អ្នកភូមិបុរីកីឡាដែលនៅសេសសល់ កំពុងរស់នៅក្រោមអគារទី៧ ក្នុងប្លុកបុរីកីឡា បានប្រកាសថា ពួកគេនឹងចូលទៅរស់ក្នុងអគារសង់ថ្មីចំនួន២ របស់ក្រុមហ៊ុនផានអ៊ីម៉ិច ប្រសិនបើក្រុមហ៊ុននៅតែមិនដោះស្រាយបញ្ហារបស់ពួកគេ។ ស្របគ្នានោះ ពួកគេក៏បានស្នើសុំអន្តរាគមន៍ដោះលែងអ្នកបុរីកីឡាចំនួន ៧នាក់ ដែលកំពុងជាប់ឃុំក្នុងពន្ធនាគារ។
ការប្រកាសនេះធ្វើឡើងនៅក្នុងសន្និសីទសារព័ត៌មានរបស់ប្លុកបុរីកីឡា នៅខាងមុខអគារទី៨ ខណ្ឌ៧មករា។ អ្នកភូមិបុរីកីឡាដែលភាគច្រើនជាស្រ្តី និងកុមារ បានកាន់រូបថតជនរងគ្រោះជាច្រើនសន្លឹក និងបដារមួយចំនួន ដែលនិយាយពីការទាមទារសំណងពីការអភិវឌ្ឍប្លុកបុរីកីឡា ការឈូសឆាយផ្ទះសម្បែង សំណើអោយមានការស៊ើបអង្កេត និងទាមទារដោះលែងអ្នកជាប់ឃុំ។
ពួកគេនិយាយថា ក្នុងរយៈពេល ៧ថ្ងៃបើនៅតែពុំមានដំណោះស្រាយ ពួកគេទាំងជាង ១០០គ្រួសារ នឹងទៅរស់នៅអគារសង់ថ្មីចំនួនពីរ៖ «និយាយថា ពួកខ្ញុំជាជនអនាមិក បើអ៊ីចឹងខ្ញុំនឹងនាំពួកបងប្អូនខ្ញុំទៅស្នាក់នៅក្រោមអគារទី៩ ទី១០ កុំអោយគេថា ខ្ញុំជាជនអនាមិកទៀត ព្រោះខ្ញុំជាជនរងគ្រោះ»។
ការទាមទាររបស់អ្នកភូមិបុរីកីឡា ធ្វើឡើងនៅខណៈពេលអគារថ្មីចំនួន២ ត្រូវគេសាងសង់នៅខាងជើងអគារទី៨។
ក្រុមអ្នកភូមិបានចោទសួរថា តើក្រុមហ៊ុនផានអ៊ីម៉ីច ក្ស័យធនពិតប្រាកដដែរ ឬទេ? បើក្ស័យធនហេតុអ្វីក្រុមហ៊ុនបន្តសាងសង់អគារថ្មី? តើអគារថ្មីនោះសម្រាប់អ្នកណា ៖ «គាត់សាងសង់ដើម្បីប្រជាពលរដ្ឋ ឬដើម្បីអ្វី? ព្រោះគាត់បានប្រាប់ទៅរដ្ឋាភិបាលថា ក្ស័យធន ឥឡូវម៉េចក៏សាងសង់អគារទី៨នេះ? ខ្ញុំឈឺចាប់ណាស់ សូមអោយគាត់ឆ្លើយនឹងប្រជាពលរដ្ឋ តំណាងក្រុមហ៊ុនចុះមកទាំងអស់គ្នាមក»។
ស្របគ្នានេះ ក្រុមគ្រួសារអ្នកដែលជាប់ឃុំក៏បានអំពាវនាវរកអន្តរាគមន៍ដោះលែងអ្នកភូមិបុរីកីឡា ដែលកំពុងជាប់ឃុំ។ ពួកគេទាំង ៧នាក់ ត្រូវចាប់ខ្លួននៅក្នុងការប៉ះទង្គិចដោយហិង្សា នៅពេលអាជ្ញាធរឈូសឆាយផ្ទះសម្បែងពួកគេកាលពីថ្ងៃទី៣ ខែមករា ឆ្នាំ២០១២៖ «ខ្ញុំខុសអីបានជាឈូសផ្ទះខ្ញុំហើយចាប់ប្តីខ្ញុំទៀត»។
អ្នកភូមិឈ្មោះ ប្រាក់ ស៊ីណាត បាននិយាយទាំងទឹកភ្នែកថា ប្តីអ្នកស្រីត្រូវគេចាប់យកទៅឃុំខ្លួននៅពន្ធនាគារព្រៃសដោយពុំមានកំហុស។
ក្រុមគ្រួសារអ្នកដែលកំពុងជាប់ឃុំនិយាយថា ក្រុមហ៊ុនធ្លាប់ចរចារអោយពួកគេបញ្ឈប់ការតវ៉ា និងចាកចេញពីប្លុកបុរីកីឡា ដោយសន្យាផ្តល់ប្រាក់ ១.៥០០ដុល្លារក្នុងមួយគ្រួសារ និងដោះលែងអ្នកជាប់ឃុំទាំង ៧នាក់។
វិទ្យុអាស៊ីសេរីមិនទាន់អាចសុំការអធិប្បាយពីអ្នកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច បាននៅឡើយទេ។
ចៅសង្កាត់វាលវង់ អ្នកស្រី កែវ សាកល បានទៅឃ្លាំមើលសកម្មភាពអ្នកភូមិបុរីកីឡា។ អ្នកស្រីមានប្រសាសន៍នៅព្រឹកថ្ងៃព្រហស្បតិ៍ ទី១៦ ខែកុម្ភៈ ថា អ្នកស្រីចង់អោយអ្នកភូមិ និងភាគីក្រុមហ៊ុនពិភាក្សាគ្នា ដោះស្រាយបញ្ហានេះដោយសន្តិវិធី៖ «ហើយអ្នកដែលមានលក្ខណៈសម្បត្តិគ្រប់គ្រាន់ តស៊ូជាមួយក្រុមហ៊ុនយកបង្ហាញឯកសារជូនគាត់ ថា ត្រូវដោះស្រាយខ្ញុំប្រភេទហ្នឹងយ៉ាងម៉េច? នេះជាវិធីដ៏ល្អមួយដែលយើងត្រូវតែជជែកគ្នា។ គេរំដោះប្រទេសបានរឿងអីធ្វើការងារប៉ុណ្ណឹងមិនបាន»។
អ្នកភូមិបុរីកីឡាក៏បានថ្លែងការណ៍តាមរយៈលខិតចំហមួយ មានស្នាមមេដៃតំណាងអ្នកភូមិចំនួន ៦នាក់។ ពួកគេស្នើរដ្ឋាភិបាលអន្តរាគមន៍ផ្តល់ដំណោះស្រាយជាបន្ទាន់ ដោយបញ្ជាក់ថា ក្រុមហ៊ុនផានអ៊ីម៉ិច មិនគោរពកិច្ចសន្យាក្នុងការសាងសង់អគារ និងរំលោភឈូសឆាយបំផ្លាញផ្ទះសម្បែងដោយខុសច្បាប់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។