ការទាមទារដំឡើងប្រាក់ឈ្នួលគោលរបស់ស្ត្រីលក់ស្រាបៀរ ធ្វើឡើងដោយសំអាងថា ប្រាក់ឈ្នួលក្នុងពេលបច្ចុប្បន្នមិនអាចអោយពួកគេរស់នៅបានសមរម្យ។
ក្រុមស្ត្រីផ្សព្វផ្សាយស្រាបៀបានទាមទារអោយក្រុមហ៊ុនផលិតស្រាបៀផ្ដល់ប្រាក់ខែអោយពួកគេដោយទាបបំផុត គឺមានចន្លោះពី ១៣០ ដុល្លារ ទៅ ១៤០ដុល្លារ ក្នុងមួយខែ។ ពួកគេបានបង្ហាញការលំបាកដែលបានជួបប្រទះក្នុងការប្រកបរបរនេះ និងការលំបាកក្នុងជីវភាពពិតជាក់ស្តែងធ្វើជាមូលដ្ឋានក្នុងការទាមទារ។
ស្រ្តីផ្សព្វផ្សាយស្រាបៀអោយក្រុមហ៊ុន ខេមប៊្រូវ ឬ អង្គរបៀរ អ្នកស្រី ដាំ ចំរ៉ុង និយាយថា ខែខ្លះដែលលក់មិនសូវដាច់នាងទទួលបានចំណូលពី ៥០ ទៅ ៦០ដុល្លារ។ ចំរ៉ុង បន្តថា ចំនួននេះអាចត្រឹមតែបង់ថ្លៃឈ្នួលផ្ទះ ហើយដើម្បីបង្គ្រប់ការចំណាយផ្សេងទៀត នាងត្រូវទៅរកប្រាក់ពីអ្នកចងការប្រាក់ឯកជន។
ចំណែកអ្នកស្រី ចាន់ យ៉ាណារ៉េត ជាអ្នកផ្សព្វផ្សាយស្រាបៀអោយក្រុមហ៊ុន ថៃហ្គ័រ បាននិយាយដែរថា ដើម្បីបានប្រាក់បន្ថែមពីលើប្រាក់ឈ្នួលគោល មានស្ត្រីផ្សព្វផ្សាយស្រាបៀរជាច្រើននាក់ បានយល់ព្រមបណ្ដោយខ្លួនអោយបុរសជាអតិថិជនមាក់ងាយ។
ការលំបាកទាំងនេះជំរុញអោយពួកគេយល់ព្រមចូលរួមក្នុងយុទ្ធនាការទាមទារដំឡើងប្រាក់ឈ្នួលគោលដែលរៀបចំដោយសហព័ន្ធសហជីពកម្មករ ចំណីអាហារ និងសេវាកម្មកម្ពុជា។
ក្នុងខ្សែវីដេអូខ្លី ដែលមានរយៈពេល ១៥នាទី បានបង្ហាញរូបភាពស្ត្រីផ្សព្វផ្សាយស្រាបៀជាច្រើននាក់ដែលនិយាយពីការលំបាកក្នុងការប្រកបរបរជាស្ត្រីផ្សព្វផ្សាយស្រាបៀ។ ពួកគេអះអាងប្រហាក់ប្រហែលគ្នាថា ដោយសារប្រាក់ពួកគេបានបាត់បង់ភាពថ្លៃថ្នូរ និងសិទ្ធិស្មើភាពគ្នាជាមនុស្ស។
បើទោះជាយ៉ាងណាប្រភពពីសហជីព អះអាងថា មកដល់ពេលនេះគេពុំមានរបាយការណ៍ជាក់លាក់ ស្ដីពីប្រាក់ឈ្នួលសមរម្យសម្រាប់ស្ត្រីផ្សព្វផ្សាយថាមានចំនួនប៉ុន្មាននៅឡើយ។ ការទាមទារនៅពេលនេះគឺផ្អែកទៅលើការស្រាវជ្រាវរបស់វិទ្យាស្ថានកម្ពុជា ដើម្បីសិក្សាការអភិវឌ្ឍន៍ របាយការណ៍របស់ក្រសួងផែនការ និងអតិផរណានៅលើទីផ្សា។
កាលពីឆ្នាំ ២០០៩ វិទ្យាស្ថានកម្ពុជា ដើម្បីសិក្សាការអភិវឌ្ឍន៍ បានរកឃើញថា កម្មករក្នុងវិស័យកាត់ដេរអាចរស់នៅសមរម្យ នៅពេលពួកគេមានប្រាក់ឈ្នួលទាបបំផុត ១២០ដុល្លារ ក្នុងមួយខែ។ ចំណែកក្រសួងផែនការរកឃើញថា មនុស្សម្នាក់រស់នៅក្នុងក្រុងត្រូវចំណាយ ១៣០ដុល្លារ។
សហជីពគ្រោងនឹងប្រើប្រាស់ខ្សែវីដេអូខ្លីដែលគេផលិតបាន ធ្វើជាមូលដ្ឋាននៃការទាមទារដំឡើងប្រាក់ខែគោលរបស់ស្រ្តីអ្នកផ្សព្វផ្សាយស្រាបៀ។
ប្រធានសហព័ន្ធសហជីពកម្មករ ចំណីអាហារ និងសេវាកម្មកម្ពុជា លោក ស ម៉ូរ៉ា។ លោកមានប្រសាសន៍ថា លោកនឹងដាក់ខ្សែវីដេអូខ្លីនេះ ទៅក្រុមហ៊ុនស្រាបៀធំៗ ក្នុងការទាមទារអោយដំឡើងប្រាក់ខែគោលដល់ស្ត្រីអ្នកផ្សព្វផ្សាយស្រាបៀ ដែលបានរួមចំណែកយ៉ាងសំខាន់ក្នុងការរកប្រាក់ចំណូលអោយក្រុមហ៊ុនទាំងនោះ។
បើតាមលោក ស ម៉ូរ៉ា ប្រសិនបើអស់លទ្ធភាពក្នុងការចរចា សហជីព គ្រោងនឹងដឹកនាំស្ត្រីផ្សព្វផ្សាយស្រាបៀធ្វើកូដកម្មទាមទារ ដោយមានការចូលរួមពីអ្នកបម្រើការងារក្នុងវិស័យផ្សេងៗទៀតដែលជាសមាជិកសហព័ន្ធសហជីពរបស់លោក។
ការទាមទារដំឡើងប្រាក់ឈ្នួលគោលសម្រាប់ស្ត្រីផ្សព្វផ្សាយស្រាបៀនេះ ក៏បានទទួលការគាំទ្រពីអង្គការម្ចាស់ជំនួយ និងតំណាងក្រសួងកិច្ចការនារី។
អ្នកសម្របសម្រួលគម្រោងក្នុងកម្មវិធីយេនឌ័រ នៃមូលនិធិហេនរិចប៊ូល (Heinrich Boll) ប្រចាំនៅកម្ពុជា អ្នកស្រី អាំង សុខរើន។ អ្នកស្រីមានប្រសាសន៍ថា មូលនិធិនេះនៅបន្តគាំទ្រចំពោះការទាមទារសិទ្ធិរបស់ស្រ្តីផ្សព្វផ្សាយស្រាបៀរ។
អនុរដ្ឋលេខាធិការក្រសួងកិច្ចការនារី អ្នកស្រី ហោ លីន មានប្រសាសន៍ថា ការដំឡើងប្រាក់ឈ្នួលអោយដល់ចំនួនដែលក្រុមស្ត្រីទាមទារ គឺអាចអោយជីវភាពពួកគេ ក៏ដូចជាក្រុមគ្រួសារ បានប្រសើរ។ បើទោះជាយ៉ាងណា អ្នកស្រីបញ្ជាក់ដែរថា រាល់ការទាមទារគួរតែពិនិត្យអោយបានល្អិតល្អន់ពីស្ថានភាពប្រាក់ចំណូលរបស់ក្រុមហ៊ុនដែលពួកគេបម្រើការ។
ស្របពេលនៃការទាមទារដំឡើងប្រាក់ឈ្នួលគោលនេះ ស្រ្តីផ្សព្វផ្សាយស្រាបៀក៏បានទទូចអោយសាធារណជនខ្មែរផ្ដល់តម្លៃដល់ពួកគេ ត្បិតពួកគេក៏ជាមនុស្ស ហើយមុខរបររបស់ពួកគេគឺជាមុខរបរសុចរិត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។