ជាពិសេស ទំនប់វារីអគ្គិសនីអាតៃ ក្នុងស្រុកវាលវែង ខេត្តពោធិ៍សាត់ ដែលកំពុងជួបបញ្ហាបច្ចេកទេសបែកបំពង់ ឬលូបង្ហូរទឹកចេញ បណ្ដាលឲ្យកម្មកររងរបួស និងបាត់ខ្លួននៅតំបន់សាងសង់ទំនប់វារីអគ្គិសនីនោះប្រមាណ ៣នាក់ ហើយរហូតមកដល់ពេលនេះ គេរកពុំទាន់ឃើញនៅឡើយ។
តំណាងរាស្ត្រគណបក្សប្រឆាំង ចង់ឲ្យអាជ្ញាធរដែលជាប់ពាក់ព័ន្ធនឹងការសាងសង់ទំនប់វារីអគ្គិសនីអាតៃ របស់ក្រុមហ៊ុនចិន ផ្អាកដំណើរការសាងសង់ទំនប់នេះបណ្ដោះអាសន្ន។
លោក សុន ឆ័យ តំណាងរាស្ត្រមកពីគណបក្ស សម រង្ស៊ី មានប្រសាសន៍នៅថ្ងៃអង្គារ ទី៤ ធ្នូ ថា រាល់សំណង់ដែលសាងសង់ដោយក្រុមហ៊ុនចិន មិនអាចឲ្យទុកចិត្តបានឡើយ៖ «ធម្មតានៅពេលមានបញ្ហាបែបហ្នឹង គេមិនត្រូវឲ្យក្រុមហ៊ុនធ្វើព្រងើយអ៊ីចឹងទេ គេត្រូវផ្អាកការសាងសង់ភ្លាម ហើយគេមានក្រុមបច្ចេកទេសចុះទៅអង្កេតជាផ្លូវការចំពោះការសាងសង់នោះវិញ»។
វិទ្យុអាស៊ីសេរី ពុំទាន់អាចទាក់ទងរដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម ដើម្បីសុំការពន្យល់ពីបញ្ហានេះបានទេ នៅថ្ងៃអង្គារ ទី៤ ធ្នូ។
ចំណែកអភិបាលខេត្តពោធិ៍សាត់ លោក ខូយ សុខា ក៏មិនហ៊ានអះអាងថាយ៉ាងណាឡើយ ចំពោះសំណើរបស់គណបក្សប្រឆាំងនេះ ដោយលោកមានប្រសាសន៍ថា នេះជាកិច្ចការរបស់រដ្ឋាភិបាលជាមួយក្រុមហ៊ុនចិន ដែលមានកិច្ចសន្យាត្រឹមត្រូវ និងមានលក្ខណៈបច្ចេកទេស៖ «តាមពិត វាជារឿងក្រុមហ៊ុនដែលគេទទួលខុសត្រូវរបស់គេទេ សំខាន់កុងត្រារបស់ក្រុមហ៊ុនជាមួយរដ្ឋាភិបាល ថាពេលធ្វើហើយគេនឹងលក់ភ្លើងមកយើងហើយ អ៊ីចឹងរឿងនេះវាអាស្រ័យលើក្រុមហ៊ុនទេ ព្រោះក្រុមហ៊ុនមានអាអ្នកធ្វើអ្នកអង្កេតអីអស់ហ្នឹង»។
កាលពីថ្ងៃសៅរ៍ ទី១ ធ្នូ នៅពេលក្រុមបច្ចេកទេសដំណើរការសាកល្បងប្រើប្រាស់ទ្វារទឹកទីមួយ នៅតំបន់ទំនប់វារីអគ្គិសនីស្ទឹងអាតៃ នោះ ប៉ុន្តែនៅពេលចាប់ដំណើរការ ធ្វើឲ្យបំពង់ ឬលូបណ្ដោះទឹកចេញពីទ្វារទឹកទីមួយនោះ ត្រូវបែកធ្លាយប្រវែងប្រមាណជាង ១០ម៉ែត្រ ពេលនោះកម្លាំងទឹកក៏បុកចេញខ្លាំង បណ្ដាលឲ្យខូចខាតទ្រព្យសម្បត្តិក្នុងការដ្ឋាន ហើយកម្មករធ្វើការនៅទីនោះរងរបួសធ្ងន់ប្រមាណ ៤នាក់ និងបាត់ខ្លួនកម្មករប្រមាណ ៣នាក់ រហូតមកដល់រសៀលថ្ងៃអង្គារ ទី៤ ធ្នូ រកមិនទាន់ឃើញនៅឡើយ។
លោក សុន ឆ័យ គ្រោងដឹកនាំអ្នកជំនាញទៅអង្កេតមើលការសាងសង់ទំនប់វារីអគ្គិសនីអាតៃ នោះនៅពេលដ៏ឆាប់ខាងមុខ៖ «ខ្ញុំនឹងទៅ ព្រោះខ្ញុំនៅមានកម្មវិធីទំនប់ហ្នឹង មិនដូចរដ្ឋាភិបាលឆ្លើយជាមួយខ្ញុំថាបក្សប្រឆាំងចេះតែប្រឆាំងឲ្យតែធ្វើទំនប់បង្កើតអគ្គិសនី ហើយចេះតែប្រឆាំង មិនមែនទេ ខ្ញុំមានការយកចិត្តទុកដាក់រឿងបរិស្ថាន រឿងចំណេញខាតដែរ»។
ទំនប់វារីអគ្គិសនីស្ទឹងអាតៃ ខេត្តពោធិ៍សាត់ បានដំណើរការសាងសង់អស់រយៈពេលជាច្រើនឆ្នាំមកហើយ ដោយក្រុមហ៊ុនចិន។ ទំនប់នេះមានកម្លាំងថាមពលភ្លើង ១២០មេហ្គាវ៉ាត់ ហើយផ្នែកខ្លះនៃទំនប់នេះ អាចនឹងដំណើរការបាននៅដើមឆ្នាំ២០១៣ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។