អគាររោងចក្រកាត់ដេរនេះ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។ ការបាក់ផ្នែកខ្លះនៃអគារថ្មីនេះ មិនបណ្ដាលឲ្យមានមនុស្សគ្រោះថ្នាក់ឡើយ។
ស្នងការនគរបាលរាជធានីភ្នំពេញ ឧត្ដមសេនីយ៍ ទូច ណារ៉ុថ មានប្រសាសន៍ថា អគារបាក់រលំនោះ គេសង់ធ្វើជារោងចក្រកាត់ដេររបស់ក្រុមហ៊ុនមួយ ដែលលោកមិនទាន់ដឹងឈ្មោះពិតប្រាកដនៅឡើយ។ លោកបន្តថា គេនៅមិនទាន់ដឹងអំពីមូលហេតុនៃការបាក់រលំនោះនៅឡើយទេ ៖ "វាសាងសង់អត់ទាន់ហើយ។ វាមានការបាក់រលំ ដូច្នេះយើងនឹងរៀបចំគណៈកម្មការមួយ ដើម្បីត្រួតពិនិត្យថាតើមូលហេតុនៃការបាក់ហ្នឹងដោយបច្ចេកទេស ឬក៏សាងសង់ខ្វះគុណភាពអី ក៏វាស្ថិតក្នុងលក្ខណៈបច្ចេកទេសនឹងដែរ។ ដូច្នេះយើងនឹងអញ្ជើញក្រុមហ៊ុនដើម្បីសហការជាមួយយើង ស៊ើបអង្កេតថាតើក្រុមហ៊ុនហ្នឹងឲ្យខាងណាមកសាងសង់ យ៉ាងម៉េចអី យើងនឹងត្រួតពិនិត្យតាមក្រោយ។ ហើយខ្ញុំជឿថា ក្រុមហ៊ុនគេនឹងប្តឹងអ្នកម៉ៅការសាងសង់ហ្នឹង"។
លោកស្នងការប៉ូលិសរាជធានីភ្នំពេញបានបន្តថា អគាររលំនោះសង់ជញ្ជាំងអំពីថ្ម ដំបូលប្រក់ស័ង្កសី។ ដោយសារក្នុងអគារមិនទាន់មានកម្មករចូលធ្វើការ ទើបគ្មានអ្នករងរបួស។ អគារនេះមានទំហំទទឹង ៤០ម៉ែត្រ បណ្ដោយ ១៦០ម៉ែត្រ បានបាក់ផ្នែកពាក់កណ្ដាលអគារអស់ប្រមាណ ១០០ម៉ែត្រ។ អគារនេះគ្រោងបើកដំណើរការជារោងចក្រកាត់ដេរនៅដើមខែ មីនា ឆ្នាំ២០១២ នេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។