ស្រ្តីម្នាក់អះអាងថា ជាតំណាងប្រជាពលរដ្ឋភូមិ៣បឹងកក់ ឈ្មោះ តាំង ភួង បានឲ្យដឹងថា ក្រុមហ៊ុនមិនមានការទទួលខុសត្រូវចំពោះការបូមខ្សាច់លុបបឹងកក់ ហើយបណ្តាលឲ្យទឹកលូស្ទះនិងលិចផ្ទះរបស់ពួកគាត់ពិបាករស់នៅ ធ្វើដំណើរទៅណាមកណា និងក្មេងៗកើតជំងឺកមរមាស់ផ្សេងៗ ហើយពួកគេនឹងទៅតវ៉ាអំពីបញ្ហានេះនៅសាលារាជធានីភ្នំពេញ។
អ្នកស្រី តាំង ភួង បានឲ្យដឹងដូច្នេះ ៖ «លំបាកខ្លាំងណាស់ ទឹកលិច កូនចៅដើរលុយទឹកស្អុយ មូសកាន់តែច្រើនពិបាករស់នៅ ធំក្លិនស្អុយ»។
ស្រ្តីមួយរូបទៀតបានបញ្ជាក់ថា ពួកគាត់រស់នៅភូមិ៣បឹងកក់ តាំងពីឆ្នាំ១៩៧៩មកមិនដែលលិចទឹកទេ ប៉ុន្តែបន្ទាប់ពីក្រុមហ៊ុនស៊ូកាគូធ្វើការបូមខ្សាច់ចាក់ដីលុបបឹងកក់ និងចាក់លុបលូទៀតនោះ ធ្វើឲ្យទឹកលូស្អុយស្ទះលិចផ្ទះរបស់ពួកគេ ៖ «ប្រជាជននៅសង្កាត់ស្រះចកខាងមួយជួរខ្ញុំហ្នឹង វត្តនាគវ័ន្តរហូតមកដល់ក្ដាន់ពីរ ម្ដុំហ្នឹងត្រូវប្រើបង្ហូរចូលម្ដុំហ្នឹងទាំងអស់»។
វិទ្យុអាស៊ីសេរីមិនអាចសុំការបភ្លឺពីភាគីក្រុមហ៊ុនស៊ូកាគូ ដើម្បីសួរអំពីបញ្ហានេះបានទេនៅថ្ងៃទី៣១ មករា។
អភិបាលរងរាជធានីភ្នំពេញ លោក ម៉ាន់ ឈឿន មិនបានធ្វើអធិប្បាយអំពីបញ្ហានេះទេ ដោយលោកសួរទៅអភិបាលខណ្ឌដូនពេញ ដែលជាអ្នកទទួលខុសត្រូវរឿងនេះ។
អភិបាលរងខណ្ឌដូនពេញ លោក សុខ ពេញវុធ បានមានប្រសាសន៍ថា លោកមិនទាន់បានដឹងរឿងទឹកលិចនេះទេ ៖ «ជាប់នៅឆ្ងាយ អត់បានមើលសភាពការណ៍ហ្នឹងផង។ ចាំមើល៍ខ្ញុំសួរទៅមន្រ្តីខ្ញុំសិន»។
នាយកលេខាធិការដ្ឋាននៃអង្គការសិទ្ធិលំនៅឋាន លោក ស៊ា ភារម្យ បានមានប្រសាសន៍ពីបញ្ហានេះដូច្នេះ ៖ «តាមពិតទៅវាជាយុទ្ធសាស្រ្ដមួយដែរ ខាងក្រុមហ៊ុនអភិវឌ្ឍន៍ហ្នឹង បើសិនជាមិនមានបញ្ហាហ្នឹងទេ ធ្វើឲ្យប្រជាពលរដ្ឋនៅមិនព្រមចាកចេញអ៊ីចឹង។ ខ្ញុំគិតថា យើងគួរតែជជែកគ្នា ដាក់បញ្ហានៅលើតុដោះស្រាយរួមគ្នា យោងទៅតាមច្បាប់ភូមិបាល»។
ប្រជាពលរដ្ឋបានឲ្យដឹងទៀតថា ទឹកលូស្អុយបានលិចផ្ទះរបស់ពួកគេតាំងពីខែកញ្ញា ឆ្នាំ២០០៩មក ហើយកាលពីខែធ្នូឆ្នាំដដែល ពួកគេបានតវ៉ាម្តងរួចហើយ ភាគីក្រុមហ៊ុនសន្យាថា នឹងធ្វើប្រព័ន្ធលូបង្ហូរទឹកឲ្យឡើងវិញ ប៉ុន្តែខាងក្រុមហ៊ុនក៏ដូចជាអាជ្ញាធរមិនទាន់បានដោះស្រាយនៅឡើយ។
លោក ស៊ា ភារម្យ បានថ្លែងថា ជម្លោះដីអភិវឌ្ឍន៍នៅតំបន់បឹងកក់ មានផ្ទៃដីទំហំ១៣៣ហិកតា ដែលប៉ះពាល់ដល់ប្រជាពលរដ្ឋជាង៤ពាន់គ្រួសារ ហើយក្នុងឆ្នាំ២០០៩កន្លងទៅ ប្រជាពលរដ្ឋជាង១ពាន់គ្រួសារត្រូវបានគេបណ្តេញចេញ។
ជម្លោះនេះកើតមានឡើងតាំងពីឆ្នាំ២០០៧ បន្ទាប់ពីក្រុមហ៊ុនស៊ូកាគូ មានច្បាប់វិនិយោគពីរដ្ឋាភិបាលចំនួន៩៩ឆ្នាំ អភិវឌ្ឍន៍ធ្វើទីក្រុងគុជ គឺទីក្រុងថ្មីនៅតំបន់បឹងកក់នោះ៕