បុរសឈ្មោះ តាន់ នីឡុង អាយុ៥៥ឆ្នាំ ដែលអាជ្ញាធរខ្មែរឲ្យដឹងថា ជាមនុស្សរស់នៅក្នុងក្រុង Oakland នៃរដ្ឋ California សហរដ្ឋអាមេរិក បានសារភាពថា គាត់ពិតជាបានលបយកសាំងដុតលើគូដណ្តឹងរបស់គាត់ដែលមានអាយុ២១ឆ្នាំនោះមែន ដោយសារតែភាគីខាងស្រីរស់នៅភូមិបែកចាន ឃុំព្រះស្តេច ខេត្តបាត់ដំបងនោះ បានផ្តាច់ពាក្យមិនព្រមរៀបការជាមួយគាត់។
នាយការិយាល័យកងរាជអាវុធហត្ថខេត្តលោក តាន់ សុផល បានប្រាប់អ្នកយកព័ត៌មាននៅថ្ងៃអង្គារនេះថា គេមានភស្តុតាងគ្រប់បែបយ៉ាងទាក់ទងនឹងសកម្មភាពរបស់អាណិកជនខ្មែរអាមេរិកនោះ ដែលបានធ្វើទៅលើនាងគូដណ្តឹងឈ្មោះ យ៉ាន់ គឹមហ៊ាន កាលពីចុងសប្តាហ៍កន្លងមក។
លោក តាន់ សុផល មានប្រសាសន៍ដូច្នេះថា ៖ «តាន់ នីឡុង គាត់អាយុ ៥៥ឆ្នាំ អាណិកជនរស់នៅអកឡែន កាលីហ្វ័រញ៉ា។ គាត់មិនទាន់មានសញ្ជាតិអាមេរិកាំងទេ គាត់គ្រាន់តែមានសិទ្ធិជ្រកកោន កាន់ Green Card ហើយប៉ាស្ព័រ ប្រើប៉ាស្ព័រខ្មែរយើង។ កើតមកពីការប្រចណ្ឌ។ ប្រើសាំង ៥លីត្រ ក្នុងប៊ីដុងដាក់សាំងក្រអូប ប្រើប៊ីដុងច្រក យកការ៉ុងរុំពីលើ ហើយដឹកម៉ូតូយកទៅ មានកូនកាំបិតមួយផង កូនកាំបិតចិតបន្លែ កូនកាំបិតរបស់ថៃ។ នៅកន្លែងកើតហេតុវាបន្សល់វត្ថុតាង គឺការ៉ុង ប៊ីដុងឆេះខ្លោចអស់បន្តិច ហើយនិងកូនកាំបិតមួយ»។
សូមបញ្ជាក់ថា ក្នុងព្រឹត្តិការណ៍ចាក់សាំងប៉ុនប៉ងសម្លាប់នោះ ស្ត្រីជាគូដណ្តឹងនិងប្អូនស្រីម្នាក់ដែលបានឃើញហេតុការណ៍ត្រូវភ្លើងឆេះរលាកខ្លួន ហើយត្រូវគេបញ្ជូនមកព្យាបាលនៅក្នុងមន្ទីរពេទ្យមួយក្នុងរាជធានីភ្នំពេញ។ ក្រុមគ្រួសារជនរងគ្រោះបានដាក់បណ្ដឹងទាមទារប្រាក់សំណងចំនួន២៥ម៉ឺនដុល្លារអាមេរិក។
មន្ត្រីសមត្ថកិច្ចខ្មែរបានឲ្យដឹងទៀតថា គេបានទាក់ទងនឹងស្ថានទូតអាមេរិកចំពោះករណីដែលទាក់ទងនឹងឈ្មោះ តាន់ នីឡុង នោះ ដោយបានយល់ព្រមឲ្យអាជ្ញាធរខ្មែរអនុវត្តតាមច្បាប់កម្ពុជាដោយសារតែខ្មែររស់នៅក្នុងសហរដ្ឋអាមេរិកនោះមិនទាន់បានចូលសញ្ជាតិអាមេរិកាំងនៅឡើយ៕