ប្រធាននាយកដ្ឋានផលិតកម្មនិងបសុព្យាបាលនៃក្រសួងកសិកម្ម រុក្ខាប្រមាញ់ និងនេសាទ លោក កៅ ផល មានប្រសាសន៍ថា មន្ទីរពិសោធន៍បានចេញលទ្ធផលវិភាគពីការងាប់របស់សត្វទា នៅស្រុកកោះអណ្តែតនោះហើយ គឺទានៅភូមិប្រឡាយមាសក្នុងឃុំរមិញបានផ្ទុកជំងឺផ្តាសាយបក្សី H5N1។
លោកបន្តថា នៅពេលនេះក្រុមការងារគ្រប់ស្ថាប័នរដ្ឋ ខេត្ត ក្រសួង និងរដ្ឋាភិបាល មកជួបជុំគ្នា បែងចែកជាពីរក្រុម។ មួយក្រុមធ្វើការអប់រំប្រជាជនមិនឲ្យហូបសាច់ និងកុំលាក់លៀមព័ត៌មាននៃការស្លាប់របស់សត្វស្លាប។ ចំណែកមួយក្រុមទៀតបាញ់ថ្នាំការពារជំងឺ និងប្រមូលដុតសត្វដែលងាប់និងសត្វកំពុងឈឺផងដែរ។ លោកបានឲ្យដឹងថា ជំងឺផ្តាសាយបក្សី H5N1 បានកើតនៅដើមឆ្នាំ២០១០ ក្នុងប្រទេសកម្ពុជា នាស្រុកកោះអណ្តែតនេះមុនគេ។
លោកបានអំពាវនាវដូច្នេះ ៖ «សូមជម្រាបជូនដល់ប្រជាពលរដ្ឋថា ឲ្យមានការប្រុងប្រយ័ត្ននៅពេលដែលសត្វឈឺ ឬមួយក៏ងាប់ដោយសភាពខុសពីធម្មតា ត្រូវរាយការណ៍ជាបន្ទាន់ទៅបសុពេទ្យដែលនៅកៀកបំផុត ជិតផ្ទះ ភ្នាក់ងារពេទ្យបសុភូមិ ព្រោះភ្នាក់ងារបសុភូមិនេះ ឯកឧត្ដមបណ្ឌិត ចាន់ សារុន រដ្ឋមន្ត្រីក្រសួងកសិកម្ម បានជំរុញឲ្យបង្កើតរហូតទៅដល់ ១ម៉ឺន៤ពាន់ជាង នៅទូទាំងប្រទេស បានន័យថា ក្នុងមួយភូមិមួយ»។
ប្រធានមន្ទីរកសិកម្មខេត្តតាកែវ លោក ញឹម ស្រ៊ន មានប្រសាសន៍ថា សត្វមាន់ទាបានងាប់បន្តមកដល់ពេលនេះកើនជិត ២ម៉ឺនក្បាលហើយ។ លោកថា មន្រ្តីពីក្រសួងកសិកម្ម កាកបាទក្រហម គណៈកម្មការគ្រប់គ្រងគ្រោះមហន្តរាយ និងអភិបាលរងខេត្តតាកែវ បានចូលរួមក្នុងការប្រមូលសត្វឈឺនិងងាប់ ដុតនិងបាញ់ថ្នាំទប់ស្កាត់ការឆ្លងរាលដាលនៃជំងឺផ្តាសាយបក្សី H5N1។
លោកថា ក្រុមជំនាញពេទ្យសត្វប្រកាសហាមចល័តសត្វមាន់ទាក្នុងពេលចូលឆ្នាំចិនខាងមុខឆ្លងកាត់ភូមិប្រឡាយមាស ឃុំរមិញ ត្រូវហាមឃាត់ចម្ងាយ ៥គីឡូម៉ែត្រ ការពារការចម្លងទៅសត្វដទៃក្នុងភូមិឃុំផ្សេងទៀត ហើយមន្រ្តីនិងឃ្លាំមើលរយៈពេល ១ខែផងដែរ។
លោក ញឹម ស៊្រន បានបញ្ជាក់ថា ៖ «មាន់ទាដែលនៅសល់ហ្នឹងគឺជីករណ្ដៅដើម្បីធ្វើការពិឃាត និងដុតសម្លាប់មេរោគកប់ចូលទៅក្នុងដី។ យើងធ្វើនៅក្នុងភូមិប្រឡាយមាស ឃុំរមិញ មួយសិន ហើយយើងនឹងបន្តការបាញ់ PH4 នោះ ឲ្យបានគ្រប់ភូមិទាំងអស់ដែលមានបញ្ហាហ្នឹង»។
ទាំងមន្រ្តីនាយកដ្ឋានកសិកម្ម ទាំងអាជ្ញាធរបានឲ្យដឹងថា អ្នកចិញ្ចឹមសត្វស្លាបគួរតែមានការសម្អាតទ្រុង និងចិញ្ចឹមសត្វមិនត្រូវលែងវាឡើយដើម្បីការពារជំងឺឆ្លងនានា។
អនុប្រធាននាយកដ្ឋានប្រយុទ្ធនិងជំងឺឆ្លងនៃក្រសួងសុខាភិបាល លោកវេជ្ជបណ្ឌិត លី សូវ៉ាន់ ឲ្យដឹងថា ជំងឺផ្តាសាយបក្សី H5N1 បានឆ្លងមកក្នុងប្រទេសកម្ពុជាដំបូងបំផុតកាលពីដើមឆ្នាំ២០០៤ ឆ្លងទៅសត្វមាន់ទាដោយការចល័តសត្វពីប្រទេសជិតខាង។ នៅឆ្នាំ២០០៥ ជំងឺផ្តាសាយបក្សី H5N1 បានឆ្លងទៅមនុស្ស។ ការចម្លងនោះបានកើតហូរហែចំនួន ៩ករណី សរុបអ្នកស្លាប់មាន ៧នាក់ ក្នុងចំណោម ៩ករណី ដែលជំងឺផ្តាសាយបក្សី H5N1 បានចម្លងទៅមនុស្សក្នុងប្រទេសកម្ពុជា ហើយនៅដើមឆ្នាំ២០១០នេះ នៅខេត្តតាកែវ ជាករណីទី១០ ប៉ុន្តែគេមិនទាន់ឃើញថា វាបានចម្លងទៅមនុស្សទេ៕