មន្ត្រីអង្គការការពារសិទ្ធិមនុស្ស អាដហុក ប្រចាំខេត្តបន្ទាយមានជ័យ លោក ស៊ុម ចាន់គា ដែលតែងចេញចូលចំណុចនោះ បានអះអាងថា ការបណ្ដោយឲ្យជនជាតិថៃមកឃ្វាលគោនៅតំបន់នោះ ដោយគ្មានអើពើពីសំណាក់មន្ត្រីមូលដ្ឋានខ្មែរបានធ្វើឡើងជាច្រើនឆ្នាំមកហើយ។
លោកថ្លែងបន្តអំពីការព្រួយបារម្ភរបស់លោកដូច្នេះ ៖ «ប៉ុន្តែបញ្ហាគោដែលនាំមកឃ្វាលស្រុកខ្មែរ មិនដែលមានប្រទេសណាដែលស្រួលដូចស្រុកខ្មែរទេ! ប្រទេសគេគ្មានសិទ្ធិមកឃ្វាលគោ ហាក់ដូចជាព្រំដែនជាភូមិ ឃុំ ស្រុកយ៉ាងនេះទេ។ មានការព្រួយបារម្ភយ៉ាងខ្លាំង ព្រោះថា ចេះតែជ្រុលចូលហើយ សូម្បីតែគោក៏អាចលែងឲ្យមកស៊ីនៅស្រុកខ្មែរបានដែរ វាចប់ហើយ!»។
ការអះអាងដូច្នេះក៏ត្រូវបានមន្ត្រីក្រុមប្រឹក្សាឃុំស្លក្រាម លោក សុ ជាតិ ទទួលស្គាល់ថា មានបញ្ហាដូច្នេះមែន ហើយជួនកាលការឃ្វាលគោក្របីបានធ្វើឡើងចូលមកដល់ទំនប់ ក៥ របស់ខ្មែរ នៅតំបន់អូរបីជាន់ថែមទៀត ប៉ុន្តែលោកថា ក្រុមអ្នកឃ្វាលគោជនជាតិថៃត្រូវគេបណ្ដេញទៅវិញអស់ហើយ នាប៉ុន្មានថ្ងៃចុងក្រោយនេះ។
លោក សុ ជាតិ បានបញ្ជាក់ថា ៖ «ពួកអ្នកកាប់ឧសគេបានប្រទះឃើញ ពួកថៃហ្នឹងចាប់ផ្ដើមវាស់វែងដីចូលមកខាងលិចច្រកតែហាំងហ្នឹងណា៎! ចាប់ផ្ដើមឲ្យពួកទាហានចុះទៅ ដល់ពេលចុះទៅ ឃើញមែន ក៏ពួកទាហានហ្នឹងធ្វើអន្តរាគមន៍ដេញវាចេញទៅ! ដល់ដេញវាចេញទៅ ឥឡូវនេះអត់មានឃើញសកម្មភាពធ្វើអ្វីបន្តទៀតទេ!»។
មេភូមិបឹងស្នោ លោក វ័ន្ត សម្បូរ បានឲ្យដឹងបន្ថែមទៀតថា អាជ្ញាធរក៏មានការបារម្ភអំពីការទន្ទ្រានយកដែនដីពីសំណាក់ប្រទេសថៃដែរ ហើយគេចាប់ផ្ដើមរឹតបន្តឹងការឆ្លងចូលមកព្រំដែនខ្មែរកាលពីប៉ុន្មានថ្ងៃមុន។
លោក វ័ន្ត សម្បូរ បានមានប្រសាសន៍ថា ៖ «កាលណាចូលមកអ៊ីចឹង ខាងប្រដាប់អាវុធយើង ខាងទ័ពការពារព្រំដែនក្តី ខាងប៉ូលិសការពារព្រំដែនក្តី លោកបានព្រមានអ៊ីចឹងណា៎! វាអត់មានឃើញហ្វូងហ្វាយដូចមុន!»។
កាលពីសប្ដាហ៍មុន ក្រុមទាហានថៃបានចូលមកបោះបង្គោលចំនួន ៥ដើមនៅចំណុចភូមិជោគជ័យ ក្នុងឃុំអូរបីជាន់ ស្រុកអូរជ្រៅ ហើយក្រោយមកទៀតកងទាហានខ្មែរកងពលលេខ៥០៣ ក៏បានដកបង្គោលនោះចោលទៅវិញ។ ក្រោយពីកងទាហានខ្មែរដកបង្គោលនោះចោលប្រភពពីក្រុមសិទ្ធិមនុស្សក៏បានបង្ហើបទៀតថា កងទាហានថៃបានប្រើយន្តហោះធ្វើការហោះហើរចូលមកដីខ្មែរនៅតំបន់នោះជាញឹកញយ៕