ព្រះតេជគុណ ប៊ុន សាលួត ប្រធានសហគមន៍សង្ឃរុក្ខវ័ន្ត ត្រូវបានគម្រោងអភិវឌ្ឍន៍នៃអង្គការសហប្រជាជាតិ (UNDP) បានជ្រើសរើសជាអ្នកឈ្នះនៃពានរង្វាន់អេក្វាទ័រនៅក្នុងឆ្នាំ២០១០នេះ ក្រោយពីព្រះអង្គបានដឹកនាំសកម្មភាពថែរក្សាព្រៃឈើ និងសត្វព្រៃនៅខេត្តឧត្តរមានជ័យ អស់រយៈពេលជិត ១០ឆ្នាំមក។
មានព្រះថេរដីកាប្រាប់វិទ្យុអាស៊ីសេរី នៅថ្ងៃអង្គារ ទី៧ ខែកញ្ញា បន្ទាប់ពីការជ្រើសរើសនោះ ព្រះតេជគុណបានសម្ដែងថា ព្រះអង្គមិននឹកស្មានដល់ថា ស្នាព្រះហស្តរបស់ព្រះអង្គត្រូវបានគេទទួលស្គាល់នោះឡើយ។
ព្រះតេជគុណ ប៊ុន សាលួត មានព្រះថេរដីកាដូច្នេះ ៖ «មានសេចក្ដីរំភើបយ៉ាងខ្លាំង អាត្មាគិតស្មានមិនដល់។ បើតាមអាត្មាដឹង ប្រហែលជាគេវាយតម្លៃទៅលើការលះបង់ លះបង់កម្លាំងកាយ លះបង់ធនធាន លះបង់ជីវិតរបស់យើង។ យើងធ្វើមិនគិតអំពីកម្រៃ ហើយមួយទៀត យើងមានផ្ទៃដីធំជាងគេដែលរដ្ឋាភិបាលបានប្រគល់ឲ្យយើង»។
របាយការណ៍របស់អង្គការ UNDP ដែលបានផ្ញើប្រគេនព្រះតេជគុណ ប៊ុន សាលួត គង់នៅវត្តប្រាសាទរាជា ក្នុងភូមិសំរោង ស្រុកសំរោង ខេត្តឧត្តរមានជ័យ ដើម្បីនិមន្តព្រះអង្គឲ្យទៅទទួលយកពានរង្វាន់អេក្វាទ័រ សម្រាប់ឆ្នាំ២០១០ នៅទីក្រុងញូវយ៉ក សហរដ្ឋអាមេរិក ដែលនឹងប្រព្រឹត្តទៅនៅថ្ងៃទី២០ ខែកញ្ញាខាងមុខ បានបញ្ជាក់ថា ព្រះតេជគុណ ប៊ុន សាលួត បានក្លាយជាអ្នកឈ្នះរង្វាន់ក្នុងចំណោមអ្នកឈ្នះរង្វាន់ ២៥រូបទៀត ដែលគេបានធ្វើការជ្រើសរើសចេញពីសហគមន៍អ្នកការពារព្រៃឈើចំនួនជាង ៣០០សហគមន៍រួចមកក្នុងប្រទេសចំនួន ៩៩ប្រទេស នៅក្នុងពិភពលោក។
ព្រះតេជគុណ ស៊ុន ថា ដែលជាព្រះសង្ឃចូលរួមនៅក្នុងការងារនេះជាមួយព្រះតេជគុណ ប៊ុន សាលួតដែរ មានព្រះថេរដីកាដោយក្តីរំភើបថា ព្រះអង្គនឹងបន្តចូលរួមការងារនេះឲ្យកាន់តែខ្លាំងថែមទៀត ៖ «យើងដែលបានផលមកហើយ ក៏យើងនឹងប្រឹងប្រែងបន្ថែមក្នុងការផ្សព្វផ្សាយ ដើម្បីមនុស្សជាតិ ដើម្បីប្រយោជន៍»។
ព្រះតេជគុណ ប៊ុន សាលួត បានដឹកនាំព្រះសង្ឃប្រហែល ១០អង្គ ក្នុងការបង្កើតសហគមន៍សង្ឃរុក្ខវ័ន្ត នៅឆ្នាំ២០០១ ក្នុងខេត្តឧត្តរមានជ័យ ដើម្បីដើរល្បាតមើលព្រៃឈើមិនឲ្យមានការកាប់បំផ្លាញ និងការសម្លាប់សត្វព្រៃ។ ព្រះអង្គបានបំផុសចលនាឲ្យដាំឈើឡើងវិញ និងបំផុសការថែរក្សាដើមឈើធំៗនៅក្នុងព្រៃ ដោយព្រះអង្គតែងយកស្បង់ទៅព័ទ្ធជុំវិញដើមឈើនោះ ដោយរៀបចំសូត្រមន្តបំពាក់ឲ្យដើមឈើធំនោះក្លាយទៅជាដើមឈើសក្ការជាដើម។
ព្រះអង្គបានធ្វើកិច្ចការងារនេះដោយលះបង់ទាំងកម្លាំងកាយ និងកម្លាំងចិត្ត រួមជាមួយនឹងធនធានដែលព្រះអង្គស្វែងរកបាន ដោយមិនគិតពីផលប្រយោជន៍ផ្ទាល់ព្រះអង្គឡើយ។ បច្ចុប្បន្នមានព្រៃឈើប្រហែល ១ម៉ឺនហិកតា កំពុងស្ថិតក្នុងការអភិរក្សរបស់ព្រះអង្គ ហើយនិងមានអ្នកភូមិរាប់ពាន់គ្រួសារ កំពុងរស់នៅអាស្រ័យផលពីអនុផលព្រៃឈើនៅតំបន់នោះ។
ទឹកប្រាក់ចំនួន ៥ពាន់ដុល្លារ នឹងត្រូវគេប្រគេនព្រះអង្គក្នុងការឈ្នះពានរង្វាន់អេក្វាទ័រ ហើយនិងមានទឹកប្រាក់ ១ម៉ឺន៥ពាន់ដុល្លារបន្ថែមទៀត ដែលគេនឹងប្រគេនព្រះអង្គផងដែរ ប្រយោជន៍គាំទ្រដល់សកម្មភាពថែរក្សាព្រៃឈើបន្តទៀត។ ក្រៅពីនោះទៀត សហគមន៍សង្ឃរុក្ខវ័ន្ត ត្រូវបានគេសុំឲ្យសហការនៅក្នុងគម្រោងថែរក្សាជីវសាស្ត្រចម្រុះ និងការកាត់បន្ថយភាពក្រីក្រផងដែរ៕