លោក ចម ប្រសិទ្ធ ទេសរដ្ឋមន្រ្តីនិងជារដ្ឋមន្រ្តីក្រសួងពាណិជ្ជកម្មមានប្រសាសន៍ថា តាមតួលេខស្តីពីការនាំចេញរបស់កម្ពុជា ដែលទើបនឹងសរុបរួចកាលពីថ្ងៃទី១២ មីនា កន្លងមកនេះ កម្ពុជាធ្លាក់ចុះនូវសេដ្ឋកិច្ច១៩% ខុសពីការប៉ាន់ស្មានរបស់ខ្លួនដែលថា ការធ្លាក់ចុះនោះនឹងមានចន្លោះពី២២ ទៅ ២៤%។ ប្រៀបធៀបក្នុងខែមករា ឆ្នាំមុននិងឆ្នាំនេះឃើញថា មានការកើនឡើងវិញប្រមាណ៥ទៅ៦%។ ទឹកប្រាក់ដែលបានពីការនាំចេញនៅក្នុងខែមករាឆ្នាំនេះ មានប្រមាណជាង៣០០លានដុល្លារ។
លោក ចម ប្រសិទ្ធ មានប្រសាសន៍ដូច្នេះ ៖ «និយាយរួម គឺឆ្នាំនេះចាប់ផ្ដើមចូលខែមករា យើងឃើញសញ្ញាវិជ្ជមានមកវិញហើយ យើងឃើញកើនបាន៥-៦% បើប្រៀបធ្រៀបទៅនឹងខែមករាឆ្នាំកន្លងទៅ។ ការព្យាករណ៍របស់យើងមុនថា ក្រោយវិបត្តិសេដ្ឋកិច្ច ការនាំចេញសម្លៀកបំពាក់របស់យើងអាចធ្លាក់រហូតដល់២២-២៤% ប៉ុន្តែតួលេខខ្ញុំទើបបានម្សិលមិញបូកសរុបស្រួលបួលទៅ គឺថ្លាក់តែ១៩%ទេ ឆ្នាំ២០០៩ ហើយឥឡូវចាប់ផ្ដើមពីខែមករា ២០១០ គឺចាប់ផ្ដើកើនឡើងវិញ អ៊ីចឹងយើងសង្ឃឹមថា វិស័យកាត់ដេររស់ឡើងវិញបានហើយនៅកម្ពុជា»។
ទោះជាមានការអះអាងយ៉ាងនេះក្តី ប៉ុន្តែអ្នកវិភាគសេដ្ឋកិច្ចខ្មែរបញ្ជាក់ថា សេដ្ឋកិច្ចកម្ពុជាមិនទាន់អាចមានលក្ខណៈល្អប្រសើរនៅឡើយទេ។ ប្រទេសនេះត្រូវការការបណ្តាក់ទុនវិនិយោគឲ្យបានច្រើនថែមទៀត ពិសេសទាក់ទងនឹងវិស័យកសិឧស្សាហកម្មនិងការទាក់ទាញផ្នែកទេសចរផងដែរ៕