តំណាងឲ្យក្រុមអ្នកតវ៉ាបានឲ្យដឹងថា គាត់នាំគ្នាតវ៉ានៅមុខផ្ទះលោក ហ៊ុន សែន នៅព្រឹកថ្ងៃពុធ ទី១០ ខែមីនា ឆ្នាំ២០១០នេះ មកពីថ្មីៗនេះមាន ស.ជ.ណ ចេញថ្ងៃ២ ខែមីនា ឲ្យប្រជាជនឆាប់រើចេញពីបឹងកក់ និងឲ្យទទួលយកសំណងមិនសមរម្យ។ ម្យ៉ាងទៀតមានផែនទីពីសុរិយោដីក្រុងបង្ហាញទំហំដី ត្រូវក្រុមហ៊ុនសូកាគូអភិវឌ្ឍន៍ បានគូសយកដីនៅលើគោកទៀត ប៉ះពាល់៨ភូមិ មានភូមិលេខ១ លេខ៣ លេខ៦ លេខ២០, ២១, ២២, ២៣និងលេខ២៤។
អ្នកស្រីថា ផែនទីនោះបានគូសវាងវិហារចាមនិងផ្ទះចាមមួយចំនួន វាងក្រសួងព័ត៌មានវាងសណ្ឋាគារភ្នំពេញ វាងមន្ទីរពេទ្យកាល់ម៉ែត វាងរដ្ឋាករទឹកស្វយ័តភ្នំពេញនិងវាងស្ថានទូតបារាំង។ អ្នកស្រីថា បើវាងវិហារចាមនោះ ពួកគាត់មិនទទួលស្គាល់ទេ ព្រោះវិហារចាមនោះទើបសង់ក្នុងសម័យអ៊ុនតាក់ចូលស្រុករៀបចំបោះឆ្នោតដំបូងឆ្នាំ១៩៩៣។ ចំណែកពួកគាត់រស់នៅលើដីគោកក្បែរបឹងកក់ តាំងពីឆ្នាំ១៩៨០មកនោះ។ អ្នកស្រីបន្តថា ផែនទីគូសព័ទ្ធយកដីគោក ប៉ះពាល់៨ភូមិនៅក្បែរបឹងកក់នោះ និងប៉ះពាល់មនុស្សកំពុងរស់នៅមានទាំងមន្រ្តីរាជការផងប្រមាន៣.០០០គ្រួសារ។
តំណាងអ្នកតវ៉ាបានឲ្យដឹងដូច្នេះ ៖ «ក្រៅពីហ្នឹងគេកៀរទាំងអស់ ប្រជាជនអត់មានសិទ្ធិរស់នៅតំបន់ហ្នឹងទេ ម្ល៉ោះហើយប្រជាពលរដ្ឋយើងខ្ញុំមានការព្រួយបារម្ភ ហើយមកសំណូមពរសម្ដេច ឲ្យសម្ដេចជួយ»។
តំណាងអ្នកតវ៉ាមកពីភូមិ៦ ឲ្យដឹងបន្ថែមថា ពួកគាត់មកតវ៉ាត្រូវមន្រ្តីធ្វើការនៅមុខផ្ទះលោកនាយករដ្ឋមន្រ្តី ហ៊ុន សែន បានសុំឲ្យពួកគាត់រើសតំណាង៣នាក់ចូលចរចា ប៉ុន្តែពួកគាត់ខ្លាចតំណាងនិយាយខុស ដោយផ្ទះរៀងខ្លួនមានធំ មានតូច មានថ្ម មានឈើ និងខ្លាចមានការចាប់ខ្លួនតំណាងបានជាពួកគាត់ចង់ចូលជួបលោក ហ៊ុន សែន ទាំងអស់គ្នា។
អ្នកស្រីបន្តថា ៖ «ខុទ្ទកាល័យនៅក្រោមដើមពោធិ៍នោះឲ្យប្រជាជនយកស្នាមមេដៃទៅឲ្យ តែប្រជាជនមិនឲ្យ ថាអ្នកហ្នឹងមិនមែនតំណាងខុទ្ទកាល័យរបស់សម្ដេចនាយករដ្ឋមន្រ្តីទេ ជាក្រុមហ៊ុនទេ។ គេអត់ឲ្យ»។
តំណាងអ្នកតវ៉ាមកពីភូមិ២០បានឲ្យដឹងថា ៖ «ព្រោះក្រុមហ៊ុនទើបកើត២០០៨ ហើយខ្ញុំប្រជាជនរស់នៅតាំងពី១០ឆ្នាំ ២០ឆ្នាំហើយអត់បានទទួលប្លង់កម្មសិទ្ធិ ចំណែកក្រុមហ៊ុនទទួលបានប្លង់កម្មសិទ្ធិ ខ្ញុំប្រជាជនអត់សុខចិត្តទេ»។
ក្រុមការងារពិសេសសិទ្ធិលំនៅឋាន លោក ណិប លី បានឲ្យដឹងថា ក្រោយពីប្រជាជនព្យាយាមរង់ចាំជួបលោកនាយករដ្ឋមន្រ្តីរយៈពេលច្រើនម៉ោង និងពុំមានការចុះជួបទទួលពាក្យបណ្តឹង ឬផ្តល់ដំណឹងផ្សេងៗពីសំណាក់មន្រ្តីខុទ្ទកាល័យនាយករដ្ឋមន្រ្តីមកឡើយ បែរជាមានសមត្ថកិច្ចខណ្ឌចំការមន និងខណ្ឌដូនពេញ បានឲ្យពលរដ្ឋចេញពីមុខផ្ទះនាយករដ្ឋមន្រ្តីទៅមុខវត្តបទុមវតី វិលចុះឡើងច្រើនសា។
ក្រុមអ្នកតវ៉ា៨ភូមិពីតំបន់បឹងកក់បានឲ្យដឹងនៅរសៀលថ្ងៃដដែលថា ពួកគាត់បានវិលមកផ្ទះវិញរង់ចាំការតវ៉ាជាថ្មីនៅពេលឆាប់ៗនេះ ដោយព្យាយាមចង់ជួបលោកនាយករដ្ឋមន្រ្តីផ្ទាល់។
កាលពីឆ្នាំ២០០៩កន្លងទៅ អ្នកភូមិលេខ២ រស់នៅក្នុងទឹកបឹងកក់ បានយល់ព្រមយកប្រាក់តាមការដោះស្រាយពីសាលាក្រុងមួយចំនួននិងខ្លះទៀតអះអាងថា សុំអភិវឌ្ឍនៅកន្លែងតាមស.ជ.ណ(សេចក្ដីជូនដំណឹង)៕