អ្នកនាំពាក្យក្រសួងការពារជាតិ លោក ឈុំ សុជាត នៅថ្ងៃពុធ ទី១១ ខែសីហា បានប្ដេជ្ញាថា កងទ័ពកម្ពុជា នឹងមិនដកថយពីតំបន់ជម្លោះក្បែរប្រាសាទព្រះវិហារ ទៅតាមការទាមទាររបស់នាយករដ្ឋមន្ត្រីថៃទេ ហើយថែមទាំងព្រមានតបទៅវិញថា កម្ពុជានឹងធ្វើការប្រយុទ្ធតបតនឹងកងទ័ពថៃ ប្រសិនបើកងទ័ពថៃ ចូលឈ្លានពានមកលើទឹកដីកម្ពុជា។
ការព្រមានរបស់មន្ត្រីក្រសួងការពារជាតិ ធ្វើឡើងឆ្លើយតបទៅនឹងការលើកឡើងរបស់លោក អាភីស៊ិត វ៉េតឆាឈីវ៉ាក់ (Abhisit Vejjajeva) ដែលថា អាជ្ញាធរថៃ កំពុងព្យាយាមជម្លៀសកងទ័ពកម្ពុជា ដែលកំពុងឈរជើងនៅតំបន់ក្បែរប្រាសាទព្រះវិហារ ពីព្រោះកងទ័ពកម្ពុជា បានរំលោភចូលទឹកដីខ្លួន។
លោក អាភីស៊ិត វ៉េតឆាឈីវ៉ាក់ បានបន្ទោសថា វិបត្តិព្រំដែនកើតឡើងដោយសារកម្ពុជា បានរំលោភចូលទឹកដីខ្លួន ដូច្នេះថៃ នឹងការពារទឹកដីរបស់ខ្លួន ដោយប្រើមធ្យោបាយសន្តិវិធី។
ការលើកឡើងរបស់លោក អាភីស៊ិត វ៉េតឆាឈីវ៉ាក់ ចំពោះការប្រើប្រាស់មធ្យោបាយសន្តិវិធីក្នុងការដោះស្រាយជម្លោះព្រំដែន វាផ្ទុយនឹងការព្រមានរបស់ខ្លួន កាលពីសប្ដាហ៍មុនថា ថៃនឹងប្រើកម្លាំងយោធា ដើម្បីដោះស្រាយបញ្ហាព្រំដែនជាមួយកម្ពុជា។
សារព័ត៌មានរបស់សហរដ្ឋអាមេរិក AP នៅថ្ងៃអង្គារ ទី១០ សីហា បានដកស្រង់សម្ដីលោក អាភីស៊ិត វ៉េតឆាឈីវ៉ាក់ ថា ជាដំបូងថៃ នឹងប្រើប្រាស់ដំណោះស្រាយដោយសន្តិវិធីក្នុងការការពារទឹកដីរបស់ខ្លួន។ ប៉ុន្តែប្រសិនបើកម្ពុជា ចង់បញ្ចៀសការប្រឈមមុខដាក់គ្នារវាងកម្ពុជា និងថៃ កម្ពុជាត្រូវតែចាកចេញពីទឹកដីថៃ។
លោក ឈុំ សុជាត អ្នកនាំពាក្យក្រសួងការពារជាតិកម្ពុជា បញ្ជាក់ថា កងទ័ពកម្ពុជា នឹងបន្តឈរជើងនៅតំបន់ក្បែរប្រាសាទព្រះវិហារ ដើម្បីការពារបូរណភាពកម្ពុជា។
អ្នកនាំពាក្យក្រសួងការបរទេស លោក កុយ គួង នៅថ្ងៃពុធ ទី១១ ខែសីហានេះ ក៏បានបញ្ជាក់ដែរថា កងទ័ពកម្ពុជា នឹងមិនចល័តកងទ័ពចេញពីតំបន់ក្បែរប្រាសាទព្រះវិហារទេ។ លោកថា ប្រជាពលរដ្ឋកម្ពុជា បានតាំងទីលំនៅក្បែរប្រាសាទព្រះវិហារ មុនការចុះអនុស្សរណៈរវាងកម្ពុជា និងថៃ នៅឆ្នាំ២០០០។
លោក ឈុំ សុជាត និងលោក កុយ គួង មានប្រសាសន៍ដូចគ្នាថា កម្ពុជានឹងបន្តការចំណាយក្នុងវិស័យការពារជាតិ ទោះបីជាជម្លោះនេះបានអូសបន្លាយអស់រយៈពេលជាង ២ឆ្នាំមកហើយក្តី។
រដ្ឋាភិបាលកម្ពុជា បានសម្រេចបង្កើតសម្ព័ន្ធមេត្រីភាពរវាងកងទ័ព និងក្រុមហ៊ុនសប្បុរសជន ប្រយោជន៍ដើម្បីជួយរំលែកការចំណាយរបស់កម្ពុជា ក្នុងវិស័យការពារជាតិ។ រដ្ឋសភាកម្ពុជា បានអនុម័តទឹកប្រាក់ប្រមាណ ៥០០លានដុលា្លរសម្រាប់វិស័យសន្តិសុខ និងការពារជាតិនៅឆ្នាំ២០១០។
កម្ពុជាគ្រោងនឹងបង្កើតថវិកាជាតិនៅឆ្នាំក្រោយ ប៉ុន្តែនៅមិនទាន់មានព័ត៌មានស្តីពីការដំឡើងថវិកាក្នុងវិស័យការពារជាតិនៅឡើយទេ។
មកទល់ពេលនេះ មានក្រុមហ៊ុនជាង ៤០ បានចងសម្ព័ន្ធមេត្រីជាផ្លូវការជាមួយយោធាកម្ពុជាហើយ។
លោក ឈុំ សុជាត ថា កងទ័ពកម្ពុជាត្រូវការសប្បុរសជន ដើម្បីជួយឧបត្ថម្ភដោយស្ម័គ្រចិត្ត ក្នុងវិស័យការពារជាតិបន្ថែមទៀត។
សង្គ្រាមពាក្យសម្ដីរវាងកម្ពុជា និងថៃ បានផ្ទុះឡើងជាថ្មីម្តងទៀត កាលពីចុងខែកក្កដា ក្រោយពេលដែលគណៈកម្មាធិការបេតិកភណ្ឌពិភពលោក បានទទួលយកផែនការគ្រប់គ្រងប្រាសាទព្រះវិហារខ្មែរ។ ថៃបានជំទាស់ទៅនឹងការទទួលយកផែនការគ្រប់គ្រងប្រាសាទព្រះវិហារខ្មែរ ដោយខ្លួនខ្លាចកម្ពុជា ដាក់បញ្ចូលដីតំបន់ក្បែរប្រាសាទព្រះវិហារ ៤,៦គីឡូម៉ែត្រការ៉េ ក្នុងផែនការគ្រប់គ្រងនោះ។
លោកនាយករដ្ឋមន្ត្រី ហ៊ុន សែន កាលពីថ្ងៃអាទិត្យ ទី៨ ខែសីហា បានជូនដំណឹងទៅអង្គការសហប្រជាជាតិ អំពីបំណងរបស់ថៃ ក្នុងការប្រើប្រាស់កងកម្លាំងយោធាដើម្បីដោះស្រាយបញ្ហាព្រំដែន។
ទោះបីមេបញ្ជាការកងទ័ពរបស់ប្រទេសទាំងពីរ កាលពីថ្ងៃច័ន្ទ ទី៩ ខែសីហា បង្ហាញជំហរមិនចង់ប្រើប្រាស់កម្លាំងយោធា ដើម្បីដោះស្រាយបញ្ហាព្រំដែនក៏ដោយ កងទ័ពនៃប្រទេសទាំងពីរនេះបានត្រៀមជាស្រេច ដើម្បីប្រយុទ្ធ ប្រសិនបើមានការឈ្លានពានទឹកដី៕