ភាគច្រើនក្នុងចំណោមកុមារបឹងកក់ប្រមាណ ៥០នាក់ ដែលម្ដាយរបស់ពួកគេកំពុងតែជាប់ឃុំ មិនបានទៅរៀនសូត្រជាប់លាប់ទេ គឺពួកគេឆ្លៀតទៅរៀនផង និងដើរតវ៉ាទាមទារឲ្យមានការដោះលែងម្ដាយរបស់ពួកគេផង។
ក្រុមកុមារដែលព្រាត់ម្ដាយបានដើរតវ៉ាស្ទើរគ្រប់ទីកន្លែង រួមមាន ក្រសួងយុត្តិធម៌ ពន្ធនាគារព្រៃស រដ្ឋសភា ព្រឹទ្ធសភា ព្រះបរមរាជវាំង និងស្ថានទូតនានា ដោយពួកគេសុំឲ្យមានកិច្ចអន្តរាគមន៍ក្នុងការស្វែងរកយុត្តិធម៌សម្រាប់ម្ដាយរបស់ពួកគេ។
នេះគឺជាសម្រែករបស់កុមារី ប៉ោ សុគន្ធកញ្ញា បានដង្ហោយហៅរកព្រះរាជអន្តរាគមន៍ពីព្រះមហាក្សត្រ ព្រះករុណាសម្ដេចព្រះបរមនាថ នរោត្តម សីហមុនី កាលពីថ្ងៃទី៥ ខែមិថុនា។
កុមារី ប៉ោ សុគន្ធកញ្ញា អាយុ ១១ឆ្នាំ ជាសិស្សថ្នាក់ទី៥ នៃសាលាបឋមសិក្សាកុលាប។ កុមារីជាកូនច្បងនៃគ្រួសារមួយ ដែលមានកូន ៣ នាក់។ ម្ដាយរបស់កុមារី ប៉ោ សុគន្ធកញ្ញា គឺលោកស្រី តុល ស្រីពៅ ជាតំណាងប្រជាពលរដ្ឋតំបន់បឹងកក់។
តាំងពីម្ដាយរបស់នាង និងអ្នកបឹងកក់ទាំង ១២ នាក់ ទៀតត្រូវបានកាត់ទោស និងយកទៅដាក់ពន្ធនាគារព្រៃស កាលពីថ្ងៃទី ២៤ ខែឧសភា កុមារី ប៉ោ សុគន្ធកញ្ញា បានចូលរួមមិនសូវខាន ក្នុងការតវ៉ាទាមទារឲ្យដោះលែងម្ដាយ និងអ្នកបឹងកក់ទាំងអស់ពីពន្ធនាគារ។ កាលពីថ្ងៃទី ៣១ ខែឧសភា កុមារីបានទៅតវ៉ានៅខាងមុខក្រសួងយុត្តិធម៌។
ដោយបានទទួលដំណឹងថា ម្ដាយរបស់នាងបានធ្វើកូដកម្មបង្អត់អាហារនៅក្នុងគុក កុមារីកើតទុក្ខ ព្រោះនាងភ័យខ្លាចបាត់បង់ម្ដាយ ហើយនាងបានទៅតវ៉ានៅខាងមុខច្រកចូលពន្ធនាគារព្រៃស កាលពីថ្ងៃទី ១០ ខែមិថុនា។
ឪពុករបស់កុមារី ប៉ោ សុគន្ធកញ្ញា លោក ប៉ោ សុគុណ្ណារ៉ា មានប្រសាសន៍ថា កូនរបស់លោកធ្លាប់តែរៀនបានចំណាត់ថ្នាក់លេខ ១ ឥឡូវធ្លាក់មកនៅចំណាត់ថ្នាក់លេខ ២ វិញ។ លោកបារម្ភខ្លាចវិបត្តិ ដែលកំពុងតែញាំញីគ្រួសាររបស់លោកនេះ នឹងបំផ្លាញសេចក្ដីសង្ឃឹមរបស់លោក និងភរិយារបស់លោកអំពីអនាគតដ៏ត្រចះត្រចង់នៃកូនស្រីរបស់ពួកគាត់។
ក្រៅពីការគិតដល់ម្ដាយ ថ្វីត្បិត កុមារី ប៉ោ សុគន្ធកញ្ញា មានអាយុទើបតែ ១១ ឆ្នាំ ប៉ុន្តែនាងអាចបំពេញតួនាទីជាកូនច្បងនៃគ្រួសារយ៉ាងសក្ដិសម ដូចជា ការដែលនាងបានជួយរៀបចំខ្លួនប្រាណ សំលៀកបំពាក់សម្ភារៈសិក្សា និងចែករំលែកម្ហូបអាហារឲ្យប្អូនប្រុសស្រីរបស់នាង មុនពេលទៅសាលាជាដើម។
កុមារីបានឲ្យដឹងថា នាងធ្លាប់ប៉ុនប៉ងថា នឹងខំរៀនឲ្យបានពូកែ ដើម្បីក្លាយខ្លួនជាសាស្ត្រាចារ្យម្នាក់ក្នុងពេលអនាគត។ ប៉ុន្តែពេលនេះនាងប្ដូរចិត្តវិញហើយ។
ទោះបីជាមានការតាំងចិត្តយ៉ាងណាក្ដី ក៏កុមារីនៅតែបារម្ភខ្លាចក្រែងការខិតខំប្រឹងប្រែងរបស់នាងមិនបានជោគជ័យ។ នាងព្រួយខ្លាចមិនបានជោគជ័យ ព្រោះសេចក្ដីនឹករឭកចំពោះម្ដាយចេះតែរំខានអារម្មណ៍របស់នាង។ នាងថា រាល់ពេលដែលនាងអានសៀវភៅ នាងស្រមៃឃើញមុខម្ដាយរបស់នាងជានិច្ច។
កុមារី ប៉ោ សុគន្ធកញ្ញា មានចរិតម៉ត់ចត់ក្នុងការធ្វើមួយ គឺនាងសួរបញ្ជាក់នៅពេល ដែលនាងយល់មិនច្បាស់។ កុមារីអះអាងថា គំរូដែលនាងទទួលបានពីម្ដាយរបស់នាង គឺសេចក្ដីក្លាហាន ភាពស្មោះត្រង់ និងការចេះថ្លឹងថ្លែងរវាងប្រយោជន៍សង្គម និងប្រយោជន៍ផ្ទាល់ខ្លួន។
កុមារីបញ្ជាក់ថា ការចាប់អ្នកបឹងកក់ទាំង ១៣ នាក់ ដាក់ពន្ធនាគារមិនអាចបំបាក់ស្មារតីរបស់នាងបានទេ ផ្ទុយទៅវិញ វាកាន់តែជំរុញឲ្យនាងចង់ដើរតាមគន្លងម្ដាយរបស់នាងក្នុងការតស៊ូមតិថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។