រដ្ឋលេខាធិការក្រសួងពាណិជ្ជកម្មកម្ពុជា លោក ម៉ៅ ថូណា មានប្រសាសន៍ប្រាប់វិទ្យុអាស៊ីសេរី នៅថ្ងៃទី១១ ខែមិថុនានេះថា គម្រោងនៃការបង្កើតតុលាការនេះនឹងដាក់ចូលទៅធនាគារអភិវឌ្ឍន៍អាស៊ី នៅពេលដែលរដ្ឋាភិបាលធ្វើបច្ចុប្បន្នភាពប្រាក់ជំនួយជាមួយធនាគារអភិវឌ្ឍន៍អាស៊ីនៅដំណាច់ឆ្នាំនេះ។
លោក ម៉ៅ ថូណា មានប្រសាសន៍ដូច្នេះ ៖ «តុលាការពាណិជ្ជកម្ម ដល់ពេលគេធ្វើ update (បច្ចុប្បន្នភាព) កម្មវិធីជំនួយរបស់ធនាគារ ADB ប្រហែលជាដាច់ឆ្នាំ ហើយដល់ដាច់ឆ្នាំហ្នឹងខ្ញុំបញ្ចូលគម្រោងបង្កើតតុលាការពាណិជ្ជកម្មហ្នឹង ចូលទៅក្នុងគម្រោងជំនួយរបស់ ADB»។
ការបង្កើតតុលាការពាណិជ្ជកម្ម គឺជាលក្ខខណ្ឌមួយដែលអង្គការពាណិជ្ជកម្មពិភពលោកកំណត់នៅពេលដែលប្រទេសកម្ពុជា បានចូលជាសមាជិកនៃអង្គការពាណិជ្ជកម្មពិភពលោក កាលពីឆ្នាំ២០០៤។ ព្រោះថា ប្រទេសជាសមាជិកអង្គការពាណិជ្ជកម្មពិភពលោកទាំងអស់ តម្រូវឲ្យបង្កើតតុលាការពាណិជ្ជកម្ម ដើម្បីធានាបរិយាកាសនៃដំណើរការពាណិជ្ជកម្មឲ្យបានសុក្រឹត និងកក់ក្តៅសម្រាប់អ្នកវិនិយោគិនជាតិ និងអន្តរជាតិ៕