ក្រុមអ្នកភូមិអង្គុយក្រោមកម្ដៅថ្ងៃយ៉ាងស្ងៀមស្ងាត់ មិនមានលើកបដា ស្រែក ឬក៏ធ្វើឲ្យរំខានដល់ចរាចរណ៍ឡើយ ស្របពេលដែលពួកកាត់ចូលជួបប្រជុំជាមន្ត្រីសាលារាជធានីភ្នំពេញ។
អ្នកស្រី សន ជលសា រស់នៅភូមិ២៤ សង្កាត់ស្រះចក ខណ្ឌដូនពេញ បានថ្លែងថា រាល់ការទាមទាររបស់ពួកគាត់មិនដែលមានដំណោះស្រាយទេ ៖ «យើងតវ៉ារហូតមក តែមិនមានអាជ្ញាធរណាចេញមុខមកដោះស្រាយជូនយើងទេ»។
ធនាគារពិភពលោក (World Bank) បានស្នើឲ្យរដ្ឋាភិបាលកម្ពុជា បញ្ឈប់ការបង្ខំបណ្ដេញប្រជាពលរដ្ឋប្រមាណ ១ម៉ឺននាក់បន្ថែមទៀតចេញពីតំបន់បឹងកក់។ ធនាគារនេះក៏បានសន្យាផ្ដល់ជំនួយទៅដល់ប្រជាពលរដ្ឋដែលបានបាត់បង់ផ្ទះសម្បែងរបស់ពួកគេ។
កាលពីថ្ងៃទី១០ ខែកុម្ភៈ ឆ្នាំ២០១១ អ្នកតំណាងរាស្ត្រគណបក្ស សម រង្ស៊ី បានស្នើឲ្យស្ថានទូតចិន ប្រចាំនៅកម្ពុជា ឲ្យជួយអន្តរាគមន៍ទៅរដ្ឋាភិបាលចិន ដើម្បីបញ្ឈប់ការរំលោភយកដីពីប្រជាពលរដ្ឋដើម្បីអភិវឌ្ឍន៍នៅតំបន់បឹងកក់។
អ្នកស្រី ចន្ថា តំណាងប្រជាពលរដ្ឋតំបន់បឹងកក់ ដែលបានចូលជួបជាមួយអាជ្ញាធរក្រុងភ្នំពេញ បានថ្លែងថា ពួកគាត់មានគោលការណ៍យ៉ាងមុតមាំទាមទារយកដី ១៥ហិកតារ ដើម្បីធ្វើការអភិវឌ្ឍដោយខ្លួនឯងនៅនឹងកន្លែង ៖ «យកសំណើហ្នឹងទៅជួបសាលារាជធានី និងរដ្ឋាភិបាលរបស់យើង ព្រោះគាត់ថា នេះជាសំណើថ្មីរបស់ប្រជាពលរដ្ឋ អ៊ីចឹងគាត់យកសំណើហ្នឹងទៅជួបប្រមុខរដ្ឋាភិបាលរបស់យើងដើម្បីដោះស្រាយពិភាក្សាគ្នាតទៅមុខទៀត»។
ការអភិវឌ្ឍបឹងកក់ ទំហំជាង ១៣០ហិកតារ កណ្ដាលទីក្រុងភ្នំពេញ បានធ្វើឲ្យប៉ះពាល់ដល់ប្រជាពលរដ្ឋដែលបានតាំងទីលំនៅក្នុងតំបន់នោះប្រមាណជិត ២ពាន់គ្រួសារ។ ក្រុមអាជ្ញាធរបានបណ្ដេញពួកគាត់ចេញដោយមិនបានផ្ដល់សំណងសមរម្យសម្រាប់រកទិញទីលំនៅថ្មីឡើយ៕