សាក្សីបាននិយាយថា រថយន្តច្រើនពាន់គ្រឿងដែលធ្វើដំណើរចេញពីរាជធានីភ្នំពេញបានជាប់បន្តកន្ទុយគ្នាច្រើនគីឡូម៉ែត្រ ដែលប្រការនោះបាននាំឲ្យមានអ្នកឆ្លៀតឱកាសបង្កអំពើពុករលួយនៅក្នុងការដឹកចម្លងរថយន្តតាមស្រឡាង។
អ្នកធ្វើដំណើរចេញពីភ្នំពេញ លោក ភ័ណ សុផល បានឲ្យដឹងថា រថយន្តដែលមិនបានសូកលុយបន្ថែមដល់អ្នកធ្វើការស្រឡាងមិនត្រូវបានគេដឹកចម្លងភ្លាមៗឡើយ បើទោះបីជារថយន្តនោះបានមកដល់មុនគេក៏ដោយ។
លោក ភ័ណ សុផល បានឲ្យដឹងថា ៖ «ការស្ទះចរាចរណ៍នេះគឺផ្លូវជាតិលេខ៥ ក្នុងចំណុចស្រឡាងព្រែកក្ដាមនេះ។ ស្ទះចរាចរណ៍តាំងពីម៉ោង៨ជាងមក ជិតម៉ោង៩ បច្ចុប្បន្នវានៅតែស្ទះដដែលទេ គ្រាន់តែវាមានការធ្វើដំណើរបានខ្លះ បានត្រឹមតែ២០%ទេ... វានៅតែលំបាកដដែលហ្នឹង»។
ម៉ាយ៉ារិទ្ធិ ៖ ឡានរបស់លោកមានមុខធ្វើដំណើរទៅកាន់ខេត្តសៀមរាប តើលោកត្រូវចំណាយប៉ុន្មានទៅដើម្បីឲ្យឡានរបស់លោកចេញទៅរួចនោះ?
ភ័ណ សុផល ៖ ជាធម្មតាខ្ញុំបានទិញសំបុត្រឡានក្នុងតម្លៃ៨៥០០រៀល ប៉ុន្តែនៅក្នុងវិក្កយបត្រគេដាក់តែ៥៧០០រៀលទេ ប៉ុន្តែគេយកខ្ញុំ៨៥០០រៀល ហើយខ្ញុំត្រូវចំណាយផ្សេងទៅលើបុគ្គលិកឆ្មាំអ្នកយាមស្រឡាងនោះ ម្នាក់១ម៉ឺនៗ មកទល់នឹងពេលនេះខ្ញុំចំណាយអស់៤ម៉ឺន ថែមអាហ្នឹងទៀតវាខ្ទង់ជិត៥ម៉ឺនសម្រាប់ឡានមួយ នេះចំពោះខ្ញុំ។ បើគេដទៃទៀតគេនឹងអាចចំណាយលើសខ្ញុំទៅទៀត ព្រោះគេចង់បានប្រញាប់ទៅស្រុកកំណើតគេដែរ។
វិទ្យុអាស៊ីសេរីមិនអាចទាក់ទងតាមទូរស័ព្ទបានក្នុងការរកប្រតិកម្មពីប្រធានស្រឡាងព្រែកក្ដាមបានទេ ដោយសារតែប្រព័ន្ធទូរស័ព្ទមានការលំបាក។
ប៉ុន្តែសាក្សីបានអះអាងថា គេបានកត់ឈ្មោះអ្នកធ្វើការស្រឡាងដើរប្រមូលលុយនិងបានថតរូបជាភស្តុតាងច្រើនសន្លឹកដើម្បីទុកបង្ហាញជាការពិត។
ការកកស្ទះរថយន្តច្រើនពាន់គ្រឿងក្នុងការធ្វើដំណើរនេះត្រូវគេជឿថា ដោយសារតែមានមនុស្សចាកចេញពីភ្នំពេញទៅលេងបងប្អូននៅតាមខេត្តគ្រាដែលប្រជាជនខ្មែរទូទាំងប្រទេសនាំគ្នារៀបចំពិធីបុណ្យភ្ជុំបិណ្ឌដែលនឹងមានរវាងពីថ្ងៃទី២៨ ដល់ទី៣០ ខែកញ្ញានេះ៕