ការចុះហត្ថលេខានោះបានធ្វើទ្បើងនៅឯក្រសួងមហាផ្ទៃប្រទេសកម្ពុជា កាលពីថៃ្ងទី១១ ខែមីនា ថ្មីៗនេះ រវាងលោក ស ខេង ជាឧបនាយករដ្ឋមន្រ្តីនិងជារដ្ឋមន្រ្តីក្រសួងមហាផ្ទៃ ជាមួយនឹងសមភាគីរបស់លោក គឺលោក ផងបាញ់ សេងអាថន ជារដ្ឋមន្រ្តីក្រសួងសន្តិសុខនៃសាធារណរដ្ឋប្រជាធិបតេយ្យ ប្រជាមានិតលាវ ដែលទើបបានបញ្ចប់ទស្សកិច្ចរយៈពេល៤ថៃ្ង កាលពីថៃ្ងអាទិត្យ ១៤ មីនានេះ នៅក្នុងប្រទេសកម្ពុជា។
កិច្ចព្រមព្រៀងទ្វេភាគីលើកំណត់ហេតុរវាងប្រទេសទាំងពីរនោះ គឺសម្រាប់ឆ្នាំ២០១០ រៀងរាល់មួយឆ្នាំម្តង ដោយផ្តោតលើកិច្ចសហប្រតិបត្តិការការពារសន្តិសុខសណ្តាប់ធ្នាប់សង្គម បន្តជូនដំណឹងឲ្យគ្នាទៅវិញទៅមកឲ្យទាន់ពេលវេលាអំពីសកម្មភាពដែលបង្កអស្ថិរភាព សន្តិសុខនិងសណ្តាប់ធ្នាប់សង្គមរវាងប្រទេសទាំងពីរ និងបង្កើនការត្រួតពិនិត្យអំពីការរត់ពន្ធគ្រឿងញៀនខុសច្បាប់។
មន្រ្តីអ្នកនាំពាក្យរបស់ក្រសួងមហាផ្ទៃប្រទេសកម្ពុជា លោក ខៀវ សុភ័គ បានមានប្រសាសន៍អត្ថាធិប្បាយប្រាប់វិទ្យុអាស៊ីសេរីនៅថៃ្ងច័ន្ទ ១៥ មីនានេះថា ៖ «ដោយសារតែមានកិច្ចសហប្រតិបត្តិការហ្នឹងហើយ បានជាយើងអាចជូនព័ត៌មានគ្នាទៅវិញទៅមក អាចក្ដាប់បានជនល្មើស អាចរាំងខ្ទប់នូវការជួញដូររត់ពន្ធគ្រឿងញៀនបានលទ្ធផលគួរឲ្យកត់សម្គាល់កាលពីឆ្នាំកន្លងមកហើយ។ យើងនឹងពង្រឹងនិងពង្រីកសហប្រតិបត្តិការហ្នឹងថែមទៀត»។
កិច្ចព្រមព្រៀងទ្វេភាគីស្រដៀងគ្នានេះ ត្រូវបានចុះហត្ថលេខារួចម្តងទៅហើយរវាងភាគីលាវនិងកម្ពុជា កាលពីឆ្នាំ២០០៩ កន្លងទៅ នៅពេលដែលលោកឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃលោក ស ខេង បានទៅបំពេញទស្សនកិច្ចនៅក្នុងប្រទេសលាវ។
មន្រ្តីនគរបាលមួយរូបនៅក្នុងខេត្តស្ទឹងត្រែង យាមការពារនៅចក្រព្រំដែនកម្ពុជា-លាវ បានថែ្លងថា បទល្មើសភាគច្រើននៅតាមបណ្តោយព្រំដែនកម្ពុជានិងលាវ គឺការកាប់ឈើប្រណីតខុសច្បាប់ប្រភេទឈើគ្រញូង ហើយក្រៅពីនេះ គឺការរត់ពន្ធគ្រឿងញៀនខុសច្បាប់ពីតំបន់ត្រីកោណមាសក្នុងប្រទេសភូមា ចូលក្នុងប្រទេសកម្ពុជាតាមច្រករបៀងនានាពីប្រទេសលាវ។
មន្រ្តីនគរបាលមួយរូបនៅក្នុងខេត្តស្ទឹងត្រែង បានឲ្យដឹងដូច្នេះ ៖ «បទល្មើសព្រៃឈើច្រើន។ គ្រឿងញៀននេះនិយាយទៅវាខុសជំនាញខ្ញុំ ប៉ុន្តែមិនមែនថាអត់ទេ។ បទល្មើសព្រៃឈើហ្នឹងគឺនៅជាប់ព្រំប្រទល់ហ្នឹងតែម្ដង។ តាមខ្ញុំដឹងទៅវាយកពីលាវចូលមកកម្ពុជា យកពីភូមាឆ្លងកាត់លាវចូលកម្ពុជា»។
ប្រទេសកម្ពុជានិងប្រទេសលាវ មានព្រំដែនជាប់គ្នាប្រវែង៥៤១គីឡូម៉ែត្រ នៅក្នុងនោះមានច្រកព្រំដែនធំមួយឈ្មោះច្រកដុំក្រទ្ប នៅក្នុងខេត្តស្ទឹងត្រែង ជាប់នឹងប្រទេសលាវ ព្រមទាំងមានច្រករបៀងតូចៗជាច្រើនកន្លែងទៀត៕