តំណាងប្រជាពលរដ្ឋឈ្មោះ តាំង ភួង បានមានប្រសាសន៍ថា សព្វថ្ងៃអ្នកភូមិកំពុងប្រឈមនឹងបញ្ហាជាច្រើនបន្ទាប់ពីទឹកលូស្អុយលិចផ្ទះនេះមក គឺក្មេងៗកើតកមរមាស់ និងមិនអាចលក់ដូរបាន ទោះបីជារដូវនេះជារដូវក្តៅក្តី ប៉ុន្តែកាលពីមុនតំបន់ភូមិ៣ បឹងកក់នេះ មិនដែលលិចទឹកនោះទេ។
ស្ត្រីឈ្មោះ តាំង ភួង បានបញ្ជាក់ថា ៖ «ការលំបាកមួយទៀត ការរស់នៅរបស់ប្រជាពលរដ្ឋនៅភូមិខ្ញុំហ្នឹងវាមានក្មេងកើតជំងឺគ្រុនឈាម ឈឺថ្កាត់ច្រើន។ ណាមួយទឹកវាស្អុយ ការរស់នៅវាពិបាក ហើយទី២ កូនសិស្សដែលទៅរៀនពិបាកធ្វើដំណើរទៅរៀន»។
អភិបាលរងខណ្ឌដូនពេញ លោក សុខ ពេញវុធ បានមានប្រសាសន៍ថា កន្លងមកលោកបានរៀបចំម៉ាស៊ីនបូមទឹកចេញនោះរួចហើយ ប៉ុន្មានថ្ងៃកន្លងមកម៉ាស៊ីនខូចធ្វើឲ្យរាំងស្ទះដល់ការបូមទឹកនោះចេញ។
លោក សុខ ពេញវុធ បញ្ជាក់ថា កាលពីពេលថ្មីៗនេះលោកបានដាក់លិខិតស្នើសុំទៅសាលារាជធានីភ្នំពេញដើម្បីសុំរៀបចំប្រព័ន្ធលូជាអចិន្ត្រៃយ៍នៅតំបន់នោះ។
ទោះជាយ៉ាងនេះក្តីបណ្តាប្រជាពលរដ្ឋបានអះអាងថា កន្លងមកខាងសាលាខណ្ឌដូនពេញបានបូមទឹកលូនោះចេញមែន ប៉ុន្តែម៉ាស៊ីនតូចមិនអាចបូមទាន់កម្លាំងទឹកលូហូរច្រើននោះទេ គឺនៅតែលិចផ្ទះរបស់ពួកគេដដែល។
សូមអញ្ជើញស្ដាប់សេចក្ដីរាយការណ៍ពិស្ដាររបស់លោក ទីន ហ្សាការីយ៉ា ៖