លោកវរសេនីយ៍ត្រី កែវ ធា ជាប្រធានការិយាល័យប្រឆាំងការជួញដូរមនុស្សនៃស្នងការនគរបាលរាជធានីភ្នំពេញ មានប្រសាសន៍ថា បុរសជនជាតិអង់គ្លេសរូបនោះ ត្រូវបានចាប់ខ្លួនកាលពីថ្ងៃច័ន្ទកន្លងមក នៅឯផ្ទះសំណាក់មួយក្នុងខេត្តព្រះសីហនុ បន្ទាប់ពីកុមារីជាជនរងគ្រោះបានផ្តល់ព័ត៌មានដល់ប៉ូលិស។
លោក កែវ ធា មានប្រសាសន៍ដូច្នេះថា ៖ «យើងមានការអនុញ្ញាតពីអយ្យការក្រុងភ្នំពេញ ឲ្យពន្លាតដែនដីសមត្ថកិច្ច ឲ្យសហការជាមួយនឹងព្រះរាជអាជ្ញា និងអាជ្ញាធរដែនដីក្រុងព្រះសីហនុ ហើយយើងបាននាំខ្លួនគាត់ឡើងមកភ្នំពេញ ធ្វើការសាកសួរតាំងពីល្ងាចថ្ងៃច័ន្ទ ហើយដល់ថ្ងៃអង្គារ បានយើងឆែកឆេរផ្ទះគាត់បន្តិច ហើយបានយើងឡើងមកភ្នំពេញតែម្ដង។ ហើយព្រឹកមិញ យើងបានបញ្ជូនគាត់ទៅព្រះរាជអាជ្ញាក្រុងភ្នំពេញ»។
លោកវរសេនីយ៍ត្រី កែវ ធា មានប្រសាសន៍បន្តថា ចៅក្រមស៊ើបសួរនៃតុលាការក្រុងភ្នំពេញ កំពុងបន្តនីតិវិធីសាកសួរបុរសជនជាតិអង់គ្លេសឈ្មោះ Gareth Ashley Corbett នៅឡើយ ៖ «ខាងយើងបាននាំគាត់បញ្ជូនទៅតុលាការហើយ ហើយតុលាការបានសាកសួរគាត់ហើយ ហើយយើងរង់ចាំសេចក្ដីសម្រេចរបស់ចៅក្រមថាគួរធ្វើយ៉ាងម៉េចតទៅទៀត»។
ទាន់ទិនបញ្ហាការជួញដូរមនុស្សនិងការប្រព្រឹត្តអំពើអនាចារលើកុមារខ្មែរនេះ នៅក្នុងដំណើរទស្សនកិច្ចទៅកាន់ខេត្តព្រះសីហនុកាលពីថ្ងៃទី២០ ខែកក្កដានេះ ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជា គឺលោកស្រី Carol Rodley បានថ្លែងសរសើររដ្ឋាភិបាលខ្មែរដែលប្តេជ្ញាសហការជាមួយសហរដ្ឋអាមេរិកក្នុងការប្រយុទ្ធប្រឆាំងការជួញដូរមនុស្សនិងអំពើអនាចារលើកុមារនេះ។
ប៉ុន្តែលោកស្រីឯកអគ្គរដ្ឋទូត Carol Rodley ក៏បានសម្តែងកង្វល់ដែរថា ខេត្តព្រះសីហនុកំពុងក្លាយជាកន្លែងដ៏គ្រោះថ្នាក់សម្រាប់កុមារនិងយុវជន ដែលពួកគេត្រូវរងគ្រោះដោយសារតែភាពក្រីក្រ ការជួញដូរនិងការរំលោភបំពានពីជនបទេសដែលញៀនការរួមភេទនោះ។
លោកស្រីឯកអគ្គរដ្ឋទូតថ្លែងបន្តថា បញ្ហានេះក៏បណ្តាលមកពីឪពុកម្តាយមួយចំនួនដែលបានស្ម័គ្រចិត្តលក់កូនឯងដើម្បីប្រាក់នោះដែរ។
យោងតាមលោកវរសេនីយ៍ត្រី កែវ ធា ចាប់តាំងពីឆ្នាំ២០០៣មក យ៉ាងហោចមានជនបរទេសជាង១០នាក់ហើយ ដែលរួមមានទាំងបុរសជនជាតិរុស្ស៊ី អង់គ្លេស និងអាមេរិកផង ដែលត្រូវបានតុលាការកម្ពុជាផ្ដន្ទាទោសពីបទប្រព្រឹត្តអំពើអនាចារលើកុមារខ្មែរ៕