក់នៅបន្តកើតមាន ប៉ុន្តែមិនមានព្យុះខ្លាំងនាំឲ្យប៉ះពាល់ដល់អាយុជីវិត ឬក៏បំផ្លាញផ្ទះសម្បែងពលរដ្ឋក្នុងមូលដ្ឋាននោះទេ។
យ៉ាងណាក៏ដោយ លោក លឹម គានហោ រដ្ឋមន្ត្រីក្រសួងធនធានទឹក បានអំពាវនាវឲ្យអាជ្ញាធរដែនដី និងប្រជាពលរដ្ឋរស់នៅតាមដងទន្លេមេគង្គ និងតាមបណ្ដាខេត្តដូចបានជម្រាបជូន ត្រូវបង្កើនការប្រុងប្រយ័ត្ន ដើម្បីចៀសវាងគ្រោះថ្នាក់ដែលអាចកើតមានជាយថាហេតុ។
មន្ត្រីជំនាញក្រសួងធនធានទឹកបានឲ្យដឹងថា កាលពីខែតុលា ឆ្នាំ២០១០ ព្យុះទឹកភ្លៀងបានជន់លិចខេត្តក្រុងចំនួន ១៣ ក្នុងប្រទេសកម្ពុជា និងបង្កឲ្យមានមនុស្សស្លាប់។ ជំនន់ទឹកភ្លៀងនេះក៏បានបង្កការលិចលង់ផ្លូវថ្នល់ លំនៅឋានពលរដ្ឋ សាលារៀន រលំផ្ទះពលរដ្ឋអស់ជាច្រើនខ្នង និងបានបំផ្លាញសន្ទូងស្រូវពលរដ្ឋអស់រាប់ពាន់ហិកតារ។
ឥទ្ធិពលព្យុះនេះដែរ កាលពីឆ្នាំ២០០៩ ព្យុះឈ្មោះកេតសាណា ក៏បានបោកបក់មកលើប្រទេសកម្ពុជា នាំឲ្យខូចខាតទ្រព្យសម្បត្តិពលរដ្ឋ គិតជាទឹកប្រាក់អស់ជាង ១០០លានដុល្លារអាមេរិក ព្រមទាំងបណ្ដាលឲ្យបាត់បង់ជីវិតមនុស្សអស់ជាច្រើននាក់៕