លោក យ៉ាន់ នី អាយុ៤៤ឆ្នាំ ពិការភ្នែកទាំងគូនិងជាអតីតយុទ្ធជននៃកងពល១៧៩ បានមានប្រសាសន៍នៅថ្ងៃអាទិត្យ ទី៣១ ខែមករាថា អតីតយោធិនពិការនិងគ្រួសារយោធិនពលីចំនួន២៨នាក់ កាលពីថ្ងៃទី២៧ ខែមករា ឆ្នាំ២០១០ បានដាក់ពាក្យប្តឹងទៅអាជ្ញាធរស្រុកព្រះនេត្រព្រះ ឲ្យជួយដោះស្រាយបញ្ហាការិយាល័យសង្គមកិច្ចកាត់ប្រាក់ខែរបស់ពួកគាត់។
លោក យ៉ាន់ នី មានប្រសាសន៍ដូច្នេះ ៖ «ប្រាក់ខែនេះកាត់មិនដឹងមុខមិនដឹងមាត់។ កាត់ក្នុងម្នាក់ពី១ម៉ឺនទៅ៣ម៉ឺនរៀលក្នុង១ខែ ហើយលុយដូចជាសម្ដេច ហ៊ុន សែន ឧបត្ថម្ភឲ្យក្រៅៗ ១២ម៉ឺន កាត់ម្នាក់២ម៉ឺន»។
យោធិនពិការបានចោទថា លោក អែម ណុយ អនុប្រធានការិយាល័យសង្គមកិច្ចស្រុកព្រះនេត្រព្រះ បានកាត់ប្រាក់ខែពួកគាត់គ្មានមូលហេតុ ហើយបានគំរាមមិនឲ្យដើរនិយាយពីរឿងកាត់ប្រាក់ខែ ៖ «គេដើរបិទមាត់មិនឲ្យអ្នកពិការមកប្តឹងគេទេ។ គេថា អាណាប្តឹងអញកាត់ឈ្មោះអ្ហែងចោល បើកប្រាក់អ្ហែងយក ម្ល៉ោះហើយអ្នកពិការអត់ហ៊ានមក»។
អ្នកស្រី ឌុល ចំប៉ា ជាភរិយាយោធិនពលីបានមានប្រសាសន៍ថា ប្តីរបស់លោកស្រីឈ្មោះ រ៉ែម រឿត អតីតជាទាហាននៅកងពលតូចលេខ៣ បានពលីកាលពីចុងឆ្នាំ២០០៨។ ប្រាក់ខែប្តីរបស់គាត់មួយខែៗ បើកបានចំនួន១២ម៉ឺនរៀល ប៉ុន្តែក្រោយពីប្តីស្លាប់គេបើកបានចំនួន១០ម៉ឺនរៀលឲ្យលោកស្រីចំនួន៤ដងក៏បាត់សូន្យឈឹង។
លោក អែម ណុយ អនុប្រធានការិយាល័យសង្គមកិច្ចស្រុកព្រះនេត្រព្រះ មិនលើកទូរស័ព្ទធ្វើអត្ថាធិប្បាយជុំវិញការចោទប្រកាន់នេះទេ។
ប្រធានមន្ទីរសង្គមកិច្ចខេត្តបន្ទាយមានជ័យ ទើបចូលកាន់តំណែងជំនួនលោក ហេង ចំរើន ដែលត្រូវគេបណ្តេញពីតំណែងដោយសាររឿងអាស្រូវកិបកេងប្រាក់ខែនេះ មិនអាចសុំការបញ្ជាក់បានទេ។
លោក លឹម អ៊ែលយូរ៉ាដូ មន្ត្រីនាំពាក្យក្រសួងសង្គមកិច្ចបានមានប្រសាសន៍ថា លោកនឹងធ្វើការស្រាវជ្រាវរឿងនេះ។ លោកមានប្រសាសន៍ថា មន្ត្រីដែលអនុវត្តផ្ទុយគោលការណ៍នឹងត្រូវទទួលទណ្ឌកម្ម។
លោក លឹម អ៊ែលយូរ៉ាដូ មានប្រសាសន៍ថា ៖ «គឺថា ក្រសួងសង្គមកិច្ចមានគោលជំហរមួយដាច់ណាត់មិនអាចឲ្យបញ្ហាហ្នឹងបង្កការលំបាកដល់ក្រសួង ដល់រាជរដ្ឋាភិបាលទេ»។
លោក ស៊ុម ចន្ទគា មន្ត្រីសមាគមអាដហុក បានមានប្រសាសន៍ថា មន្ទីរនិងក្រសួងសង្គមកិច្ច ត្រូវចាត់វិធានការលើករណីនេះ ៖ «សង្គមកិច្ចគួរតែពិនិត្យមើលទៅលើសមាសភាពនៃមន្រ្តីសង្គមកិច្ចស្រុកព្រះនេត្រព្រះ»។
អតីតប្រធានមន្ទីរសង្គមកិច្ច ខេត្តបន្ទាយមានជ័យ លោក ហេង ចំរើន ត្រូវបានក្រសួងសម្រេចដកចេញពីតំណែងដោយសារអតីតប្រធានរូបនេះ រងការចោទពីក្រុមយោធិនចូលនិវត្តន៍ យោធិនពិការនិងគ្រួសារយោធិនពលីថា បានកិបកេងប្រាក់ខែដូចករណីខាងលើនេះដែរ៕