តុលាការនឹងកោះហៅអ្នកស្រី មាស សុគន្ធ និងលោក គុជ ទ្រីសុវណ្ណ ឲ្យចូលខ្លួនទៅក្នុងសវនាការនៅពេលដ៏ខ្លីខាងមុខ។
ប្រធានតុលាការសាលាដំបូងខេត្តស្ទឹងត្រែង លោក អៀង គីមថុល នៅថ្ងៃទី៣១ សីហា មានប្រសាសន៍ថា តុលាការខេត្តស្ទឹងត្រែង បានសម្រេចដោះលែងអ្នកស្រី មាស សុគន្ធ និងស្វាមីឲ្យនៅក្រៅឃុំជាបណ្ដោះអាសន្ន។
លោកបន្តថា អ្នកស្រី មាស សុគន្ធ និងស្វាមីដែលជាប់ចោទពីបទបានសម្លុតគម្រាម និងជ្រៀតជ្រែកកិច្ចការមន្ត្រីរាជការសាធារណៈនោះ នឹងត្រូវចូលខ្លួនមកកាន់តុលាការសាជាថ្មីម្តងទៀត តាមការកោះហៅរបស់តុលាការ នៅពេលឆាប់ៗខាងមុខនេះ។
លោក អៀង គីមថុល បញ្ជាក់ថា ការឲ្យសម្រេចឲ្យជនសង្ស័យនៅក្រៅឃុំរបស់តុលាការ មិនស្ថិតក្រោមឥទ្ធិពលរបស់ភាគីណាមួយឡើយ តែជាឆន្ទានុសិទ្ធិរបស់តុលាការខេត្តស្ទឹងត្រែង។
វិទ្យុអាស៊ីសេរី មិនអាចទាក់ទងអ្នកស្រី មាស សុគន្ធ និងស្វាមី ព្រមទាំងមេធាវីរបស់អ្នកទាំងពីរបានទេ នៅថ្ងៃទី៣១ សីហា ឆ្នាំ២០១២។
យ៉ាងណាក៏ដោយ មេធាវីការពារក្ដីឲ្យអ្នកស្រី មាស សុគន្ធ និងស្វាមី គឺលោក គា ឆាយ ធ្លាប់មានប្រសាសន៍ប្រាប់វិទ្យុអាស៊ីសេរី ថា សេចក្ដីសម្រេចចោទប្រកាន់មកលើកូនក្តីរបស់លោកពីស្ថាប័នអយ្យការ គឺមិនមានធាតុផ្សំគ្រប់គ្រាន់ ហើយបទចោទប្រកាន់ទៀតសោត ក៏មិនស្របទៅនឹងអង្គហេតុនៃរឿងដែលបានកើតឡើងនោះទេ។
លោក គា ឆាយ៖ «ពាក់ព័ន្ធទៅនឹងការចោទប្រកាន់ពីបទជ្រៀតជ្រែកការងារមន្ត្រីសាធារណៈ ដូចវាមិនត្រឹមត្រូវទេ ដោយសារនិស្សិតមិនមែនជាមន្ត្រីរាជការសាធារណៈទេ មិនមែនជាអ្នកដែលទទួលអាណត្តិដោយសារការបោះឆ្នោតអ្វីដែរ។ ព្រោះក្នុងច្បាប់ ទាល់តែជនរងគ្រោះជាមន្ត្រីរាជការសាធារណៈ ឬជាអ្នកទទួលអាណត្តិពីការបោះឆ្នោត ទើបគាត់មានទោស។ គេចោទប្រកាន់គាត់ពីបទបំផុសបំផុលទេដំបូង គេចេញផ្សាយតាមសារព័ត៌មាន បំផុសបំផុលប្រជាពលរដ្ឋ ប៉ុន្តែក្នុងចម្លើយប្រជាពលរដ្ឋទាំងអស់អត់មានថា បានស្គាល់លោកជំទាវនោះទេ ហើយអ្នកខ្លះថា បានស្គាល់ដែរ ប៉ុន្តែមិនមែនមកហ្នឹងតាមបញ្ជារបស់លោកជំទាវដែរ»។
មន្ត្រីអង្កេតសមាគមការពារសិទ្ធិមនុស្សអាដហុក លោក ហូ សំអុល មានប្រសាសន៍ថា ការសម្រេចឲ្យនៅក្រៅឃុំរបស់តុលាការ ជាការធ្វើឡើងតាមនីតិវិធីនៃក្រមព្រហ្មទណ្ឌ។ លោកបន្តថា ការសម្រេចចុងក្រោយ បន្ទាប់ពីតុលាការបើកសវនាការ ទើបអាចបញ្ជាក់ថាអ្នកស្រី មាស សុគន្ធ និងស្វាមី មានទោស ឬគ្មានទោស៖ «គាត់មិនទាន់អាចរួចខ្លួនទេ ពេលបើកសវនាការ ទើបដឹងថាទោសទណ្ឌគាត់មានប៉ុណ្ណា»។
ស្ត្រីមានតួនាទីជាមន្ត្រីក្នុងក្រុមប្រឹក្សាអ្នកច្បាប់ នៃទីស្ដីការគណៈរដ្ឋមន្ត្រី គឺអ្នកស្រី មាស សុគន្ធ និងស្វាមី ត្រូវឃុំខ្លួនបន្ទាប់ពីកងកម្លាំងចម្រុះរបស់អាជ្ញាធរខេត្តប្រដាប់ដោយអាវុធប្រមាណ៥០នាក់ ចុះបង្ខំចាប់ខ្លួនប្រជាពលរដ្ឋស្រីប្រុស១៣នាក់ ដែលចូលកាន់កាប់ដីធ្លីនៅតំបន់ដុមក្រឡ កាលពីថ្ងៃទី១០ កក្កដា។ ប្រជាពលរដ្ឋឲ្យដឹងថា អ្នកស្រី មាស សុគន្ធ និងស្វាមី បានទាស់សម្ដីគ្នាជាមួយក្រុមនិស្សិតចុះវាស់វែងដីធ្លី។
អ្នកតាមដានបញ្ហាសង្គមមើលឃើញថា បន្ទាប់ក្រុមនិស្សិតចុះវាស់វែងដីធ្លី រដ្ឋាភិបាលប្រើប្រាស់តុលាការចាត់ការចំពោះអ្នកជំទាស់នឹងការបំពេញការងាររបស់និស្សិតទាំងនោះ ពីរករណីមកហើយ គឺករណីទី១ អ្នកស្រី មាស សុគន្ធ និងស្វាមី ចំណែកឯករណីទី២ គឺចាប់ខ្លួនអតីតនាយករងរដ្ឋបាលសាលាខេត្តក្រចេះ ក្នុងបទចោទប្រកាន់សម្លុតគម្រាម និងជ្រៀតជ្រែកកិច្ចការមន្ត្រីរាជការសាធារណៈដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។