បុរសឈ្មោះ តាំង សុទ្រី រស់នៅភូមិ២ ឲ្យដឹងថា ផ្ទះនៅក្នុងទឹកបឹងកក់កំពុងទ្រេតចង់រលំដោយការបូមខ្សាច់ចាក់លុបនោះ។ ទើបនាំគ្នាទាំង២ភូមិ ទៅសុំអន្តរាគមន៍ពីអភិបាលខណ្ឌ។
ទាក់ទងនឹងបញ្ហានេះ តាមប្រភពពីប្រជាពលរដ្ឋបានឲ្យដឹងថា នាពេលកន្លងមក អភិបាលខណ្ឌបានបង្ហាញជម្រើស៣ ទី១ អភិវឌ្ឍនៅនឹងកន្លែង ដូចសហគមន៍បុរីកីឡា ទី២ ឲ្យយកប្រាក់ ២លានរៀល និងផ្ទះផ្ទាល់ដី១ល្វែង នៅខណ្ឌដង្កោ ទី៣ ឲ្យប្រាក់ ៨ពាន់ដុល្លារ និងប្រាក់ ២លានរៀល សាលាក្រុងឧបត្ថម្ភសម្រាប់រុះរើ បើអ្នកស្ម័គ្រចាកចេញតាមជម្រើសណាមួយ ត្រូវប្រាប់ទៅសាលាខណ្ឌ។
លោក តាំង សុទ្រី បន្តថា គាត់ព្រមចាកចេញយកប្រាក់៨ពាន់ដុល្លារ និងប្រាក់២លានរៀល ប៉ុន្តែខាងក្រុមហ៊ុនមិនឲ្យប្រាក់ដូចការសន្យា ៖ «សម្រេចសម្រួល ខ្ញុំទៅយកលុយ គេឲ្យតែ ៤ពាន់ ហើយខ្ញុំសួរថា ហេតុអ្វីឲ្យខ្ញុំតែ ៤ពាន់? ថាផ្ទះខ្ញុំហ្នឹងសង់ក្រោយថ្ងៃរបស់គេកំណត់»។
អ្នកស្រី ឆេង ហុង អះអាងថា ក្រុមគ្រួសារគាត់មានផ្ទះ៣។ ផ្ទះ១ សង់ពីស័ង្កសី ក្រាលក្តារ បានរលំចូលទឹកថ្មីៗនេះ ដោយខ្សាច់របស់ក្រុមហ៊ុន ស៊ូកាគូ បំបាក់សសរ។ ផ្ទះនោះ គាត់យល់ព្រមរើចេញតាមការចរចាជាមួយអភិបាលខណ្ឌកាលពីថ្ងៃច័ន្ទ។ ប៉ុន្តែនៅពេលគាត់មកដល់ផ្ទះ អ្នកធ្វើការក្រុមហ៊ុន ស៊ូកាគូ ប្រាប់ថា ផ្ទះដែលរលំនោះឲ្យតែ ២លានរៀលទេ ឯផ្ទះ២ទៀត ជាចំណែកកូននិងក្មួយ គេថា ចាំសាលាក្រុងសម្រេច។
អ្នកស្រី ឆេង ហុង ថ្លែងយ៉ាងដូច្នេះ ៖ «តែខ្ញុំនឹកឃើញថា ផ្ទះខ្ញុំវាបាក់ បានជាខ្ញុំយល់យោគថាតម្លៃប៉ុណ្ណឹង តែដល់ពេលមិនព្រមឲ្យ គេឲ្យខ្ញុំតម្លៃ២លាន»។
អភិបាលខណ្ឌដូនពេញ លោក សុខ សម្បត្តិ មានប្រសាសន៍នៅរសៀលថ្ងៃអង្គារ ទី២៨ កក្កដា ២០០៩ ថា អាជ្ញាធរនឹងនាំអ្នករស់នៅតំបន់បឹងកក់ទៅមើលផ្ទះផ្ទាល់ដីនៅខណ្ឌដង្កោនោះ ប៉ុន្តែមិនទាន់ដឹងថា នឹងមានមនុស្សប៉ុន្មាននាក់ដែលពេញចិត្តទេ។
អភិបាលរងរាជធានីភ្នំពេញ លោក ម៉ាន់ ឈឿន មានប្រសាសន៍ថា កន្លងមក អ្នករស់នៅតំបន់បឹងកក់ ស្ម័គ្រចិត្តចាកចេញច្រើនគ្រួសារ។ លោកបានបញ្ជាក់ថា ការប្រជុំកាលពីថ្ងៃច័ន្ទ ទី២៧ កក្កដា ឆ្នាំ២០០៩ អាចមានអ្នកស្ម័គ្រចិត្តច្រើន ប៉ុន្តែចំនួនប៉ុន្មានគ្រួសារមិនទាន់ច្បាស់នៅឡើយ។
លោក ម៉ាន់ ឈឿន មានប្រសាសន៍យ៉ាងដូច្នេះ ៖ «ថ្នាក់នេះ គឺថ្នាក់មូលដ្ឋានដែលគេអនុវត្តហើយគេបញ្ជូនមកលើ គាត់អត់ទាន់រាយការណ៍ជូនមកដល់លើទេ»។
នាយកលេខាធិការដ្ឋាននៃអង្គការសិទ្ធិលំនៅឋាន លោក សៀ ភារម្យ ថ្លែងថា ការអភិវឌ្ឍត្រូវមានការយល់ព្រមទាំងសងខាង ប៉ុន្តែការប្រជុំកាលពីថ្ងៃច័ន្ទ ហាក់ដូចជាបង្ខំជនរងគ្រោះឲ្យទទួលយកការកំណត់របស់គេទៅវិញ។
លោកបានឲ្យដឹងថា ជម្លោះដីអភិវឌ្ឍន៍នៅតំបន់បឹងកក់មានទំហំ ១៣៣ហិកតារ ពាក់ព័ន្ធនឹងប្រជាជន ១០ភូមិ ចំនួនប្រមាណ ៤ពាន់គ្រួសារ។ ជម្លោះបានចាប់ផ្តើមខ្លាំងតាំងពីឆ្នាំ២០០៧ ក្រោយពេលក្រុមហ៊ុន ស៊ូកាគូ បានច្បាប់អនុញ្ញាតវិនិយោគ៩៩ឆ្នាំ ហើយបានបូមខ្សាច់ចាក់លុបបឹងកក់នោះ៕