អ្នកស្រី ជា សុខជឿន រស់នៅក្នុងភូមិ២២ ក្នុងតំបន់បឹងកក់នោះ បានថ្លែងឲ្យដឹងថា ការតវ៉ានេះគឺដើម្បីសុំឲ្យប្រមុខដឹកនាំរដ្ឋាភិបាលដែលបានកាត់ដីឲ្យប្រជាពលរដ្ឋនោះ ត្រួតពិនិត្យមើលមន្ត្រីថ្នាក់ក្រោមអនុវត្តផែនការនោះផង ដើម្បីផ្ដល់ភាពយុត្តិធម៌ដល់ប្រជាពលរដ្ឋរងគ្រោះឲ្យបានគ្រប់គ្នា។
រដ្ឋាភិបាលកម្ពុជា បានចេញអនុក្រឹត្យមួយចុះថ្ងៃទី១១ ខែសីហា ឆ្នាំ២០១១ កន្លងមកនេះ ស្ដីពីការប្រែប្រួលក្រឡាផ្ទៃដីតំបន់អភិវឌ្ឍន៍បឹងកក់ ក្នុងនោះរដ្ឋាភិបាលបានកាត់ដីទំហំ ១២,៤៤ហិកតារ ទៅឲ្យប្រជាពលរដ្ឋចំនួនជាង ៧០០គ្រួសារ ដែលនៅសេសសល់ពីការបណ្ដេញចេញ ដើម្បីអភិវឌ្ឍន៍នៅនឹងកន្លែង ហើយផ្ទៃដីទំហំ ១១៤,៤១ហិកតារ ទុកសម្រាប់ក្រុមហ៊ុនស៊ូកាគូអភិវឌ្ឍន៍។
ក្រុមប្រជាពលរដ្ឋបានថ្លែងថា ក្នុងចំណែកផ្ទៃដីដែលរដ្ឋាភិបាលបានកាត់ឲ្យប្រជាពលរដ្ឋនោះ គឺមានមន្ត្រីខិលខូចមួយចំនួនបានកេងបន្លំពីលើប្រជាពលរដ្ឋ។
ក្រុមអ្នកភូមិសុំឲ្យកំណត់ទីតាំងដី ១២,៤៤ហិកតារ និងសុំឲ្យមានការតាមដានក្នុងដំណើរការផ្ដល់ដីឲ្យប្រជាពលរដ្ឋដើម្បីជៀសវាងកុំឲ្យខូចកិត្តិយសថ្នាក់ដឹកនាំរដ្ឋាភិបាល ដែលបានផ្ដល់ដីឲ្យប្រជាពលរដ្ឋនោះ។
លោក សុខ ពេញវុធ អភិបាលរងខណ្ឌដូនពេញ បានថ្លែងប្រាប់ប្រជាពលរដ្ឋនៅពេលដែលតវ៉ានោះ ដោយសុំឲ្យប្រជាពលរដ្ឋធ្វើលិខិតទៅកាន់សាលារាជធានីភ្នំពេញ ដើម្បីរកដំណោះស្រាយប្រសើរជាងតវ៉ាដុតកង់ឡាន៕