មន្ត្រីខេត្តរតនគិរីឲ្យដឹងថា ពិព័រណ៍ផលិតផលនៃប្រទេសក្នុងតំបន់ត្រីកោណអភិវឌ្ឍន៍កម្ពុជា វៀតណាម និងលាវ នឹងប្រារព្ធធ្វើរយៈពេល៣ថ្ងៃនៅក្នុងបរិវេណមន្ទីរវប្បធម៌ខេត្តរតនគិរី។
ពិធីនេះនឹងបើកសម្ពោធជាផ្លូវការនៅថ្ងៃសៅរ៍ ទី១៣ ខែមីនា ឆ្នាំ២០១០ ដោយមានតំណាងប្រតិភូមកពីខេត្តចំនួន១៣នៃប្រទេសក្នុងតំបន់ត្រីកោណអភិវឌ្ឍន៍ចូលរួម និងនាំយកផលិតផលពីបណ្តាខេត្តរបស់ខ្លួនមកដាក់តាំងជូនទស្សនា និងលក់ជូនដល់ប្រជាពលរដ្ឋ មន្ត្រីរាជការនិងអ្នកទេសចរដែលបានទៅចូលរួមពិធីតាំងពិព័រណ៍នោះ។
នាយខុទ្ទកាល័យសាលាខេត្តរតនគិរី លោក ណាប់ ប៊ុនហេង មានប្រសាសន៍ថា ការរៀបចំឲ្យមានពិព័រណ៍ថ្នាក់តំបន់នេះ ផ្តូចផ្តើមឡើងដោយគណៈកម្មាធិការជាតិសម្រួបសម្រួលនៃប្រទេសកម្ពុជា ដើម្បីទាក់ទាញការវិនិយោគទុននិងវិស័យទេសចរណ៍នៅតំបន់ត្រីកោណអភិវឌ្ឍន៍នេះ។
លោក ណាប់ ប៊ុនហេង មានប្រសាសន៍ដូច្នេះ ៖ «ខាងកណៈកម្មាធិការជាតិសម្របសម្រួលរបស់កម្ពុជាហ្នឹង គឺកម្មវិធីឲ្យមានពិព័រណ៍នេះ គឺចូលរួមពី១៣ខេត្តនៃតំបន់ត្រីកោណអភិវឌ្ឍន៍ពីអាស៊ីហ្នឹង។ ពិព័រណ៌នេះគឺជាពិព័រណ៍ផលិតផលរបស់ខេត្តនីមួយ...។ ជាឱកាសនៃការទាក់ទាញវិនិយោគ»។
ខេត្តចំនួន១៣នៃប្រទេសក្នុងតំបន់ត្រីកោណអភិវឌ្ឍន៍ប្រទេសកម្ពុជា មានខេត្តរតនគិរី ស្ទឹងត្រែង មណ្ឌលគិរីនិងក្រចេះ។ ប្រទេសវៀតណាម មានខេត្តយ៉ាឡាយ ខេត្តកងទុម ខេត្តដាក់ឡាក់ ខេត្តដាក់ណុងនិងខេត្តបិញហ្វឿក និងប្រទេសលាវមានខេត្តចំប៉ាសាក់ ខេត្តអត្តពើ ខេត្តសេកងនិងខេត្តសារ៉ាវ៉ាន់។
ប្រធានមន្ទីរពាណិជ្ជកម្មខេត្តរតនគិរី លោក តូ ធាឡុំ មានប្រសាសន៍បញ្ជាក់ថា ផលិតផលកសិកម្មកសិឧស្សាហកម្មនិងសិប្បកម្មនៃប្រទេសទាំងបីនឹងត្រូវដាក់តាំងក្នុងពិព័រណ៍ពីថ្ងៃទី១៣ ដល់ថ្ងៃទី១៥ ខែមីនា ឆ្នាំ២០១០ ដើម្បីស្វែងរកទីផ្សារសម្រាប់ផលិតផលទាំងនោះ។
លោក តូ ធាឡុំ បញ្ជាក់ដូច្នេះ ៖ «ការដាក់តាំងពិព័រណ៍ហ្នឹងមានសារសំខាន់ណាស់ និយាយរួមគឺរកទីផ្សារសម្រាប់ផលិតផលរបស់យើង សម្រាប់តំបន់ត្រីកោណហ្នឹង។ លាវ វៀតណាម ក៏គេយកផលិតផលរបស់គេយកមកដាក់តាំងដែរ»។
នេះជាលើកទី១ហើយដែលខេត្តរតនគិរី បានរៀបចំពិធីតាំងពិព័រណ៍ផលិតផលមកពីបណ្តាខេត្តនៃប្រទេសក្នុងតំបន់ត្រីកោណអភិវឌ្ឍន៍កម្ពុជា វៀតណាមនិងលាវ។
ប្រភពពីមន្ត្រីទេសចរណ៍ខេត្តរតនគិរី ឲ្យដឹងថា បន្ទប់សណ្ឋាគារ ផ្ទះសំណក់ជាង៦០០បន្ទាប់បានជួលកក់បម្រុងអស់សម្រាប់គណៈប្រតិភូប្រទេសទាំងបីដែលបានមកចូលរួមតាំងពិព័រណ៍នេះ។
តាមការគ្រោងទុក នៅក្នុងឱកាសប្រារព្ធពិធីតាំងពិព័រណ៍នេះ ក៏មានដាក់បញ្ជូលកម្មវិធីវេទិកាយុវជននៃប្រទេសតំបន់ត្រីកោណអភិវឌ្ឍន៍កម្ពុជា-វៀតណាមនិងលាវ ដើម្បីប្រជុំពិភាក្សាគ្នាផ្លាស់ប្តូរបញ្ជ្រាបទស្សនៈនិងបទពិសោធន៍ជុំវិញកិច្ចអភិវឌ្ឍន៍របស់ក្រុមយុវវ័យនៃប្រទេសទាំងបី រួមចំណែកធ្វើឲ្យមានការរីកចម្រើនទៅថ្ងៃអនាគតថែមទៀត៕