អ្នកស្រុកប្រមាណ៣០នាក់ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ នាំគ្នាទៅសុំឲ្យក្រុមហ៊ុនស៊ូកាគូជួយរំដោះទឹកចេញពីភូមិលេខ៣ នៅព្រឹកថ្ងៃច័ន្ទ ទី១ ខែមីនា។
ការលើកគ្នាទៅក្រុមហ៊ុនស៊ូកាគូនេះ ដោយសារក្រុមហ៊ុននោះអភិវឌ្ឍបឹងកក់ បូមខ្សាច់លុបបឹងកក់ បណ្តាលឲ្យបិទលូបង្ហូរទឹកចេញពីភូមិលេខ៣ នាំឲ្យទឹកលិចភូមិតាំងពីខែធ្នូ ឆ្នាំមុន មកដល់ពេលនេះ ៖ «គាត់ត្រូវតែដោះស្រាយឲ្យប្រជាជន ព្រោះយើងរកលុយចំណេញដាក់ហោប៉ៅយើង ហើយធ្វើឲ្យលិចគេវាអត់សមហេតុផល»។
អ្នកស្រី ជុំ វ៉ារាជ បានឲ្យដឹងថា ផ្ទះគាត់បានលិចទឹកដែលមិនហូរចេញក្រៅ ៖ «បូមទឹកពីកន្លែងខ្ញុំទៅហ្នឹង បូមលុបលើខ្សាច់ ទឹកហ្នឹងវាជ្រាប ច្រោះខ្សាច់មកវិញ ហូរចូលវិញដដែល។ អត់ស្រក ឡើងកាន់តែខ្លាំង លិចកាន់តែខ្លាំងទៅៗ»។
អ្នកស្រី សាំង ភួង បានឲ្យដឹងដែរថា ក្រុមហ៊ុនស្វែងរកប្រាក់ចំណូលខ្លួនឯង តែមកបង្កការលំបាកដល់អ្នកភូមិរស់នៅជុំវិញបឹងកក់។ អ្នកស្រីថា កាលពីខែធ្នូ ឆ្នាំ២០០៩ សាលាក្រុងភ្នំពេញ បានយកម៉ាស៊ីនមកបូមទឹកចេញពីភូមិដែរ ប៉ុន្តែម៉ាស៊ីនបូមទឹកតូច បូមទឹកចេញមិនទាន់ បណ្ដាលឲ្យទឹកចាល់មកក្នុងភូមិ ទើបអ្នកស្រុកនាំគ្នាសុំឲ្យក្រុមហ៊ុនជួយកាយប្រឡាយវិញ។
អ្នកស្រី សាំង ភួង ឲ្យដឹងដូច្នេះ ៖ «ខ្ញុំលិចត្រឹមជង្គង់ហើយ ចូលក្នុងផ្ទះ លិចគ្រែដេកហើយ។ ព្រឹកមិញ(១ មីនា)នេះគេថា ចាំគេឲ្យព័ត៌មានតាមសង្កាត់ខណ្ឌឲ្យគេចុះមកមើលផ្ទាល់ ឲ្យគេជួយដោះស្រាយ»។
អាជ្ញាធរភូមិលេខ៣ លោក ដួង ស៊ីម មានប្រសាសន៍ថា កន្លងមកអ្នករស់នៅជុំវិញបឹងកក់មិនដែលលិចទឹកទេ ព្រោះទឹកប្រើប្រាស់តាមផ្ទះមានលូចាស់សម្រាប់បង្ហូរទម្លាក់ទៅក្នុងបឹងកក់។ ប៉ុន្តែក្រោយពីក្រុមហ៊ុនស៊ូកាគូបូមខ្សាច់លុបបឹងកក់កាន់តែជិតពេញបឹងធ្វើឲ្យលូចាស់នោះស្ទះ ទើបទឹកបង្ហូរចេញតាមផ្ទះទម្លាក់ទៅបឹងកក់នោះមិនអាចហូរតទៅទៀតបាន។ លោកថា ទឹកនោះលិចផ្ទះទាបៗ ជិតផ្លូវសហព័ន្ធរុស្ស៊ី ប៉ះពាល់ប្រជាជនប្រមាណ៤០គ្រួសារក្នុងចំណោមជាង២២០គ្រួសារនៃភូមិលេខ៣នេះ។ លោកថា អាជ្ញាធរភូមិសង្កាត់និងសាលាក្រុងបានយកម៉ាស៊ីនបូមទឹកមកបូមទឹកចេញពីភូមិដែរ ប៉ុន្តែទឹកប្រើប្រាស់តាមគ្រួសារច្រើនជាងទឹកបូមចេញពីកន្លែងលិច។ លោកថា ប៉ុន្មានថ្ងៃនេះ ម៉ាស៊ីនបូមទឹកនោះខូចទៀត កំពុងជួសជុល ទើបអាក់ខានបូម ធ្វើឲ្យទឹកចាល់ឡើងខ្ពស់ជាងសព្វដង។
លោក ដួង ស៊ីម មានប្រសាសន៍បន្តថា ៖ «ខ្ញុំកំពុងតែស្នើដល់ក្រុមហ៊ុនហ្នឹង ជួយឲ្យម៉ាស៊ីនធំបន្តិចដើម្បីយើងបូម។ ទោះបីយើងបូមស្រកយ៉ាងណាក៏ដោយ ប៉ុន្តែបញ្ហាប្រព័ន្ធបណ្ដាញទឹកនេះវាអត់មានច្រកចេញ គ្រាន់តែបានបណ្ដោះអាសន្នទេ...»។
អតីតតំណាងក្រុមហ៊ុនស៊ូកាគូ លោក ឡៅ វណ្ណៈ មានប្រសាសន៍ថា ក្រុមហ៊ុនជាអ្នកវិនិយោគ សាលាក្រុងគួរតែដោះស្រាយបញ្ហាទឹកលិចនៅភូមិលេខ៣នេះ ៖ «បងមកសួរខាងវិនិយោគម៉េចនឹងត្រូវ អ្នកវិនិយោគគេធ្វើតាមគោលការណ៍របស់រដ្ឋាភិបាលឲ្យធ្វើ»។
មន្រ្តីសាលាក្រុងភ្នំពេញមិនអាចទាក់ទងបានដើម្បីសុំការបញ្ជាក់អំពីសំណូមពរឲ្យជួយអន្តរាគមន៍ដល់អ្នកភូមិលេខ៣បានទេនៅថ្ងៃ។
មន្រ្តីលេខាធិការដ្ឋានសិទ្ធិលំនៅឋាន លោក ណើប លី ថ្លែងថា អាជ្ញាធរក្រុងនិងក្រុមហ៊ុនស៊ូកាគូគួរតែពិចារណាកាយប្រឡាយ ឬធ្វើប្រព័ន្ធលូឲ្យបានមុនរដូវភ្លៀង។ បើទឹករំដោះចេញពីភូមិបានតិចនៅរដូវប្រាំង ទម្រាំដល់ទឹកភ្លៀងធ្លាក់មកទៀត ទឹកអាចនឹងលិចភូមិលេខ៣និងភូមិដទៃជុំវិញក្រុមហ៊ុនស៊ូកាគូនេះមិនខាន៕