មន្ត្រីអាជ្ញាធរខេត្តកំពង់ធំ និងតំណាងប្រជាពលរដ្ឋដែលកំពុងតែមានវិវាទដីធ្លីនៅឃុំក្រយា ស្រុកសន្ទុក ខេត្តកំពង់ធំ បានជួបពិភាក្សាគ្នានៅថ្ងៃពុធ ទី២ ធ្នូ ឆ្នាំ២០០៩ ដើម្បីស្វែងរកយន្តការមួយឈានទៅបញ្ចប់ជម្លោះ ។
លោក អ៊ុត សំអន អភិបាលរងខេត្តកំពង់ធំបានមានប្រសាសន៍ ក្រោយពីបានជួបជាមួយតំណាងប្រជាពលរដ្ឋចំនួន ២០នាក់ មកពីតំបន់ទំនាស់ដីធ្លីនៅភូមិបន្ទាយរងៀងថា លោកមានសុទិដ្ឋិនិយមចំពោះដំណោះស្រាយអំពីបញ្ហាជម្លោះនេះ ដោយផ្ដល់ឱកាសឲ្យតំណាងប្រជាពលរដ្ឋទៅពិគ្រោះជាមួយប្រជាពលរដ្ឋដទៃទៀត។
លោក អ៊ុត សំអន បន្តថា ៖ «ដោយយើងទាញហេតុផលផ្លូវច្បាប់ហើយនឹងគោលនយោបាយដោះស្រាយឲ្យគាត់មកកន្លែងថ្មីមក ហើយពួកគាត់ស្តាប់បាន គាត់ទទួលយកបានប៉ុន្តែដោយ សារតែឆន្ទៈប្រជាពលរដ្ឋដែលឲ្យគាត់មក។ និយាយពីសំណូមពរអ៊ីចេះដើម្បីយើងដោះស្រាយបាន គឺគាត់បានសុំពេលពីរថ្ងៃដើម្បីទៅផ្សព្វផ្សាយឲ្យបងប្អូនដឹងហើយនឹងឆ្លើយប្រាប់យើងវិញ»។
អ្នកស្រី ជា ចាន់ថន អាយុ ៤៨ឆ្នាំ តំណាងប្រជាពលរដ្ឋ ដែលបានចូលរួមប្រជុំនោះ បានឲ្យដឹងថា អ្នកស្រីមានសេចក្ដីរីករាយចំពោះការពន្យល់ដែលមានហេតុផលរបស់មន្ត្រីអាជ្ញាធរ ស្តីពីកន្លែងដោះដូរឲ្យទៅនៅកន្លែងថ្មី គឺអ្នកស្រីចង់បានការរស់នៅដោយស្របច្បាប់ដោយអ្នកស្រីបានថ្លែងថា ៖ «មិនចង់រស់នៅដោយឯកោទេ ចង់រស់នៅដូចគេដូចឯងអ៊ីចឹងណា៎!។ ឥឡូវបានមកស្តាប់គាត់ពន្យល់ណែនាំទៅ ក៏មានការស្បាយចិត្តដែរ។ ប៉ុន្តែចាំដកឃ្លាទៅពិភាក្សាជាមួយបងប្អូន អ៊ីចឹងណ៎ា!»។
លោក ចាន់ សុវ៉េត មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្ស អាដហុក (ADHOC) ថ្លែងថា តំណាងគណៈកម្មាធិការប្រព្រឹត្តិកម្មបានថ្លែងថា ជំនួបរវាងអាជ្ញាធរខេត្តកំពង់ធំនិងតំណាងប្រជាពលរដ្ឋ បានប្រព្រឹត្តទៅក្រោមកិច្ចសម្របសម្រួលពីសំណាក់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ដោយមានការចូលរួមឃ្លាំមើលពីអង្គការ ការីតាស និងអង្គការ លីកាដូ ទទួលបានលទ្ធផលវិជ្ជមានដែលអាចឈានទៅដល់ការព្រមព្រៀងគ្នានៅពេលឆាប់ៗខាងមុខនេះ។
លោក ចាន់ សុវ៉េត បញ្ជាក់ថា ៖ «ប្រជាពលរដ្ឋទាមទារនូវលក្ខខណ្ឌ សុំឲ្យមានការបង្កើនដីដែលបានទទួលឧទាហរណ៍ថា អាជ្ញាធរខេត្តបានឲ្យដីសម្បទានសង្គមកិច្ច ២០ម៉ែត្រ គុណ ៤០ម៉ែត្រដីលំនៅឋាន ដីភោគៈមួយហិកតា អ៊ីចឹង! ពួកគាត់សំណូមពរថាអាចបង្កើនសុំឲ្យដីលំនៅឋាននេះឲ្យធំជាងនេះបន្តិច ហើយនឹងដីភោគៈឲ្យបានច្រើនជាងនេះបន្តិច ហើយអាជ្ញាធរគេទទួលយក គេទទួលយក មិនមែនយកទៅដោះស្រាយទេ ទទួលយកទៅពិភាក្សាហើយធ្វើការចរចាឡើងវិញ»។
ទំនាស់រវាងប្រជាពលរដ្ឋនៅភូមិបន្ទាយរងៀង ទាក់ទងទៅនឹងការសម្បទានដីសេដ្ឋកិច្ចទៅឲ្យក្រុមហ៊ុនវៀតណាមឈ្មោះ តាន់ បៀន (Tinh Bien) ដើម្បីអភវឌ្ឍដាំដើមកៅស៊ូ ក្នុងឃុំក្រយា ស្រុកសន្ទុក បានអូសបន្លាយអស់រយៈពេលជាងបីឆ្នាំកន្លងទៅហើយ ដែលកាលពីថ្ងៃទី ១៧ វិច្ឆិកា ឆ្នាំ ២០០៩ អំពើហិង្សាមួយបានកើតឡើងដោយអ្នកស្រុកបានដុតគ្រឿងចក្រក្រុមហ៊ុន តាន់ បៀន អស់មួយចំនួន។ រហូតមកដល់ពេលនេះ ប្រជាពលរដ្ឋ ៨នាក់ហើយត្រូវបានចាប់ខ្លួន៕