រដ្ឋមន្រ្តីក្រសួងព័ត៌មាននិងជាអ្នកនាំពាក្យរបស់រដ្ឋាភិបាល លោក ខៀវ កាញារីទ្ធ បានមានប្រសាសន៍ឲ្យដឹងថា រដ្ឋាភិបាលបានរៀបចំជំរំសម្រាប់ឲ្យកងទ័ពចល័តនៅតាមព្រំដែននិងបំពាក់សម្ភារៈបន្ថែមទៀត។
លោក ខៀវ កាញារីទ្ធ មានប្រសាសន៍ដូច្នេះថា ៖ «ប្រាក់ខែរបស់ទាហានយើង វាមិនគ្រប់គ្រាន់ទាំងអស់ទេ កន្លងមកក្នុងពេលដែលសន្តិភាពមែនទែន វាមិនទាន់មានអីនោះ យើងផ្ដោតអំពីការកសាងភូមិសម្រាប់យុទ្ធជនពិការ ដល់ឥឡូវពេលសភាពការណ៍អ៊ីចឹងទៀត ប្រហែលទាំងអស់គ្នាភ្លេចហើយថា លោកជំទាវ ប៊ុន រ៉ានី ហ៊ុន សែន បានចុះទៅធ្វើជំរំទាំងពីលើកោះដាច់ស្រយាល រហូតដល់តាមបណ្ដោយព្រំដែនថៃហ្នឹង ក៏យើងមានធ្វើច្រើនហើយ»។
អ្នកតំណាងរាស្រ្តគណបក្សប្រជាជនកម្ពុជានិងជាប្រធានគណៈកម្មការសេដ្ឋកិច្ចហិរញ្ញវត្ថុ ធនាគារនិងសវនកម្មគឺលោក ជាម យៀប បានមានប្រសាសន៍ថា ប្រទេសកម្ពុជាវិស័យសេដ្ឋកិច្ចនៅមានកម្រិតនៅឡើយ ដូច្នេះថវិកាសម្រាប់ផ្គត់ផ្គង់ទាហានគឺនៅមានការខ្វះខាត។ លោកបានបញ្ជាក់ថា រដ្ឋាភិបាលកំពុងគិតគូរពីបញ្ហានេះហើយ។
លោក ជាម យៀប មានប្រសាសន៍ដូច្នេះថា ៖ «ចៀសមិនផុតទេ ដូចជាប្រទេសយើងក្រីក្រ យើងងើបពីសង្រ្គាម ប្រទេសយើងនៅសេដ្ឋកិច្ចប្រផិតប្រផើយនេះ គឺថាយើងចៀសមិនផុតអំពីការខ្វះខាតទេ។ អ៊ីចឹងទេបានជាកន្លងទៅយើងមានដូចជា គ្រួសារយុទ្ធជនខ្លះ គាត់យកប្រពន្ធ យកកូនគាត់ទៅសមរភូមិមុខ ហើយជាការសោកស្ដាយ»។
អ្នកតំណាងរាស្រ្ដរូបនេះ បានបន្ថែមអំពីថវិកាបម្រុងយ៉ាងដូច្នេះទៀតថា ៖ «ថវិកាសម្រាប់ត្រៀមបម្រុងចំពោះគ្រោះធម្មជាតិ ចំពោះសន្តិសុខនិងការការពារសណ្ដាប់ធ្នាប់សង្គមរបស់យើង យើងមានជូនទៅសម្ដេច ប្រហែលជាខ្ទង់ ៣០០លានដុល្លារសហរដ្ឋអាមេរិកសម្រាប់ពីលើនៅពេលដែលមានអាសន្ន អាចមានលទ្ធភាពចាយទៀត»។
ប៉ុន្តែតំណាងរាស្រ្តគណបក្សសមរង្ស៊ី លោក សុន ឆ័យ បានមានប្រសាសន៍ថា ថវិកាសម្រាប់ផ្តល់ឲ្យពលទាហានសម្រាប់ឆ្នាំ២០០៨នេះ គឺមានគ្រប់គ្រាន់ ប៉ុន្តែការចំណាយមិនចំគោលដៅ ៖ «... គ្នាក៏អត់មានទឹកចិត្តទៅច្បាំងការពារទឹកដីដែរ បើឃើញតែមេមានប្រាក់ដុល្លារ រថយន្តល្អៗ ហើយគ្នាគ្រាន់តែអង្ករច្រកឆ្នាំងចិញ្ចឹមគ្រួសារមិនបាន ហើយឲ្យគ្នាទៅច្បាំងជំនួសគេឯងយ៉ាងម៉េចកើត»។
ទោះបីជាយ៉ាងណា ពលទាហានដែលល្បាតនៅតាមតំបន់ព្រំដែននៃខេត្តទាំងពីរ គឺខេត្តកោះកុងនិងខេត្តបាត់ដំបងបានថ្លែងនិងអំពាវនាវសុំឲ្យមានការផ្តល់ស្បៀងបន្ថែមទៀតជូនដល់ពលទាហានដែលកំពុងឈរជើងនៅខ្សែត្រៀមជួរមុខ។
កងកម្លាំងវរព្រំដែនលេខ៥០២ម្នាក់ សុំមិនបញ្ចេញឈ្មោះប្រចាំការនៅព្រំដែនខ្មែរ-ថៃ តំបន់សែនចៅ ភ្នំបរទុរេន និងភ្នំតាងោលនៃស្រុកសំឡូត ខេត្តបាត់ដំបង បានមានប្រសាសន៍ថា រហូតមកដល់ពេលនេះ ពួកគេនៅតែខ្វះខាតស្បៀងនិងសម្ភារៈប្រើប្រាស់ជាដើម ៖ «មួយខែម្នាក់ សព្វថ្ងៃនេះ បានតែ ៦៥.០០០-៦៧.០០០[រៀល] អស់ហើយ អាហ្នឹងគិតទាំងលុយម្ហូបអីអស់ហើយ។ សំណូមពរឲ្យរាជរដ្ឋាភិបាលគួរគិតគូរពីបញ្ហាហ្នឹងមួយដែរ ហើយសំខាន់អ្នកនៅមុខរាជរដ្ឋាភិបាលគួរគិតខ្លាំងណាស់។ ម្យ៉ាងទៀតសុំឲ្យរដ្ឋាភិបាលជួយគិតគូររឿងការហូបចុក ជួយផ្ដល់ឲ្យបានថា ក្នុងមួយខែហ្នឹង មានមី ត្រីខ ម្ហូបអី ឬមួយក៏ទឹកដោះគោ បួនដប់កំប៉ុងឲ្យបានសមរម្យមក យើងមានបានចុះទៅរកអី នៅលើកំពូលភ្នំ»។
ចំណែកឯពលទាហានមួយរូបទៀតសុំមិនបញ្ចេញឈ្មោះដែរ ប្រចាំការខ្សែត្រៀមជួរមុខនៅព្រំដែននៃភ្នំកោះកុង ឬហៅថា ភ្នំ១០០នៃខេត្តកោះកុង បានមានប្រសាសន៍ប្រហាក់ប្រហែលនឹងពលទាហានប្រចាំការនៅតំបន់ព្រំដែននៃខេត្តបាត់ដំបងដែរថា ដោយមានការខ្វះខាតស្បៀង ពួកគេបានតវ៉ាសុំថ្នាក់ដឹកនាំប្តូរវេនប្រចាំការនិងវិលត្រលប់មកនៅបន្ទាយវិញ តែលោកបានសុំសំណូមពរដល់រដ្ឋាភិបាលជួយផ្ដល់ស្បៀងបន្ថែមទៀតដល់ពួកគេ ពិសេសកងកម្លាំងដែលកំពុងល្បាតនៅជួរមុខមិនអាចរកអ្វីបាន។
ពលទាហានដដែលនេះរៀបរាប់ដូច្នេះថា ៖ «គេឲ្យតែត្រីប្រាយើងទៅម្ដងម្នាក់ចំនួនប្រហែលជា ១គីឡូក្រាមទេ ហើយនិងគ្រឿង មានតែខ្ទឹម មានតែខ្លាញ់ ប៊ីចេង ស្ករ តែប៉ុណ្ណឹង ហើយគ្រឿងប៉ុណ្ណឹងក៏ហូបអត់គ្រាន់ទៀត ទាល់តែយើងទិញខ្លួនឯងថែម។ បញ្ហាស្បៀង គេនៅតែកាត់លុយមួយខែ ៤៥.០០០[រៀល] ហើយនិងអង្ករប្រហែលជា ២០គីឡូ»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺពីមេបញ្ជាការនៃខេត្តកោះកុងបានទេ។ ប៉ុន្តែមេបញ្ជាការយោធភូមិភាគ៥នៃខេត្តបាត់ដំបង គឺលោក ប៊ុន សេង បានមានប្រសាសន៍ថា ពលទាហានប្រចាំការនៅជួរមុខនៅស្រុកសំឡូតនោះពុំមានការខ្វះខាតទេ។
មេបញ្ជាការកងពលអន្តរាគមន៍លេខ១២ នៃកងយោធពលខេមរភូមិន្ទ ដែលគ្រប់គ្រងកម្លាំងទាហានខ្មែររួមនៅតំបន់ប្រាសាទព្រះវិហារ គឺលោកឧត្តមសេនីយ៍ទោ ស្រី ឌឹក បានមានប្រសាសន៍ថា ស្ថានភាពរបស់ទាហានខ្មែរដែលប្រចាំការនៅព្រំដែននោះ ពុំមានការខ្វះខាតអ្វីទេ។
សូមជម្រាបថា ទាហានខ្មែរបានប្រឈមមុខនឹងទាហានថៃនៅតំបន់ព្រំដែនខ្មែរនិងថៃដែលរួមមានទាំងតំបន់ប្រាសាទព្រះវិហារផងនោះ ការប្រឈមមុខដាក់គ្នាផ្នែកយោធានេះ បានចាប់ផ្តើមមានឡើង គឺបន្ទាប់ពីអង្គការយូណេស្កូ បានសម្រេចដាក់ប្រាសាទព្រះវិហារខ្មែរ ចូលទៅក្នុងបញ្ជីបេតិកភណ្ឌពិភពលោករួចមក។
ក្រៅពីការឧបត្ថម្ភពីរដ្ឋាភិបាល ទាហានខ្មែរក៏ទទួលបានជំនួយឧបត្ថម្ភពីសប្បុរសជនក្នុងនិងក្រៅស្រុកផងដែរ សម្រាប់ចំណាយលើការហូបចុកនិងផ្សេងៗទៀត។
ទោះជាយ៉ាងនេះក្តី វិទ្យុអាស៊ីសេរីមិនអាចសុំការបំភ្លឺពីមន្រ្តីជាន់ខ្ពស់ក្រសួងការពារជាតិ គឺលោកឧត្តមសេនីយ៍ នាង ផាត បានទេ ដោយលោកជាប់ប្រជុំ ប៉ុន្តែលោកធ្លាប់ប្រាប់វិទ្យុអាស៊ីសេរី ប្រហាក់ប្រហែលនឹងរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដែរ ដោយទទួលស្គាល់ថា ប្រាក់បៀវត្សរ៍របស់ពលទាហានខ្មែរនៅមានកម្រិតនៅឡើយ ហើយថា ទាហានខ្មែរបច្ចុប្បន្ននេះគឺមានប្រមាណ១០ម៉ឺននាក់។
ទោះជាយ៉ាងណាក៏ដោយ នៅក្នុងគម្រោងថវិកាជាតិសម្រាប់ឆ្នាំ២០០៩ គឺរដ្ឋាភិបាលគ្រោងនឹងបន្ថែមការចំណាយទ្វេដងលើវិស័យយោធា ដែលមានថវិកាសរុបប្រមាណ ៥០០លានដុលា្លរសហរដ្ឋអាមេរិក៕