ការសម្លាប់សត្វមាន់នេះ បានធ្វើឡើងតាមបទបញ្ជារបស់ក្រសួងកសិកម្ម រុក្ខាប្រមាញ់ និងនេសាទ ដែលបានប្រកាសកាលពីថ្ងៃព្រហស្បតិ៍ ទី៣ ខែវិច្ឆិកា សុំឲ្យមានការផ្អាកទិញ ការជញ្ជូនសត្វមាន់ជាបណ្ដោះអាសន្ននៅតំបន់នោះ បន្ទាប់ពីការពិនិត្យទៅសត្វមាន់ងាប់ដែលគេចិញ្ចឹមនៅក្នុងកសិដ្ឋាន រកឃើញមានជំងឺគ្រុនផ្ដាសាយបក្សីរួចមក។
លោក អ៊ឹម ប៊ុនយូ មេឃុំតាគ្រាម បានបញ្ជាក់នៅរសៀលថ្ងៃសុក្រ ទី៤ ខែវិច្ឆិកា ថា មន្ត្រីក្រសួងសុខាភិបាល និងមន្ត្រីក្រសួងកសិកម្ម រួមទាំងអាជ្ញាធរមូលដ្ឋានជាច្រើននាក់ នាំគ្នាសម្លាប់សត្វមាន់នៅក្នុងកសិដ្ឋានចំនួន ៤ពាន់ក្បាល ច្រកថង់ និងប្រើគ្រឿងចក្រជីកដីកប់នៅក្បែររោងចិញ្ចឹមសត្វមាន់ទាំងនោះ ស្ថិតក្នុងភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបង។
លោកបន្តថា៖ «កប់នៅជិតហ្នឹងដែរ សត្វមាន់ហ្នឹង ៤ពាន់ ប៉ុន្តែ ១.៥០០មុននោះ ម្ចាស់គេបានសម្លាប់ហើយ។ មាន់ដែលត្រូវសម្លាប់នេះមិនទាន់មានអីសោះ។ នៅរោងមួយផ្សេងដោយឡែកទៀត តែនៅក្នុងប្លុកតែមួយហ្នឹង ប៉ុន្តែកន្លែងយើងចិញ្ចឹមវាដាច់ឆ្ងាយពីប្រជាជន»។
លោក ស រដ្ឋា ជាម្ចាស់កសិដ្ឋានចិញ្ចឹមសត្វមាន់។ លោកបានឲ្យដឹងថា កាលពីចុងខែតុលា កន្លងទៅ សត្វមាន់ដែលចិញ្ចឹមនោះកើតមានជំងឺឈឺងាប់អស់ជាច្រើនក្បាល។ ប៉ុន្តែពុំបានដឹងថា សត្វមាន់ដែលងាប់ក្នុងកសិដ្ឋានរបស់លោកនោះកើតមានជំងឺអ្វីទេ។
លោកបន្តថា ក្រោយមកលោកបានយកសត្វមាន់ងាប់បីក្បាលបញ្ជូនទៅក្រុងភ្នំពេញ ឲ្យគេពិនិត្យ ហើយលោកបានសម្លាប់សត្វមាន់ចំនួន ១.៥០០ក្បាល ដែលចិញ្ចឹមក្នុងរោងជាមួយគ្នាយកទៅកប់ដីចោល ដើម្បីកុំឲ្យមានការឆ្លងរោគទៅសត្វមាន់ក្នុងរោងចិញ្ចឹមផ្សេងទៀតនៅក្បែរនោះ។ លុះដល់ថ្ងៃទី៣ ខែវិច្ឆិកា ទើបលោកបានដឹងថា សត្វមាន់ដែលលោកចិញ្ចឹមនោះកើតមានជំងឺគ្រុនផ្ដាសាយបក្សី។
លោក ស រដ្ឋា៖ «មាន់ហ្នឹង ថ្ងៃមុនដំបូងវាងាប់ត្រឹមតែ ៣៨ក្បាលទេ ប៉ុន្តែដល់ពេលស្អែកឡើងទៅវាកើនឡើង។ ខ្ញុំយកកប់ជិត ១ពាន់ក្បាលដែរ ដល់ពេលអ៊ីចឹងទៅបាននឹកឃើញថា បើមិនពិនិត្យទេ ថ្ងៃក្រោយមានរឿងអីទៅ យើងពិបាករកស៊ីដែរ។ ខ្ញុំផ្ញើទៅ មាន់ហ្នឹងគេពិនិត្យរួចហើយថា ផ្ដាសាយបក្សី។យើងកប់ ឲ្យគេបាញ់ថ្នាំទៅ ចាំមើលថ្ងៃណាគេឲ្យយើងចិញ្ចឹមវិញក៏ចិញ្ចឹមទៅ»។
លោក ញឹក ប៊ុនឈប់ ប្រធានមន្ទីរសុខាភិបាលខេត្តបាត់ដំបង បានមានប្រសាសន៍ថា ការកើតមានជំងឺគ្រុនផ្ដាសាយបក្សីនៅលើសត្វមាន់ចិញ្ចឹមនៅកសិដ្ឋានក្នុងភូមិអូរពងមាន់ ឃុំតាគ្រាម ស្រុកបាណន់នេះ ជាករណីលើកដំបូងនៅក្នុងខេត្តបាត់ដំបង។ លោកបន្តថា មន្ទីរសុខាភិបាលកំពុងមានការប្រុងប្រយ័ត្ន និងមានការយកចិត្តទុកដាក់យ៉ាងខ្លាំងចំពោះការផ្ទុះជំងឺគ្រុនផ្ដាសាយបក្សីលើសត្វមាន់នេះ ទោះជំងឺមិនធ្លាប់កើតមានទៅមនុស្សនៅក្នុងខេត្តបាត់ដំបង ក៏ដោយ។
លោក អ៊ឹម ប៊ុនយូ មេឃុំតាកគ្រាម បានឲ្យដឹងថា ទីតាំងចិញ្ចឹមសត្វមាន់ដែលផ្ទុះមានជំងឺគ្រុនផ្ដាសាយបក្សីនេះ មានចម្ងាយឆ្ងាយពីផ្ទះអ្នកភូមិរស់នៅប្រវែង ១គីឡូម៉ែត្រ។ ប៉ុន្តែខាងមន្ត្រីក្រសួងសុខាភិបាល នៅតែមានក្ដីបារម្ភ ព្រោះថា ប្រភេទជំងឺគ្រុនផ្ដាសាយបក្សីនេះអាចរីករាលដាលឆ្លងកាត់បានចម្ងាយប្រវែងបីគីឡូម៉ែត្រជុំវិញកន្លែងដែលកើតមានជំងឺនេះ។
លោក ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣ ខែវិច្ឆិកា បានប្រកាសដាក់ទីកន្លែងចិញ្ចឹមសត្វមាន់ដែលកើតមានជំងឺគ្រុនផ្ដាសាយបក្សីនៅក្នុងភូមិអូរពងមាន់ ឃុំតាគ្រាម ស្រុកបាណន់ ខេត្តបាត់ដំបងនេះ ឲ្យស្ថិតនៅក្រោមការសិក្សាស្រាវជ្រាវក្នុងរយៈពេល ៣០ថ្ងៃ ដើម្បីរកប្រភពជំងឺគ្រុនផ្ដាសាយបក្សីដែលបានកើតមានទៅលើសត្វមាន់៕