លោក វ៉ា គឹមហុង ទេសរដ្ឋមន្ត្រី និងជាប្រធានគណៈធម្មាធិការព្រំដែនកម្ពុជា មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៣ ខែមិថុនាថា សមាជិកសភាគណបក្សសមរង្ស៊ី អាចប្រឈមមុខតាមផ្លូវច្បាប់ បើសកម្មភាពចុះពិនិត្យបង្គោលព្រំដែន របស់តំណាងរាស្ត្រទាំងនោះ បានបំផ្លាញតម្រុយ ឬបង្គោលព្រំដែន ដែលមន្ត្រីជំនាញបានបោះរួចហើយនោះ។
លោក វ៉ា គឹមហុង មានប្រសាសន៍ថា ៖ «កាត់ទៅធ្វើអីខ្លះកំពង់ចាមហ្នឹង ព្រោះអត់មានការអនុញ្ញាត អត់មានសុំពីសម្ដេចប្រធានរដ្ឋសភា អត់ប្រាប់អាជ្ញាធរដែនដី អាហ្នឹងមិនដឹងគាត់ចង់ធ្វើអីទេ។ បើគ្រាន់តែទៅមើលបង្គោលរួចហើយ គឺមិនអីទេ កុំមកប្រកាសអញ្ចេះអញ្ចុះ ដែលអត់ជំនាញ ហើយថា បោះខុសបោះត្រូវ អត់មានជំនាញ យើងមានសិទ្ធិការពារប្រយោជន៍រាជរដ្ឋាភិបាលរបស់ប្រទេសជាតិ»។
លោក វ៉ា គឹមហុង មានប្រសាសន៍ដូច្នេះ បន្ទាប់ពីមានអ្នកតំណាងរាស្ត្របក្សសមរង្ស៊ី ចំនួនបីរូប នៅព្រឹកថ្ងៃទី២៣ ខែមិថុនានេះ បានចុះពិនិត្យការបោះបង្គោលព្រំដែនលេខ១២៤, ១២៥, ១២៦ និង១២៧ នៅឃុំអន្លង់ជ្រៃ ស្រុកពញាក្រែក ខេត្តកំពង់ចាម។
លោក យឹម សុវណ្ណ មន្ត្រីនាំពាក្យ និងជាតំណាងរាស្ត្រគណបក្សសមរង្ស៊ី មានប្រសាសន៍ថា ការចុះបំពេញភារៈរបស់តំណាងរាស្ត្រ នៅតាមមូលដ្ឋានជួបពលរដ្ឋ ឬពិនិត្យបង្គោលព្រំដែន គឺមិនចាំបាច់សុំការអនុញ្ញាត ឬជូនដំណឹងជាមុនទៅក្រសួង-ស្ថាប័ន ឬអាជ្ញាធរមូលដ្ឋាននោះទេ ព្រោះតំណាងរាស្ត្រមានសិទ្ធិចុះបំពេញភារកិច្ចបម្រើដល់ពលរដ្ឋ និងសង្គមជាតិ។
ទោះយ៉ាងនេះក្តី លោក វ៉ា គឹមហុង ទទួលស្គាល់ថា តួនាទីតំណាងរាស្ត្រ គឺមានសិទ្ធិចុះត្រួតពិនិត្យការបោះបង្គោលព្រំដែន ឬតម្រុយព្រំដែន ប៉ុន្តែក៏ត្រូវមានការអនុញ្ញាត ឬក៏ផ្ដល់ការជូនដំណឹងទៅមន្ត្រីជំនាញ ឬសមត្ថកិច្ចមូលដ្ឋានជាមុនផងដែរ មុននឹងចុះបំពេញបេសកកម្មរបស់ខ្លួន។
លោក រ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសមាគមគ្រូបង្រៀន មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៣ ខែមិថុនា ដោយបានគាំទ្រការចុះពិនិត្យបង្គោលព្រំដែន របស់មន្ត្រីបក្សប្រឆាំង និងបានថ្កោលទោស ចំពោះការរារាំងណាមួយពីសមត្ថកិច្ច ឬមន្ត្រីរដ្ឋាភិបាល រំខានដល់ភារកិច្ចរបស់តំណាងរាស្ត្រ។
លោក រ៉ុង ឈុន បញ្ជាក់ឲ្យដឹងដូច្នេះ ៖ «ស្របទៅនឹងច្បាប់ ដែលអ្នកតំណាងរាស្ត្រមានអភ័យឯកសិទ្ធិ មានសិទ្ធិដើរសួរសុខទុក្ខ ក៏ដូចជាដើរស្វែងយល់ ដើរត្រួតពិនិត្យថា តើការបោះបង្គោលព្រំដែនហ្នឹងមានភាពប្រក្រតី ឬមិនប្រក្រតី។ ហើយយកបញ្ហាហ្នឹងដាក់ជូនរាជរដ្ឋាភិបាល ក៏ដូចជាប្រធានគណៈកម្មការព្រំដែនកម្ពុជា»។
ការបោះតម្រុយបង្គោលព្រំដែននេះដែរ លោក កឹម សុខា ប្រធានគណបក្សសិទ្ធិមនុស្ស បានស្នើដល់មន្ត្រីរដ្ឋាភិបាល ក៏ដូចជាមន្ត្រីជំនាញព្រំដែនកម្ពុជា សូមឲ្យបើកទូលាយពីបញ្ហាព្រំដែន ដើម្បីឲ្យសាធារណៈជន មានការយល់ទាំងអស់គ្នា ព្រោះបញ្ហាព្រំដែន ជាបញ្ហាជាតិទាំងមូល មិនត្រូវមានការលាក់កំបាំងឡើយ។
លោក កឹម សុខា មានប្រសាសន៍ដូច្នេះ ៖ «រដ្ឋាភិបាលខ្មែរយើងគួរតែធ្វើបញ្ហាធំៗ របស់ប្រទេសជាតិ ដូចជាបញ្ហាបោះបង្គោលព្រំដែនឲ្យមានតម្លាភាព ឲ្យមានការចូលរួមពីគ្រប់មជ្ឈដ្ឋាន ព្រោះរឿងនេះរឿងជាតិ»។
កាលពីថ្ងៃពុធ ទី២៧ មករា ឆ្នាំ២០១០ តុលាការខេត្តស្វាយរៀង បានកាត់ទោសលោក សម រង្ស៊ី មេដឹកនាំបក្សប្រឆាំង ឲ្យជាប់ពន្ធនាគារ ២ឆ្នាំ និងពលរដ្ឋពីរនាក់ទៀត ក្នុងម្នាក់ៗ ១ឆ្នាំ ចោទពីបទបំផ្លាញទ្រព្យសម្បត្តិសាធារណៈ បន្ទាប់ពីបានដកតម្រុយបង្គោលព្រំដែនកម្ពុជា-វៀតណាមលេខ១៨៥ នៅឃុំសំរោង ស្រុកចន្ទ្រា កាលពីថ្ងៃទី២៥ ខែតុលា ឆ្នាំ២០០៩៕